លោកទេសរដ្ឋមន្ត្រី លី ធុជ អរគុណទឹកចិត្តសប្បុរសជនសមាគមចិន ចូលរួមចំណែកការងារមនុស្សធម៌

នៅព្រឹកថ្ងៃទី ៤ ខែវិច្ឆិកា ឆ្នាំ២០២១ ឯកឧត្តមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានទទួលជួប​គណ:ប្រតិភូ​ចិន ដឹកនាំដោយព្រះតេជគុណ ចាង ស៊ីន ក្នុងពិធីប្រគល់-ទទួលអំណោយរបស់សមាគមពុទ្ធសាសនិកកម្ពុជា-ចិន និងសមាគមអ្នកស្រាវជ្រាវវឌ្ឍនភាពកម្ពុជា-ចិន ជូនអាជ្ញាធរមីន សម្រាប់ការចូលរួមចំណែកការងារមនុស្សធម៌ និងការងារប្រយុទ្ធប្រឆាំងនឹងកូវីដ-១៩ នៅក្រុងបាវិត ខេត្តស្វាយរៀង។

ក្នុងនាមរាជរដ្ឋាភិបាលកម្ពុជា លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានវាយតម្លៃខ្ពស់ចំពោះទំនាក់ទំនងជាប្រវត្តិសាស្រ្តរវាងប្រទេសកម្ពុជា និងសាធារណរដ្ឋប្រជាមានិតចិន ហើយបានចាត់ ទុកប្រទេសចិន ជាមិត្តដ៏ល្អ និងមានកិច្ចសហប្រតិបត្តិការយ៉ាងជិតស្និទ្ធជាមួយកម្ពុជា។

ក្នុងឱកាសនោះ ក្នុងនាមសម្តេចតេជោ នាយករដ្ឋមន្រ្តី និងជាប្រធានអាជ្ញាធរមីន លោកទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន បានថ្លែងអំណរគុណចំពោះទឹកចិត្តសប្បុរសរបស់គណ:ប្រតិភូចិន ដឹកនាំដោយព្រះតេជគុណ Zhao Xin ដែលបានឧបត្តម្ភជូន អង្ករ ២៥គីឡូ ចំនួន៥០បាវ អាកុល ចំណុះ ៣០លីត្រ ចំនួន៥កាន និងម៉ាសចំនួន ១៥០០០ បន្ទះ ចូលរួមចំណែកជាមួយរាជរដ្ឋាភិបាលកម្ពុជា ដើម្បីជួយប្រជាជនក្រីក្រនៅខេត្តស្វាយរៀង។

ជាមួយគ្នានេះ ក្នុងពិធីប្រគល់-ទទួល លោកទេសរដ្ឋមន្រ្តី ក៏បានអនុញ្ញាតឱ្យអ្នកវិនិយោគទុនចិន និងសមាគមចិន ចូលជួបសម្តែងការគួរសម និងពិភាក្សាការងារស្វែងយល់អំពីកម្ពុជា៕