ទេសរដ្ឋមន្រ្តី លី ធុជ៖ ត្រូវតាមដានជួយជនរងគ្រោះដោយសារមីន និងសំណល់ពីសង្គ្រាម

ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន ថ្លែងថា ត្រូវធ្វើការតាមដានសកម្មភាពលើកិច្ចការងារជួយដល់ជនរងគ្រោះថ្នាក់ដោយសារមីន និងសំណល់ជាតិផ្ទុះសល់ពីសង្គ្រាម ក៏ដូចជាការផ្តល់សេវាកម្មនានាដល់ជនរងគ្រោះថ្នាក់ដោយសារមីន និងសំណល់ជាតិផ្ទុះសល់ពីសង្គ្រាម ក្រុមគ្រួសាររបស់ពួកគេ និងមានជនពិការភាពទូទៅពីគ្រប់ភាគីពាក់ព័ន្ធ និងដើម្បីជួយជំរុញលើកទឹកចិត្តដល់ប្រតិបត្តិករបោសសម្អាតមីនជាតិ និងអន្តរជាតិឱ្យគិតគូររៀបចំកម្មវិធីជួយដល់កិច្ចសង្គ្រោះជនរងគ្រោះថ្នាក់ដោយសារមីន និងសំណល់ជាតិផ្ទុះសល់ពីសង្គ្រាម និងធ្វើឱ្យប្រសើរឡើងនូវស្ថានភាពនៃការរស់នៅ និងបញ្ចូលពួកគេទៅក្នុងសង្គម។

ការថ្លែងបែបនេះ នៅក្នុងសិក្ខាសាលាថ្នាក់ជាតិ ស្តីពីកិច្ចសង្គ្រោះជនរងគ្រោះថ្នាក់ដោយសារមីន និងសំណល់ជាតិផ្ទុះសល់ពីសង្គ្រាម ដោយសិក្ខាសាលាធ្វើឡើងរយៈពេល២ថ្ងៃ ចាប់ពីថ្ងៃទី៣០ ខែកញ្ញា ដល់ថ្ងៃទី០១ ខែតុលា ឆ្នាំ២០២១ នៅសណ្ឋាគារ LBN ខេត្តកំពង់ចាម។ សិក្ខាសាលាមានការអញ្ជើញចូលរួម ពីគ្រប់ប្រតិបត្តិករជាតិ និងអន្តរជាតិ ក្រសួង ស្ថាប័នជាតិ និងស្ថាប័នអន្តរជាតិពាក់ព័ន្ធ។

ឯកឧត្តមទេសរដ្ឋមន្រ្តី លី ធុជ បានបញ្ជាក់ឱ្យដឹងទៀតថា ទោះបីបងប្អូនមួយចំនួនរងគ្រោះដោយសំណល់ជាតិផ្ទុះសល់ពីសង្គ្រាម ក៏ដោយ ប៉ុន្តែប្រមុខដឹកនាំ ក្រោមការដឹកនាំរបស់ សម្តេចតេជោ ហ៊ុន  សែន ជានាយករដ្ឋមន្ត្រី តែងតែគិតគូរពីការលើកម្ពស់ជីវភាពជាប្រចាំ តាមរូបភាពផ្តល់ជាអំណោយ បណ្ណក្រក្រី និងគិតពីសុខមាលភាពដោយជួយរិះរកតាមលទ្ធភាពការងារផ្សេងៗ ដើម្បីផ្តល់ជនមានពិការភាពទទួលបាននូវបទពិសោធន៍ល្អៗ។

សិក្ខាសាលានេះក៏ជាវេទិកាសម្រាប់ជួបជុំរវាងអ្នកផ្តល់សេវាកម្មនានា ជួយដល់ជនរងគ្រោះថ្នាក់ដោយសារមីន និង សំណល់ជាតិផ្ទុះសល់ពីសង្គ្រាម និងអ្នករៀបចំគោលនយោបាយ និងសហគមន៍ផ្តល់ជំនួយបានជួបពិភាក្សាគ្នាលើបញ្ហាប្រឈម ក្នុងការអនុវត្តការងារ ការចែករំលែកចំណេះដឹង បទពិសោធន៍ និងរួមគ្នាដោះស្រាយបញ្ហា ក្នុងន័យជួយដល់ជនរងគ្រោះថ្នាក់ដោយសារមីន និង សំណល់ជាតិផ្ទុះសល់ពីសង្គ្រាម ក្រុមគ្រួសាររបស់ពួកគាត់ និងជនមានពិការភាពទូទៅ៕

អត្ថបទ និង រូបភាព៖ ហុង ម៉េងហៀ