ព័ត៌មានជាតិ
មន្ត្រីក្រសួងអប់រំ ផ្ញើសារ៣ចំណុច មុនបើកដំណើរការសិក្សាទូទាំងប្រទេស ១ វិច្ឆិកា
ការបើកដំណើរការគ្រឹះស្ថានសិក្សាគ្រប់កម្រិតសម្រាប់ការរៀន និងបង្រៀនតាមបណ្តុំនៅរាជធានី-ខេត្តដែលមានហានិភ័យទាប បាន និងកំពុងប្រព្រឹត្តទៅដោយមានលទ្ធផលអាចទទួលយកបានតាមការគ្រោងទុក ទន្ទឹមនឹងការអនុវត្តយ៉ាងខ្ជាប់ខ្ជួននូវគោលការណ៍ប្រតិបត្តិស្តង់ដារ និងវិធានការសុខាភិបាលដូចមានចែងក្នុងលិខិតលេខ៤៦ និង៥០។ យោងលើលទ្ធផលនេះ ចាប់ពីថ្ងៃទី០១ ខែវិច្ឆិកា ឆ្នាំ២០២១ ក្រសួងអប់រំ យុវជន និងកីឡា នឹងពង្រីកវិសាលភាពបើកដំណើរការបង្រៀន និងរៀនតាមបណ្ដុំសម្រាប់គ្រឹះស្ថានសិក្សាចំណេះទូទៅគ្រប់កម្រិត គ្រឹះស្ថានឧត្តមសិក្ សាសាធារណៈ និងឯកជន និងគ្រឹះស្ថានបណ្ដុះបណ្ដាលគ្រូ។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា មានប្រសាសន៍ប្រាប់ “កម្ពុជាថ្មី” នៅថ្ងៃទី២៦ ខែតុលានេះថា ការពង្រីកវិសាលភាពនេះត្រូវ អាស្រ័យលើស្ថានភាពជំងឺកូវីដ-១៩ ចំនួន២គឺ ភូមិសាស្រ្តដែលអាចគ្រប់គ្រងជំងឺកូវីដ-១៩បាន និងភូមិសាស្រ្តដែលមានហានិភ័យមធ្យម និងខ្ពស់ ដោយបន្តអនុវត្តគោលការណ៍ប្រតិបត្តិស្តង់ដាររបស់ក្រសួងអប់រំ យុវជន និងកីឡា ចុះថ្ងៃទី០៤ ខែសីហា ឆ្នាំ២០២០ ស្របតាមវិធានការសុខាភិបាល។
លោក រស់ សុវាចា មានប្រសាសន៍បន្ថែមថា៖ “ខ្ញុំសូមអនុញ្ញាតគោរពផ្ញើរសារ៣ចំណុចជូនគ្រប់ភាគីពាក់ព័ន្ធ ជាពិសេសមាតាបិតា និងសិស្សានុសិស្សដូចខាងក្រោម÷
១. ក្រសួងអប់រំ យុវជន និងកីឡាសូមគោរពថ្លែងអំណរគុណជូនចំពោះ បុគ្គលិកអប់រំ គណៈគ្រប់គ្រងគ្រឹះស្ថានសិក្សា លោកគ្រូ អ្នកគ្រូ និងគ្រប់ភាគីពាក់ព័ន្ធដែលបានចូលរួមលើកកម្ពស់ការបង្រៀន និងរៀនមុន និងក្នុងបរិបទកូវីដ-១៩។
២. ក្រសួងអប់រំ យុវជន និងកីឡា សូមអំពាវនាវដល់មាតាបិតាសិស្សានុសិស្ស មេត្តាបន្តជួយដំណើរការរៀនសូត្រតាមគន្លងជីវិតថ្មី នៃវិស័យអប់រំក្រោយថ្ងៃ០១ ខែវិច្ឆិកា ឆ្នាំ២០២១។ ខ្ញុំយល់ច្បាស់ពីគ្រាដ៏លំបាកមួយនេះ ដែលទាមទារឱ្យបន្តមានការជួយជ្រោមជ្រែងពីមាតាបិតា។
៣. សូមមាតាបិតាចូលរួមក្នុងគណៈកម្មការគ្រប់គ្រងសាលារៀន ដើម្បីសហការផ្ដល់ព័ត៌មាន។ សូមមាតាបិតាបន្តលើកទឹកចិត្ត និងជួយសិស្សានុសិស្សឱ្យអនុវត្តលំហាត់ និងរៀនបន្ថែមនៅផ្ទះ។ សូមមាតាបិតារៀបចំចំណីអាហារ និងទឹកឱ្យកូនយកមកសាលារៀន។ សូមក្មួយតូចៗ ញ៉ាំឱ្យគ្រប់ គេងឱ្យគ្រាន់ ទឹកឱ្យក្រែល។ សូមបងប្អូនចាំថា ចាក់វាក់សាំងហើយ ចូរកុំកន្តើយ ត្រូវកៀកកើយ ៣កុំ៣ការពារ”។
លោក រស់ សុវាចា បានបញ្ជាក់បន្ថែមថា ក្រសួងអប់រំ យុវជន និងកីឡាគាំទ្ររាជរដ្ឋាភិបាល ក្នុង ការណែនាំឱ្យស្ថាប័នរដ្ឋ និងឯកជន ធ្វើតេស្តររហ័សរកមេរោគកូវីដ-១៩ ជូនបុគ្គលិក របស់ខ្លួនក្រោយឈប់សម្រាកថ្ងៃបុណ្យភ្ជុំ។ ក្រសួងអប់រំ យុវជន និងកីឡា លើកទឹកចិត្តគ្រឹះស្ថានសិក្សាសាធារណៈ និងឯកជន រួមទាំងបុគ្គលិកអប់រំ លោកគ្រូ អ្នកគ្រូ ធ្វើ តេស្តរហ័ស ក្រោយឈប់សម្រាកថ្ងៃបុណ្យភ្ជុំ តាមធនធាន និងលទ្ធភាពជាក់ស្តែង ក្រោមកិច្ចសហការជាមួយគ្រប់ភាគីពាក់ព័ន្ធ ដើម្បីបន្តចូលរួមជាមួយរាជរដ្ឋាភិបាលក្នុងការបង្ការ គ្រប់គ្រង និងទប់ស្កាត់ ការឆ្លងរីករាលដាល នៃជំងឺកូវីដ-១៩៕
អត្ថបទ៖ ច័ន្ទ វីរៈ
-
កីឡា១ សប្តាហ៍ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៦ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
ព័ត៌មានអន្ដរជាតិ១ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
ព័ត៌មានជាតិ៧ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៦ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៧ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ១ សប្តាហ៍ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង
-
ព័ត៌មានអន្ដរជាតិ១ សប្តាហ៍ ago
ថ្ងៃពិសេសកូនប្រុសម្ដង ភរិយាសេដ្ឋី Ambani ពាក់គ្រឿងអលង្ការតម្លៃ ៦៦.៥ លានដុល្លារបង្អួតភ្នែកមហាជន