ក្រសួងការងារ៖ ការធ្វើតេស្តរកកូវីដ-១៩ ផ្អែកលើគោលការណ៍ស្ម័គ្រចិត្ត និងមិនមានការផាកពិន័យឡើយ

ក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា ការធ្វើតេស្តរកកូវីដ១៩ ទៅលើកម្មករនិយោជិតនៅក្រោយពិធីបុណ្យភ្ជុំខាងមុខនេះ គឺផ្អែកលើគោលការណ៍ស្ម័គ្រចិត្ត និងមិនមានការផាកពិន័យឡើយ។

​លោកបណ្ឌិត អ៉ិត​ សំហេង រដ្ឋមន្ត្រីក្រសួង​ការងារ​ និង​បណ្តុះបណ្តាល​វិជ្ជាជីវៈ​ បានឱ្យដឹង​នៅក្នុង​សេចក្តី​ជួន​ដំណឹង​ចុះ​ថ្ងៃទី​៤​តុលា​ថា ដើម្បី​ចូលរួមចំណែក​ប្រយុទ្ធ និង​ទប់ស្កាត់​ការរីក​រាលដាល​ទ្រង់ទ្រាយ​ធំ នៃ​ជំងឺ​កូ​វី​ដ​-១៩ នៅតាម​រោងចក្រ សហគ្រាស ក៏ដូចជា​ការរៀន​រស់​នៅតាម​គន្លង​ប្រក្រតីភាព​ថ្មី និង​ការត្រៀម​បើក​សកម្មភាព​សេដ្ឋកិច្ច​ឡើងវិញ ក្រសួង​សូម​លើកទឹកចិត្ត​ឱ្យ​ម្ចាស់ ឬ​នាយក​រោងចក្រ សហគ្រាស ត្រៀម​ឧបករណ៍​ធ្វើតេស្ត​រហ័សរ​ករោគ​​កូវីដ​-១៩ សម្រាប់ធ្វើ​តេស្ត​រក​មេរោគ​កូ​វីដ​-១៩ដល់​កម្មករនិយោជិត​របស់ខ្លួន ក្រោយពេល​ឈប់សម្រាក​ក្នុង ពិធីបុណ្យ​ភ្ជុំបិណ្ឌ ឆ្នាំ​២០២១​។

​លោក​រដ្ឋមន្ត្រី​បាន​បន្តថា ការធ្វើ​តេ​ស្ករ​ហ័ស​រក​មេរោគ​កូ​វីដ​-១៩នេះ​ គឺ​ផ្អែកលើ​គោលការណ៍​ស្ម័គ្រចិត្ត និង​មិនមាន​ការផាកពិន័យ​ទៅលើ​ម្ចាស់ ឬ​នាយក​រោងចក្រ សហគ្រាស និង​កម្មករនិយោជិត​ឡើយ​។ ជាមួយគ្នានេះដែរ លោក​រដ្ឋមន្ត្រី​បាន​ណែនាំ​ដល់​កម្មករនិយោជិត​ ដែល​បាន​ឈប់សម្រាក​ក្នុង​ពិធីបុណ្យ​ភ្ជុំបិណ្ឌ​នេះ ត្រូវអនុវត្ត​ឱ្យបាន​ខ្ជាប់ខ្ជួន​នូវ​វិធានការ “៣​ការពារ និង ៣កុំ” ជាពិសេស​ពាក់​ម៉ាស លាងដៃ​ញឹកញាប់​នឹង​សាប៊ូ រក្សា​គម្លាត​សុវត្ថិភាព​បុគ្គល​ក្នុងពេល​ធ្វើដំណើរ​ដោយ​រថយន្ត​រូប និង​ត្រូវ​យកតាម​ខ្លួន​នូវ​ទឹក​អាល់កុល ឬ​អាល់កុល​ដែល​លាងដៃ​។ ​លោក​រដ្ឋមន្ត្រី​មាន​សេចក្តី​ជឿជាក់ថា ម្ចាស់ ឬ​នាយក​រោងចក្រ សហគ្រាស និង​កម្មករនិយោជិត​ទាំងអស់ នឹង​អនុវត្តតាម​សេចក្ដីណែនាំ​បន្ថែម​នេះ ប្រកបដោយ​ប្រសិទ្ធភាព​ខ្ពស់​៕

អត្ថបទ៖ ​សំអឿន​

​