សម្ដេចតេជោ ឱ្យបន្តទុកវ៉ាក់សាំងនៅខេត្តដែលបានបញ្ចប់យុទ្ធនាការ និងជំរុញកម្មវិធីចាក់វ៉ាក់សាំងដល់ផ្ទះ

សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នាព្រឹកថ្ងៃទី១៩ ខែតុលា ឆ្នាំ២០២១នេះ បានផ្ញើសារពិសេសជូនជនរួមជាតិ ពាក់ព័ន្ធស្ថានភាពជំងឺកូវីដ-១៩ នៅកម្ពុជា ក្រោយបុណ្យភ្ជុំបិណ្ឌ ក្នុងនោះសម្ដេចបាន បញ្ជាឱ្យបន្តទុកវ៉ាក់សាំងកូវីដ១៩ នៅខេត្តដែលបានបញ្ចប់យុទ្ធនាការចាក់វ៉ាក់សាំង និងជំរុញឱ្យមានកម្មវិធីចាក់វ៉ាក់សាំងកូវីដជូនប្រជាពលរដ្ឋដល់ភូមិ ដល់ផ្ទះ ពិសេសប្រជាពលរដ្ឋដែលមិនអាចធ្វើដំណើរមកចាក់វ៉ាក់សាំងបាន។

សម្ដេចតេជោ ហ៊ុន សែន មានប្រសាសន៍ថា តាមការសង្កេត អត្រាស្លាប់ដោយសារជំងឺកូវីដ១៩ម្សិលមិញនេះមានចំនួន១២នាក់ ក្នុងនោះមាន៨នាក់ដែលមិនបានចាក់វ៉ាក់សាំង។ ​ជាទូទៅចំនួនអ្នកស្លាប់ដោយសារមិនបានចាក់វ៉ាក់សាំងនេះ គឺជាចំនួនដ៏ធំ ហើយអ្នកដែលមិនបានចាក់វ៉ាក់សាំងមានមូលហេតុខុសៗគ្នា ដែលសម្ដេចតេជោសូមស្នើគ្រូពេទ្យ អាជ្ញាធរ ក៏ដូចជាពលរដ្ឋ ​គឺខិតខំដើម្បីទទួលបានវ៉ាក់សាំង ហើយបើទោះជាយើងបានបិទបញ្ចប់ការចាក់វ៉ាក់សាំងនៅតាមខេត្តមួយចំនួនរួចទៅហើយក៏ដោយ ប៉ុន្តែត្រូវទុកវ៉ាក់សាំងសម្រាប់ចាក់ជូនពលរដ្ឋ និងយើងអាចមានកម្មវិធីដើម្បីទៅចាក់វ៉ាក់សាំងជូនប្រជាពលរដ្ឋនៅតាមភូមិ តាមផ្ទះតែម្ដង ក្នុងករណីប្រជាពលរដ្ឋមិនអាចធ្វើដំណើរមកកាន់ទីកន្លែងចាក់វ៉ាក់សាំងបាន។

ជាមួយគ្នានេះ សម្ដេចតេជោ បានបញ្ជាក់ថា ស្ថានភាពមិនមានការឆ្លងថ្មី និងស្លាប់ច្រើនដោយសារជំងឺកូវីដ១៩ ក្រោយបញ្ចប់ពិធីបុណ្យភ្ជុំកាលពី២សប្ដាហ៍កន្លងមកនេះ គឺអាចនិយាយថា វ៉ាក់សាំងគឺជាគ្រឹះការពារយ៉ាងរឹងមាំ សម្រាប់ការពារអាយុជីវិតប្រជាជនយើង កាត់បន្ថយការឆ្លង ហើយបើមានការឆ្លងហើយ ក៏មិនមានគ្រោះថ្នាក់ធ្ងន់ធ្ងរ។

សម្ដេចតេជោ ហ៊ុន សែន មានប្រសាសន៍បន្តថា ឥឡូវនេះបន្ទាប់ពីចាក់ដូសទី២ ដល់ពេលវេលាដែលត្រូវចាក់ដូសទី៣តាមតំបន់ តាមទីកន្លែងដែលបានចាក់មុនចាក់ក្រោយ ដែលកំពុងធ្វើយុទ្ធនាការនៅរាជធានីភ្នំពេញ ដែលការចាក់នេះត្រូវប្រើរយៈពេលពីដូសទី២ ទៅដូសទី៣ក្នុងរយៈពេលពី៤ ទៅ៦ខែ។

សម្ដេចតេជោ បានបញ្ជាក់ថា គឺជាគុណបុណ្យរបស់កម្ពុជា ដែលមានវ៉ាក់សាំងចាក់គ្រប់គ្រាន់ តាមរយៈជំនួយវ៉ាក់សាំងកូវីដ១៩ពីប្រទេសជាមិត្ត ពិសេសគឺ​សាធារណរដ្ឋប្រជាមានិតចិន សហរដ្ឋអាមេរិក​ ជប៉ុន អង់គ្លេស និង ខូវ៉ាក់។ ក្នុងនោះកម្ពុជាក៏បានទិញវ៉ាក់សាំងកូវីដ១៩ ដោយខ្លួនឯងនូវចំនួនច្រើន ដែលមកដល់ពេលនេះ កម្ពុជាទទួលបានវ៉ាក់សាំងកូវីដ១៩ ចំនួន ៣៨លានដូស ដើម្បីចាក់ជូនប្រជាពលរដ្ឋ៕

អត្ថបទ៖ ច័ន្ទ វីរៈ