ព័ត៌មានជាតិ

ក្រសួងអភិវឌ្ឍន៍ជនបទ និងមន្ត្រីជំនាញខេត្ត ចុះពិនិត្យស្ថានភាពហេដ្ឋារចនាសម្ព័ន្ធជនបទ រងផលប៉ះពាល់ដោយទឹកជំនន់ ឆ្នាំ ២០២១នេះ

បានផុស

៣ years មុន

នៅ

ថ្ងៃអង្គារ ១២ តុលា ២០២១

ដោយ

បន្ទាយមានជ័យ ៖ ព្រឹកថ្ងៃទី១២ ខែតុលា ឆ្នាំ២០២១នេះ លោក អ៊ិន ចន្ថា រដ្ឋលេខាធិការក្រសួងអភិវឌ្ឍន៍ជនបទ និងជាប្រធានលេខាធិការដ្ឋាន លោកបណ្ឌិត ជ្រុន ថេរ៉ាវ៉ាត រដ្ឋលេខាធិការអនុប្រធានលេខាធិការដ្ឋាន លោក អោម ចន្ថា អភិបាលរងខេត្តបន្ទាយមានជ័យ និងមន្ត្រីជំនាញខេត្តបន្ទាយមានជ័យ បានចុះពិនិត្យស្ថានភាព ហេដ្ឋារចនាសម្ព័ន្ធជនបទដែលរងការផលប៉ះពាល់ដោយសារទឹកជំនន់ទាំង ៩ ស្រុក ក្រុង ទូទាំងខេត្តបន្ទាយមានជ័យ ក្នុងនោះរួម មានផ្លូវជនបទរងផលប៉ះពាល់ដោយទឹកជំនន់សរុប ៤៨ ខ្សែប្រវែង ៤៣៧.០០០ម៉ែត្រ បើធៀបទៅនឹងឆ្នាំ២០២០ ផ្លូវជនបទរងផលប៉ះពាល់ទឹកជំនន់សរុបទូទាំងខេត្តចំនួន ៦៨ ខ្សែប្រវែង ៧៦៤.០០០ម៉ែត្រ នេះគឺជារបាយការណ៍សង្ខេបរបស់ លោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ជា យុទ្ធារុណ បានបញ្ជាក់ថា តាមការចុះពិនិត្យជាក់ស្ដែងពីស្ថានភាពហេដ្ឋារចនាសម្ព័ន្ធជនបទ ដែលរងចក្រផលប៉ះពាល់ដោយគ្រោះធម្មជាតិជំនន់ទឹកភ្លៀងឆ្នាំ ២០២១ នេះ បានធ្វើឲ្យខូចខាតរួមមានផ្លូវលិចទឹកប្រវែង ១១៧,៩៤០ម៉ែត្រ ទឹកហូរច្រោះជើងទេ ឬតួផ្លូវប្រវែង៦៦,១១០ម៉ែត្រ ហូដាច់តួផ្លូវ មិនអាចធ្វើដំណើរបានចំនួន១៦ខ្សែប្រវែង១,៩៥០ម៉ែត្រ បាក់សំណង់លូគ្រប់ប្រភេទ ចំនួន៣កន្លែង អណ្ដូងស្នប់លិចទឹក១,៣៥៨អណ្ដូង បង្គន់អនាម័យគ្រួសារ លិចទឹកសរុបចំនួន៧,៤៥០បង្គន់ និងបង្គន់អនាម័យសាធារណៈចំនួន២៥៣បង្គន់។

លោក ជ្រុន ថេរ៉ាវ៉ាត រដ្ឋលេខាធិការក្រសួងអភិវឌ្ឍន៍ជនបទបានប្រាប់អ្នកយកព័ត៌មានឲ្យដឹងថា ក្រសួងអភិវឌ្ឍន៍ជនបទ បានចុះពិនិត្យមើលស្ថានភាពផ្លូវជនបទចំនួន៥ខ្សែវែងៗរួមមានផ្លូវក្រាលគ្រោះក្រហម ស្ថិតនៅឃុំប៉ោយចារ ស្រុកភ្នំស្រុក ផ្លូវគ្រោះក្រហម ឃុំ សឿ ស្រុកមង្គលបូរី ផ្លូវគ្រោះក្រហម ឃុំ ចង្ហា ស្រុកអូរជ្រៅ ផ្លូវក្រាលគ្រោះក្រហម សង្កាត់និមិត្តក្រុងប៉ោយប៉ែត និងផ្លូវក្រាលគ្រោះក្រហម+បេតុង ស្ថិតនៅឃុំនិមិត្តស្រុកអូរជ្រៅ គោលបំណងដើម្បីធ្វើការវាយតម្លៃនិងរៀបចំជួសជុល និងស្ដារឡើងវិញនាពេលខាងមុខផងដែរ៕

ដោយ ៖ វ៉ាន់ណាង