ហេតុអ្វី ការចាក់វ៉ាក់សាំង ដូសទី ៤ មានតែនៅភ្នំពេញ មិនមានតាមបណ្ដាខេត្ត?

លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំង​កូវីដ-១៩ មានប្រសាសន៍ប្រាប់ “កម្ពុជាថ្មី” ថា មន្ត្រី និងគ្រួពេទ្យជួរមុខ ក៏ដូចជាប្រពលរដ្ឋអាយុចាប់ពី ៦០ ឆ្នាំឡើងទៅ បានទទួលវ៉ាក់សាំងកូវីដ-១៩ ដូសទី ៤ ធ្វើនៅតែក្របខណ្ឌរាជធានីភ្នំពេញសិនទេ ដោយសារវ៉ាក់សាំងប្រើប្រាស់សម្រាប់ដូសទី ៤ នេះមិនអាចបញ្ជូនទៅថ្នាក់ខេត្តក្នុងដំណើរផ្លូវឆ្ងាយបានទេ។

លោកស្រីវេជ្ជបណ្ឌិត ឱ វណ្ណឌីន មានប្រសាសន៍បន្តថា កម្ពុជាមិនទាន់ទទួលបានទូប្រព័ន្ធត្រជាក់ត្រឹមត្រូវតាមលក្ខណៈបច្ចេកទេសដែលអាចចល័ត ឬយកទៅតាមបណ្ដាខេត្តបាន ខណៈអង្គការយូនីសេហ្វ កំពុងផ្គត់ផ្គង់ផ្ដល់ជាជំនួយដល់កម្ពុជា ដែលជាជំនួយរបស់ប្រទេសអូស្ត្រាលី។

ប្រធានគណៈកម្មការចំពោះកិច្ចចាក់វ៉ាក់សាំងកូវីដ-១៩ រូបនេះបញ្ជាក់ថា៖ “តាមពិតទូប្រព័ន្ធត្រជាក់ចល័តសម្រាប់ដាក់វ៉ាក់សាំងនេះត្រូវមកដំណាលគ្នាជាមួយវ៉ាក់សាំង Pfizer តែដោយសារវ៉ាក់សាំងបានមកដល់មុន។ ដូច្នេះហើយ តាមការសម្រេចចិត្ត និងភាពឆ្លាតវៃរបស់សម្ដេចតេជោ លោកបានអនុញ្ញាតឱ្យផ្ដល់វ៉ាក់សាំងកូវីដ-១៩ ដូសទី ៤ តែនៅក្របខណ្ឌរាជធានភ្នំពេញសិនទេ ដើម្បីកុំឱ្យមានការខូចខាតនូវវ៉ាក់សាំង ដោយសារវ៉ាក់សាំងនេះ យើងទទួលបានជំនួយជាង ៣ លាន ២ សែន ដូសប៉ុណ្ណោះ”។

គួរបញ្ជាក់ថា កម្ពុជា បានចាប់ផ្ដើមចាក់វ៉ាក់សាំងដូសទី ៤ ចាប់ពីថ្ងៃទី ១៤ ខែមករា ឆ្នាំ ២០២២ នេះ។ គិតត្រឹមថ្ងៃទី ១៧ ខែមករា ម្សិលមិញនេះ កម្ពុជាមានអ្នកទទួលវ៉ាក់សាំងដូសទី ៤ ចំនួន ៩៥ ៧៨៣ នាក់ ក្នុងនោះ មានស្ត្រីចំនួន ៤៤ ៤៣៨ នាក់។

គួររំលឹកថា កាលចុងឆ្នាំ ២០២១ កន្លងទៅថ្មីៗនេះ រដ្ឋាភិបាលអូស្ត្រាលីផ្តល់ផ្តល់វ៉ាក់សាំង Pfizer ចំនួន ២,៣៥ លានដូសដល់រាជរដ្ឋាភិបាលកម្ពុជា។ វ៉ាក់សាំង Pfizer ត្រូវបានដឹកទៅទុកនៅឃ្លាំងកណ្ដាលទាំងអស់ ដោយសារវ៉ាក់សាំងនេះត្រូវការស៊ីតុណ្ហភាពត្រជាក់ខ្លាំង ដក ​​​៨០ អង្សាសេ។ កម្ពុជាមានទូរក្សាវ៉ាក់សាំង ដែលអាចរក្សាសីតុណ្ហភាពត្រជាក់រហូតដល់ ដក ៩០ អង្សាសេ៕

អត្ថបទ៖ ច័ន្ទ វីរៈ