អាជ្ញាធរ អំពាវនាវកុំឲ្យ​មានការកេងចំណេញលើអ្នក​ស្ម័គ្រចិត្ត​ផ្អាកកម្មវិធីនានា

រដ្ឋបាលរាជធានីភ្នំពេញ បានអំពាវនាវដល់ម្ចាស់មជ្ឈមណ្ឌលអគារ ភោជនីយដ្ឋាន ទីតាំងសម្រាប់ជួលរៀបចំកម្មវិធីទាំងអស់ ឲ្យយោគយល់អធ្យាស្រ័យដល់ម្ចាស់កម្មវិធី ដែលស្ម័គ្រចិត្តចូលរួម ​បង្ការ និងទប់ស្កាត់ការរីករាល នៃមេរោគ​កូ​វីដ-១៩ ក្នុងព្រឹត្តិការណ៍សហគមន៍២៨វិច្ឆិកា។

រដ្ឋបាលរាជធានីភ្នំពេញ បានអំពាវនាវ​ នាថ្ងៃទី១ ខែធ្នូ ឆ្នាំ២០២០​នេះ ដោយស្នើដល់ម្ចាស់មជ្ឈមណ្ឌលអគារ ភោជនីយដ្ឋាន ទីតាំងសម្រាប់ជួលរៀបចំកម្មវិធីទាំងអស់ ម្ចាស់សម្អាងការ ម្ចាស់អាជីវកម្មចុងភៅ ម្ចាស់អាជីវកម្មលក់ ភេសជ្ជៈ ផ្កា និងសម្ភារនានា ក៏ដូចក្រុមហ៊ុន ឬអាជីវករដែលផ្តល់សេវាកម្មផ្សេងៗដល់ការរៀបចំកម្មវិធីទាំងអស់ មេត្តាយោគយល់អធ្យាស្រ័យ និងសូមកុំកាត់លុយ ឬយកលេសទាមទារសំណងនៃការខាតបង់ពីម្ចាស់កម្មវិធី ដែលបានកក់ប្រាក់ ព្រមទាំងជៀសវាងការយកឱកាសនេះ ដើម្បីកេងចំណេញពីប្រជាពលរដ្ឋដែលបានស្ម័គ្រចិត្តចូលរួម ក្នុងការបង្ការ និងទប់ស្កាត់ការរីករាលនៃមេរោគកូវីដ១៩ ក្នុងព្រឹត្តិការណ៍សហគមន៍២៨វិច្ឆិកា នៅរាជធានីភ្នំពេញ។

គួរបញ្ជាក់ថា សម្ដេចតេជោ ហ៊ុន សែន នាយករដ្ឋមន្រ្តីកម្ពុជា បានចេញវិធានការបន្ទាន់ ដល់អភិបាលរាជធានីភ្នំពេញ និងអភិបាលខេត្តសៀមរាប ឲ្យផ្អាក់ការជួបជុំ និងផ្អាកពិធីអាពាហ៍ពិពាហ៍ ឬការជួបជុំមិនឲ្យលើសពី២០នាក់ ដើម្បីចូលរួម​បង្ការ និងទប់ស្កាត់ការរីករាលនៃមេរោគកូវីដ-១៩ ក្នុងព្រឹត្តិការណ៍សហគមន៍២៨វិច្ឆិកា៕