តើ សម្ដេចតេជោ ហ៊ុន សែន ប្រកាសបើកការជួបជុំអ្វីខ្លះបន្ថែមទៀត?

សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នៅមុនបន្តិចនេះ ទើបប្រកាសបើកការជួបជុំផ្សេងៗបន្ថែមទៀត បន្ទាប់ពីការអនុញ្ញាតនូវការចូលរួមក្នុងពិធីមង្គលការ និង ពិធីសាសនាផ្សេងៗ។

សម្ដេចតេជោ ហ៊ុន សែន បានប្រកាសលើ ទំព័រហ្វេសប៊ុកផ្លូវការថា៖ “បងប្អូនជនរួមជាតិទាំងអស់ជាទីគោរពស្រឡាញ់!បន្ថែមលើសារសំឡេងដែលខ្ញុំទើបបានបញ្ចេញមុននេះ ពាក់ព័ន្ធនឹងការអនុញ្ញាតនូវការចូលរួមក្នុងពិធីមង្គលការ និង ពិធីសាសនាផ្សេងៗ ដោយមិនកំណត់ចំនួនមនុស្ស តែត្រូវគោរពហ្មត់ចត់តាមវិធានការពារសុវត្ថិភាព ស្របតាមការកំណត់របស់ក្រសួងសុខាភិបាល និង អាជ្ញាធរមានសមត្ថកិច្ចពាក់ព័ន្ធ ដើម្បីបង្ការនូវការឆ្លងរាលដាលនៃជម្ងឺកូវីដ-១៩”។

សម្ដេចតេជោ បានបញ្ជាក់បន្ថែមថា ការជួបជុំដោយមិនកំណត់ចំនួនមនុស្សចូលរួម តែត្រូវគោរពតាមវិធានសុខាភិបាល ដើម្បីការពារសុវត្ថិភាពពីការឆ្លងរាលដាលនៃជំងឺកូវីដ-១៩ នេះ ក៏ត្រូវបានអនុញ្ញាតដូចគ្នាដែរ សម្រាប់ការជួបជុំជាទូទៅផ្សេងទៀត ដើម្បីបំពេញការងារ ឬ ធ្វើសកម្មភាព និង ប្រារព្ធពិធីផ្សេងៗ។

សម្ដេចមានប្រសាសន៍បន្តថា៖ “រួមមាន ការជួបជុំរបស់ប្រជាពលរដ្ឋ, យុវជន សិស្ស និង និស្សិត, កម្មករ-និយោជិត, ក៏ដូចជាការជួបជុំរបស់មន្ត្រីរាជការ និង កងកម្លាំងប្រដាប់អាវុធ រួមបញ្ចូលទាំងការជួបជុំស្របតាមច្បាប់អនុញ្ញាត ដែលរៀបចំឡើងដោយគណបក្សនយោបាយនានាផងដែរ ។ សូមអរគុណ!”។

គួរបញ្ជាក់ថា នៅរសៀលមុននេះ ប្រមុខរាជរដ្ឋាភិបាលកម្ពុជាសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាបានប្រកាសជាថ្មីក្នុងការបើកទូលាយជាងមុនសម្រាប់ ប្រជាពលរដ្ឋរៀបចំអាពាហ៍ពិពាហ៍ ដោយលែងកំណត់ចំនួនមុនស្ស តែត្រូវផ្អែកទៅលើទំហំទីតាំង និង គម្លាតសុវត្តិភាព ដែលជាវិធានរបស់ក្រសួងសុខាភិបាលគឺបាន កំណត់១ តុ ចំនួន ៧ នាក់។ នៅក្នុងសារតាមប្រព័ន្ធតេលេក្រាមរយៈពេលប្រមាណ ១៥ នាទី សម្រាប់ជនរួមជាតិ និងសាសនិកគ្រប់សាសនានៅកម្ពុជា សម្តេចតេជោ ហ៊ុន សែន បានលើកឡើងថា កាលពីប៉ុន្មានថ្ងៃមុនសម្តេចបានប្រកាសថាឱ្យមានការរៀបចំអាពាហ៍ពិពាហ៍ដែលកំណត់មនុស្សយ៉ាងច្រើន ២០០ នាក់ដោយមិនគិត អ្នកផ្ដល់សេវាផ្សេងៗ។ ប៉ុន្តែក្រោយពីការពិនិត្យឡើងវិញបើការកំណត់បែបនេះគឺមិនសមស្របនោះទេ គឺយើងយកស្តង់ដារនៃការអនុវត្តតាមវិធានសុខាភិបាលមកប្រើគម្លាតដែលត្រូវដាក់មួយតុចំនួន ៧ នាក់ ប្រសិនបើមានទីតាំងធំអ្នកម្ចាស់ដើមការអាចអញ្ជើញភ្ញៀវទៅតាមចំនួនដែលអាចធ្វើបាន អាចអញ្ជើញ ៥00 នាក់ ៧00 នាក់ ឬ ១០០០ នាក់ ប៉ុន្តែត្រូវតែធានាចាំបាច់នៅការរក្សានូវគម្លាតនៅតាមតុ ទៅតាមទីកន្លែងធ្វើ៕

អត្ថបទ៖ ច័ន្ទ វីរៈ