រដ្ឋាភិបាលត្រៀមថវិកា ២៥០លានដុល្លារ​សម្រាប់ជួយសហគ្រាសធុនតូច និងមធ្យម​នៅឆ្នាំ ២០២២

រាជរដ្ឋាភិបាល បានត្រៀមថវិកាប្រមាណ ២៥០លានដុល្លារ សម្រាប់ជួយដល់សហគ្រាសធុនតូច និងធម្យម(SMEs) នៅឆ្នាំ ២០២២ ទាំងនៅក្នុងវិស័យកសិកម្ម និងមិនមែនកសិកម្ម ដើម្បីជំរុញកំណើនសេដ្ឋកិច្ចជាតិ។ នេះបើតាមការបញ្ជាក់របស់លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ នៅក្នុងសន្និសីទព័ត៌មានស្តីពី៖«យុទ្ធសាស្ត្រស្តារ និងជំរុញកំណើនសេដ្ឋកិច្ចកម្ពុជា ក្នុងការរស់នៅជាមួយជំងឺកូវីដ-១៩ តាមគន្លងប្រក្រតីភាពថ្មី» កាលពីថ្ងៃទី១៤ធ្នូ ឆ្នាំ២០២១។

លោក ផាន់ ផល្លា បានលើកឡើងទៀតថា ធនាគារ SMEs ក៏មានកម្មវិធីកម្ចីប្រាក់ចំនួន៣ ក្នុងនោះ ទី១ សម្រាប់សហគ្រាសធុនតូច និងមធ្យម ដែលមានថ្នាក់ដឹកនាំជាស្រ្តី គឺទទួលបានការប្រាក់ទាប ៥,៥%, ទី២គឺសម្រាប់វិស័យឌីជីថល ក៏ទទួលបានកម្ចីដែលមានការប្រាក់ទាប និងទី៣ វិស័យនៅក្នុងអទិភាព ដូចជា វិស័យកសិឧស្សាហកម្មជាដើម។

មន្រ្តីជាន់ខ្ពស់ក្រសួងសេដ្ឋកិច្ច រូបនេះ សង្កត់ធ្ងន់ថា ការគាំទ្រផ្នែកហិរញ្ញវត្ថុដល់SMEsនេះ រដ្ឋនឹងជំរុញធនាគារពាណិជ្ជ និងគ្រឹះស្ថានមីក្រូហិរញ្ញត្ថុ ឲ្យបន្តក្នុងការផ្តល់ឥណទានដល់អាជីវកម្ម និងធុរកិច្ច តាមរយៈការកែសម្រួលលក្ខខណ្ឌនានា របស់សាជីវកម្មធានាឥណទានកម្ពុជា ដោយធានានូវភាពងាយស្រួលរបស់វិស័យឯកជនក្នុងការទទួលបានកម្ចីពីរដ្ឋាភិបាល។ បើតាមលោក ផាន់ ផល្លា នៅក្នុងកាលៈទេសៈនេះ កម្ពុជា នៅមានថវិកាជាតិ សម្រាប់ទ្រទ្រង់សេដ្ឋកិច្ចឡើងវិញ ដោយសារមើលឃើញថា ការប្រមូលពន្ធលើសផែនការដែលបានកំណត់។

ជាក់ស្តែងអគ្គនាយកដ្ឋានពន្ធដារ ប្រមូលពន្ធបានចំនួន ២,៥៦០.១២លានដុល្លារអាមេរិក រយៈពេល១១ ខែឆ្នាំនះ ស្មើនឹង១១៤.១៣% នៃផែនការច្បាប់ហិរញ្ញវត្ថុសម្រាប់ការគ្រប់គ្រង ឆ្នាំ២០២១។

នៅក្នុងសេចក្តីប្រកាសព័ត៌មានកាលពីរសៀលថ្ងៃទី ១៣ ខែធ្នូ ក្នុងកិច្ចប្រជុំបូកសរុបលទ្ធផលប្រមូលចំណូលពន្ធប្រចាំខែវិច្ឆិកា និងសម្រាប់រយៈពេល ១១ខែ ឆ្នាំ២០២១ ព្រមទាំងទិសដៅសម្រាប់អនុវត្តបន្ត របស់អគ្គនាយកដ្ឋានពន្ធដារ លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានបង្ហាញថា ក្នុងខែវិច្ឆិកា ឆ្នាំ២០២១ ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារប្រមូលបាន (តាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ) មានចំនួន ៩៩០.២៩ ប៊ីលានរៀល (ប្រមាណជា ២៤៤.៥២ លានដុល្លារអាមេរិក) ស្មើនឹង ១០.៩០% នៃផែនការច្បាប់ហិរញ្ញវត្ថុសម្រាប់ការគ្រប់គ្រងឆ្នាំ ២០២១។

លោកថា បើប្រៀបធៀបនឹងចំណូលពន្ធ-អាករប្រចាំខែវិច្ឆិកា ឆ្នាំ២០២០ គឺកើនឡើងចំនួន ៤៩.៣១ ប៊ីលានរៀល (ប្រមាណជា ១២.១៧ លានដុល្លារអាមេរិក) ស្មើនឹង ៥,២៤%៕ ទួន សុផល