សម្ដេចតេជោ ហ៊ុន សែន អបអរ អ្នកចាក់វ៉ាក់សាំងកូវីដ-១៩ ទី ១០លាន នាំកម្ពុជាសម្រេច ១០០%

នៅរាត្រីថ្ងៃទី៣១ ខែតុលា ឆ្នាំ២០២១នេះ សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណចក្រកម្ពុជា បានបង្ហោះសារលើ ទំព័រហ្វេសប៊ុកថា នៅថ្ងៃនេះ កម្ពុជាយើងបានចាក់វ៉ាក់សាំង​ការពារកូវីដ-១៩ បាន ១០លាន៨៨នាក់រួចហើយ គឺស្មើនឹងជាង ១០០% នៃប្រជាពលរដ្ឋ ១០លាននាក់ ដែលត្រូវចាក់វ៉ាក់សាំង។ នេះជាជោគជ័យធំធេងណាស់នៅក្នុងក្របខ័ណ្ឌនៃខឿនការពារសុខភាពរបស់ប្រជាជនយើង។

សម្ដេចតេជោ បានអបអរសាទរ និងបានបង្ហាញថា អ្នកបានចាក់វ៉ាក់សាំងបង្ការកូវីដ-១៩ លេខរៀងទី ១០លាន គឺបានទៅលើអ៊ំស្រីឈ្មោះ សុខ ផាត់ អាយុ៨៩ឆ្នាំ រស់នៅភូមិទ្រាំង សង្កាត់ស្លក្រាម ក្រុងសៀមរាប ខេត្តសៀមរាប។ លោកស្រី ឱ វណ្ណឌីន នឹងនាំយកជំនួយថវិកា ១០លានរៀល ព្រមទាំងសម្ភារៈផ្សេងៗទៀតទៅប្រគល់ជូនដោយផ្ទាល់។

ជាមួយគ្នានេះ សម្ដេចតេជោ ហ៊ុន សែន លើកឡើងថា ទោះបីយើងចាក់វ៉ាក់សាំងបានជាង ១០លាននាក់ ស្មើនឹងជាង ១០០% នៃចំនួនគ្រោងដំបូងក៏ដោយ ក៏យើងនៅមានប្រជាជនរាប់ម៉ឺននាក់ទៀតដែលមិនទាន់បានចាក់វ៉ាក់សាំង ដែលយើងត្រូវបន្តចាក់វ៉ាក់សាំងជូនឱ្យបានគ្រប់ៗគ្នា។

ក្រៅពីប្រជាជនដែលមានអាយុ ១៨ឆ្នាំឡើងចំនួនជាង ១០ លាននាក់បានចាក់វ៉ាក់សាំង យើងក៏បានចាក់វ៉ាក់សាំងជូនកុមារ និងយុវជនអាយុពី ១២ ទៅ ១៨ឆ្នាំ បានចំនួន ១.៧៨៨.៨០២នាក់ ដែលស្មើនឹង ៩៧.៨៩% និងកុមារអាយុពី ៦ ដល់ ១២ឆ្នាំបានចំនួន ១.៩២០.៥៩៩នាក់ ស្មើនឹង ១០១.២២%។ គិតសរុប យើងបានចាក់វ៉ាក់សាំងជូនជនរួមជាតិយើងចំនួន ១៣.៧០៩.៤៨៧នាក់ ស្មើនឹង ៨៥.៦៨% នៃប្រជាជនសរុប១៦លាននាក់។

សម្ដេចតេជោ នាយករដ្ឋមន្ត្រី​ មានប្រសាសន៍បន្តថា កិច្ចការបន្តរបស់យើងគឺត្រូវបញ្ចប់ការចាក់ដូសទី២ សម្រាប់អ្នកដែលបានចាក់ដូសទី១ និងបន្តចាក់ជូនប្រជាជនដែលមិនទាន់បានចាក់វ៉ាក់សាំងដូសទី១។ វាកាន់តែសំខាន់ជាងនេះទៀត គឺយើងត្រូវតែបន្តការខិតខំចាក់វ៉ាក់សាំងដូសទី៣ ជូនប្រជាជនយើងឱ្យខាងតែបាន ដែលមកដល់ពេលនេះ យើងមានវ៉ាក់សាំងក្នុងដៃប្រមាណជិត ១០លានដូស និងមានមនុស្សបានចាក់វ៉ាក់សាំងដូសទី៣ ប្រមាណជិត ២លាននាក់ រួចមកហើយ។ វ៉ាក់សាំងនឹងមកដល់ជាបន្តបន្ទាប់ទៀត។

សម្ដេចតេជោ បញ្ជាក់បន្ថែមថា ថ្ងៃស្អែក ទី១ ខែវិច្ឆិកា ឆ្នាំ២០២១ យើងនឹងចាប់ផ្តើមចាក់ជូនកុមារអាយុ៥ឆ្នាំ ដែលមានជាង ៣០ម៉ឺននាក់បន្តទៀត។ ជាមួយនឹងការកោតសសើរ និងថ្លែងអំណរគុណចំពោះគ្រប់តួអង្គពាក់ព័ន្ធ ដែលបានចូលរួមក្នុងយុទ្ធនាការចាក់វ៉ាក់សាំងការពារកូវីដ-១៩ សម្ដេចសូមអំពាវនាវបងប្អូនជនរួមជាតិ បន្តអនុវត្តវិធានការការពារតាមការណែនាំរបស់ក្រសួងសុខាភិបាល ពិសេសវិធានការ ៣ការពារ និង៣កុំ ព្រោះថាវ៉ាក់សាំងតែមួយមុខ បើទោះបីចាក់បានប៉ុន្មានដូស រហូតមុជវ៉ាក់សាំង ក៏មិនអាចការពារបានដែរ ប្រសិនជាបងប្អូនធ្វេសប្រហែសបោះបង់ចោលវិធីការពារខ្លួនតាមរយៈវិធានការ ៣ការពារ និង៣កុំ៕

អត្ថបទ៖ ច័ន្ទ វីរៈ