សម្ដេចតេជោ ហ៊ុន សែន អនុញ្ញាតឱ្យ បើកដំណើរការសាកលវិទ្យាល័យរដ្ឋ និងឯកជនឡើងវិញ

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី ២៥ ខែកញ្ញា ឆ្នាំ ២០២១ នេះ បានអនុញ្ញាតឱ្យ ក្រសួងអប់រំបើកដំណើរការសាកលវិទ្យាល័យឡើងវិញទាំងរដ្ឋ និងឯកជន។

សម្ដេចតេជោ ហ៊ុន សែន ថ្លែងថា “ម្សិលមិញនេះ ខ្ញុំព្រះករុណាបានអនុញ្ញាតឱ្យក្រសួងអប់រំ យុវជន និងកីឡា បើកដំណើរការមហាវិទ្យាល័យទាំងរដ្ឋ និងឯកជនឡើងវិញផងដែរ”។

ថ្លែងក្នុងសារពិសេសជូនជនរួមជាតិពាក់ព័ន្ធស្ថានភាពជំងឺកូវីដ-១៩ នៅព្រឹកថ្ងៃ​ទី ២៥ ខែកញ្ញានេះ សម្ដេចតេជោ ក៏បានបញ្ជាក់ពីការឈប់សម្រាកចំនួន ៣ ថ្ងៃរបស់មន្ត្រីរាជការ បុគ្គលិក​ក្រុម​ហ៊ុន និង​កម្មករកម្មការិនីរោងចក្រ ដែលត្រូវបានការ​អនុញ្ញាត​ឲ្យឈប់សម្រាក​ដោយមិន​មានការហាមឃាត់​និងកាត់​ប្រាក់បៀវត្សរ៍​នោះទេ។

សម្ដេចតេជោ បានបញ្ជាក់ថា “បងប្អូនអាចធ្វើដំណើរដើរលេងទៅតាមទីកន្លែងនានា ដោយមានវិធាន​ការណ៍សុខាភិបាលទៅជាមួយ នោះក៏ជាវីធីមួយដើម្បីបើក​ឱកាស​ឲ្យបងប្អូន​បានសម្រាកក្នុងរយៈ​កាល​នៃការភ្ជុំបិណ្ឌនេះ”៕

អត្ថបទៈ ឡេង ដេត