រថយន្តហុីលុច បុកផាស់អាប់ដឹកក្មេងមកពីចាក់វ៉ាក់សាំង ស្លាប់ម្នាក់ របួស ៧នាក់

ក្មេង ចាស់ ពេញផាស់អាប់ ចំនួន ៨ នាក់ បានរងរបួសពេញផ្លូវ និងមានអ្នកស្លាប់ផងដែរ ខណ:ដែលពួកគេទើបត្រឡប់មកពីចាក់វ៉ាក់សាំង និងកំពុងធ្វើដំណើរឡើងផ្លូវហាយវេ ក៏ត្រូវរថយន្តមួយគ្រឿងបោះពួយមកបុកពេញទំហឹងតែម្តង។

តាមការបញ្ជាក់ពីលោក ហូ សុវណ្ណរិទ្ធ នាយប៉ុស្តិ៍នគរបាលរដ្ឋបាល អូរដំបង១ បានបញ្ជាក់ថា ករណីនេះបានកើតឡើងនៅវេលាម៉ោង ១០ និង ៣០ នាទី ព្រឹក ថ្ងៃទី ២៥ ខែកញ្ញា ឆ្នាំ២០២១ លើកំណាត់ផ្លូវហាយវេ ( ផ្លូវវាងក្រុង ) ស្ថិតក្នុងភូមិបោះពោធិ ឃុំអូរដំបង១ ស្រុកសង្កែ ខេត្តបាត់ដំបង រវាងរថយន្តម៉ាកហុីលុច ជាមួយនិងផាស់អាប់ ក្នុងទិសដៅខ្វែងគ្នា។

តាមការពិនិត្យរបស់សមត្ថកិច្ចបានបញ្ជាក់ថា ដំបូងគឺផាស់អាប់ដែលដឹកក្មេង ចាស់ សរុបចំនួន ៨ នាក់ បានធ្វើដំណើរមកពីនាំក្មេងចាក់វ៉ាក់សាំង ដោយធ្វើដំណើរក្នុងទិសដៅពីជើងទៅត្បូង នៅលើផ្លូវហាយវេ ក្នុងគោលបំណងឆ្លងកាត់ទៅផ្ទះ។

សមត្ថកិច្ចបានបន្តថា ខណ:ដែលផាស់អាប់កំពុងឆ្លងជិតផុតទៅហើយនោះ ក៏ស្រាប់រថយន្តមួយគ្រឿងបោះពួយមកពីលិច បានបុកកន្ទុយផាស់អាប់ពេញទំហឹង បណ្តាលឱ្យបោកមនុស្សទៅលើថ្នល់ទាំងអស់។ ដោយឡែករថយន្តបានរេចង្កូតធ្លាក់ចូលប្រឡាយទឹកក្បែរទីនោះដែរ។

អ្នករងរបួសទាំងក្មេង ទាំងចាស់ នៅរាយប៉ាយពេញផ្លូវ ក្នុងនោះមានមនុស្សបានស្លាប់ម្នាក់ និងរបួស ៧នាក់ ដោយមានអ្នករបួសធ្ងន់ ២នាក់។ ពេលនេះពយកគេបានបញ្ជូនទៅកាន់មន្ទីរពេទ្យបង្អែកខេត្តហើយ។ ដោយឡែកអត្តសញ្ញាណភាគីទាំងសងខាងនៅមិនទាន់ទទួលបាននៅឡើយទេ៕

អត្ថបទ៖ សោ និយមរ័ត្ន

ចុចអាន៖ ប្រមុខរាជរដ្ឋាភិបាល អនុញ្ញាតឲ្យពលរដ្ឋធ្វើដំណើរកម្សាន្ដ តាម រម្មណីដ្ឋាននានា ឱកាសឈប់ សម្រាក​ថ្ងៃបុណ្យភ្ជុំបិណ្ឌ