ស្ត្រីមានផ្ទៃពោះ ហើយវិជ្ជមានកូវីដម្នាក់ ត្រូវបានក្រុមគ្រូពេទ្យ ជួយសម្រាលកូនដោយជោគជ័យ

ស្ត្រីមានផ្ទៃពោះម្នាក់ ហើយវិជ្ជមានជំងឺកូវីដ-១៩ ហើយត្រូវបានក្រុមគ្រូពេទ្យ ជួយសម្រាលដោយសុវត្ថិភាព ទាំងម្តាយ និងកូន។ បើតាមរបាយការណ៍ របស់មន្ទីរពេទ្យស្រុកបរកែវ បានឲ្យដឹងថា នៅព្រឹកថ្ងៃទី ២១ ខែវិច្ឆិកា ឆ្នាំ ២០២១ ស្រ្តីរូបនេះ បានឈឺពោះគ្រប់ខែ ហើយមកទទួលសេវាសម្រាល នៅមន្ទីរពេទ្យបរកែវ និងបានធ្វើតេស្តរហ័សឃើញវិជ្ជមាន​កូវីដ-១៩។

ភ្លាមៗ ក្រុមគ្រូពេទ្យបានជួយអន្តរាគមន៍សម្រាល យ៉ាងយកចិត្តទុកដាក់ ធ្វើឲ្យការសម្រាលទទួលបានជោគជ័យ សុខសុវត្ថិភាព ទាំងម្តាយ និងកូន ហើយទារកដែលទើបសម្រាល មានទម្ងន់ ២គីឡូ ៧ខាំ ជាកូនទី ៣របស់ស្រ្តីរូបនេះ។

សូមជម្រាបថា ដោយមានការគិតគូរ យកចិត្តទុកដាក់ពីសំណាក់លោក ញ៉ែម សំអឿន អភិបាលខេត្តរតនគិរី បានណែនាំឲ្យមន្ទីរសុខាភិបាលខេត្ត ក៏ដូចជាសេវាសុខាភិបាលតាមមូលដ្ឋានក្រុង-ស្រុក ទាំង ៩ក្នុងខេត្ត ត្រូវផ្តោតការយកចិត្តទុកដាក់ ចំពោះស្រ្តីមានផ្ទៃពោះ បើសិនរកឃើញថា ពួកគាត់មានផ្ទុកជំងឺកូវីដ-១៩ មិនត្រូវឲ្យពួកគាត់សម្រាកព្យាបាល នៅមណ្ឌលព្យាបាលជំងឺកូវីដ-១៩ទេ គឺដាច់ខាតត្រូវយកពួកគាត់ មកសម្រាកព្យាបាលនៅមន្ទីរពេទ្យ រឺមណ្ឌលសុខភាពងាយស្រួលព្យាបាល និងជួយពួកគាត់បានទាន់ពេលវេលា ប្រសិនបើមានករណីឆ្លងទន្លេក្នុងអំឡុងព្យាបាលជំងឺកូវីដ-១៩។

ជាក់ស្តែងគិតត្រឹមថ្ងៃទី ២១ ខែវិច្ឆិកាឆ្នាំ ២០២១នេះ មាន ៥០ករណីហើយ ដែលស្រ្តីមានផ្ទៃពោះផ្ទុកជំងឺកូវីដ-១៩ នៅមន្ទីរពេទ្យបង្អែកខេត្ត មន្ទីរពេទ្យស្រុកបរកែវ និងតាមមណ្ឌលព្យាបាលកូវីដ-១៩ ត្រូវបានក្រុមគ្រូពេទ្យជួយសម្រាលកូន ដោយសុខសុវត្ថិភាព ទាំងម្តាយ និងកូន។ នេះបើតាមការបញ្ជាក់ពីវេជ្ជបណ្ឌិត អ៊ុង រតនា ទីប្រឹក្សាក្រសួងសុខាភិបាល និងប្រធានមន្ទីរសុខាភិបាលខេត្តរតនគិរី ឲ្យដឹងតាមទូរស័ព្ទ នាព្រឹកថ្ងៃទី ២១ ខែវិច្ឆិកា ឆ្នាំ២០២១៕  

អត្ថបទ៖ វុទ្ធ ឦសាន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត