សម្តេចតេជោ នឹងបង្វែរថវិកាអមមេដាយសន្តិភាពពិភពលោកចំនួន១លានដុល្លារ ទៅសាងសង់ផ្ទះ​ជូនអតីតយុទ្ធជន​

សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី នៃ​ព្រះរាជាណាចក្រ​កម្ពុជា ទទួលបាន​មេដាយ​សហប្រធាន​កិច្ចប្រជុំ​កំពូល​សន្តិភាព​ពិភពលោក​២០២១ (World Summit Peace) ពី​មហាសន្និបាត នៃ​ក្តីសង្ឃឹម​លើក​ទី​៧ ហើយ​ក្នុងនោះ​ក៏មាន​អម​ទៅដោយ​ទឹកប្រាក់​១លាន​ដុល្លារ​ផងដែរ​។​

ថ្លែង​ក្នុង​ពិធី​ប្រគល់​-​ទទួល ពហុ​កីឡដ្ឋាន​ជាតិ​មរតក​តេ​ជោ កាលពីរសៀល​ថ្ងៃទី​១២ ខែកញ្ញា សម្តេច​តេ​ជោ ហ៊ុន សែន ប្រកាស​បង្វែរ​ថវិកា​១​លាន​ដុល្លារ ដែលជា​ថវិកា​រង្វាន់​ពី​ការទទួល​មេដាយ​សហប្រធាន​កិច្ចប្រជុំ​កំពូល​សន្តិភាព​ពិភពលោក​២០២១ (World Summit Peace) ពី​មហាសន្និបាត​នៃ​ក្តីសង្ឃឹម​លើក​ទី​៧ ក្រោម​ប្រធានបទ​ស្តីពី “​សន្តិភាព​នៅ​តំបន់​អាស៊ី​ប៉ាស៊ីហ្វិក​” ទៅ​សាង​សង់ផ្ទះ​ជូន​ដល់​អតីតយុទ្ធជន​វិញ​។​

បើតាម​សម្តេច​តេ​ជោ ហ៊ុន សែន លុយ​ចំនួន​១លាន​ដុល្លារ​នេះ សម្ដេច​នឹងមិន​ទុក​ប្រើប្រាស់​ផ្ទាល់ខ្លួន​នោះទេ គឺសម្តេច​នឹង​យក​ថវិកា​ចំនួន​១​លាន​ដុល្លារ​នេះ ទៅ​សាង​សង់ផ្ទះ​ជូន​ដល់​អតីតយុទ្ធជនហើយ​លុយ​១លាន​ដុល្លារ​នេះ នឹង​កសាង​ផ្ទះ​ជូន​អតីតយុទ្ធជន​បាន​យ៉ាងច្រើន​ផងដែរ​។​

សូមបញ្ជាក់ថា កាលពី​ព្រឹកថ្ងៃទី​១២ ខែកញ្ញា ឆ្នាំ​២០២១​នេះ ក្នុង​កម្មវិធី​មហាសន្និបាត​នៃ​ក្តីសង្ឃឹម​ពិភពលោក​លើក​ទី​៧៖ ស្ថាប័ន​ស្រាវជ្រាវ​ឆ្នាំ​២០២២ ក្រោម​ប្រធានបទ “​សន្តិភាព​នៅ​តំបន់​អាស៊ី​ប៉ាស៊ីហ្វិក​” សម្ដេច​អគ្គមហាសេនាបតី​តេ​ជោ ហ៊ុន សែន នាយករដ្ឋមន្ត្រី​នៃ​ព្រះរាជាណាចក្រ​កម្ពុជា ទទួលបាន​មេដាយ​សហប្រធាន​កិច្ចប្រជុំ​កំពូល​សន្តិភាព​ពិភពលោក​២០២១ (World Summit Peace) ពី​មហាសន្និបាត​នៃ​ក្តីសង្ឃឹម​លើក​ទី​៧ ក្រោម​ប្រធានបទ​ស្តីពី “​សន្តិភាព​នៅ​តំបន់​អាស៊ី​ប៉ាស៊ីហ្វិក​”៕

អត្ថបទ៖ កោះ​កែវ​

​