អភិបាលខេត្តកំពង់ចាមប្រគល់ថវិកា ៥៦​ម៉ឺនដុល្លារសម្រាប់កែលម្អ​វិស័យសុខាភិបាល​នៅស្រុកចំនួនបី

កំពង់ចាម ៖  លោក  អ៊ុន  ចាន់ដា  អភិបាលខេត្តកំពង់ចាម ដឹកនាំក្រុមការងារ ប្រគល់ថវិកាចំនួន ៥៦ម៉ឺនដុល្លារ ដល់គម្រោងកែលម្អមន្ទីរពេទ្យបង្អែក ដែលថវិកាទាំងនេះ ជាជំនួយរបស់សមាគមសាសនាចក្រ នៃព្រះយេស៊ូគ្រីស្ត ស្ថិតនៅក្នុងស្រុកចំនួន ៣ គឺស្រុកជើងព្រៃ ស្រុកស្រីសន្ធរ និងស្រុកកងមាស ដើម្បីគ្រប់គ្រងចាត់ចែងតាមតម្រូវការសុខាភិបាល។

ថវិកាទាំងនេះ បានបែងចែកដូចខាងក្រោម៖

១.មន្ទីរពេទ្យបង្អែក  ស្រុកជើងព្រៃ  មានទំហំទឹកប្រាក់ចំនួន ២២១.៩៣៣,៦៩ដុល្លារ (ពីររយម្ភៃមួយពាន់ ប្រាំបួនរយសាមសិបបីដុល្លារ និងហុកសិបប្រាំបួនសេន) ក្នុងនោះ ការកែលម្អអគារ សំណង់ហេដ្ឋារចនាសម្ព័ន្ធ គិតជាថវិកាចំនួន ១៥៩,៩០៩.៧៩ដុល្លារ (មួយរយហាសិបប្រាំបួនពាន់ប្រាំបួនរយប្រាំបួនដុល្លារ និងចិតសិបប្រាំបួនសន) ។ ចំណែកការបំពាក់សម្ភារបរិក្ខាបម្រើឲ្យមន្ទីរពេទ្យ ចំនួន ៣៤មុខ ស្មើនឹង ១៨៤គ្រឿង ។

២.មន្ទីរពេទ្យ បង្អែក ស្រុកស្រីសន្ធរ មានទំហំទឹកប្រាក់ចំនួន ២៦០.៥៩៩,៧៧ដុល្លារ ដោយធ្វើការកែលម្អអគារ និងសំណង់ហេដ្ឋារចនាសម្ព័ន្ធ និងបំពាក់សម្ភារបរិក្ខាបម្រើឲ្យមន្ទីរពេទ្យ ចំនួន ៣០មុខ ស្មើនឹង ៥៩គ្រឿង ។

៣.មន្ទីរពេទ្យបង្អែកស្រុកកងមាស មានទំហំទឹកប្រាក់ចំនួន ៧៥.៣៥៨ដុល្លារ មានដូចខាង សម្រាប់កែលម្អអគារ សំណង់ហេដ្ឋារចនាសម្ព័ន្ធ និងបំពាក់សម្ភារៈ បរិក្ខារបម្រើឲ្យមន្ទីរពេទ្យ ចំនួន ១មុខ ស្មើនឹង ១គ្រឿង ។

លោក  អ៊ុន  ចាន់ដា  អភិបាលខេត្តកំពង់ចាម  បានថ្លែងអំណរគុណ ចំពោះសមាគមនិកាយសាសនាចក្រ នៃព្រះយេស៊ូវគ្រីស្ទ ដែលតែងតែសហការល្អ និងគាំទ្រដល់រដ្ឋបាល ខេត្តកំពង់ចាម នាពេលកន្លងមក ។ ជាក់ស្តែង ថ្ងៃនេះ សមាគមនិកាយសាសនាចក្រ បានគាំទ្រដល់វិស័យសុខាភិបាល នៅក្នុងខេត្តតាមរយៈការជួយកែលម្អអគារ និងសំណង់ហេដ្ឋារចនាសម្ព័ន្ធ បំពាក់សម្ភារបរិក្ខាពេទ្យ បម្រើឲ្យមន្ទីរពេទ្យបង្អែកស្រុកទាំង ៣ ខាងលើ  សម្រាប់បម្រើសេវា ដល់ប្រជាពលរដ្ឋ នៅក្នុងតំបន់ ក៏ដូចជាប្រជាពលរដ្ឋទូទៅផងដែរ៕ អត្ថបទ និងរូបភាព៖ ហុង ម៉េង ហៀ