ពលរដ្ឋជាប់សែចិនសម្រុកទិញជ្រូកខ្វៃសែន ខណៈអ្នកលក់ខ្លះធ្វើលែងទាន់​បដិសេធការកុម្ម៉ង់

អ្នកលក់ជ្រូកខ្វៃមួយចំនួន បានបដិសេធក្នុងការទទួលកម្មង់ខ្វៃជ្រូកនៅថ្ងៃនេះ ដោយសារការកម្មង់មានចំនួនច្រើន ធ្វើមិនទាន់ឲ្យអតិថិជន ខណៈដែលកូនខ្មែរជាប់សែស្រឡាយចិន រៀបចំពិធីសែន ជ្រូក មាន់ ទាខ្វៃយ៉ាងច្រើនកុះករ។

អ្នកខ្វៃជ្រូកលក់ នៅរាជធានីភ្នំពេញ បានអះអាងថា ឆ្នាំនេះ តម្រូវការជ្រូកខ្វៃមានការកើនឡើងខ្ពស់។ អ្នកស្រី ធូ សុភាព ម្ចាស់ហាងជ្រូកខ្វៃចិនខ្មៅ បានប្រាប់កម្ពុជាថ្មីថា ថ្ងៃសែនចូលឆ្នាំចិន ឆ្នាំនេះ មានអ្នកកម្មង់ជ្រូកខ្វៃយកទៅសែនចំនួន ៥០០ ទៅ ៦០០ក្បាល រយៈពេល២ថ្ងៃ គឺថ្ងៃទី ៣០-៣១ ខែមករា នេះ។ អ្នកស្រីបន្តថា ជ្រូកខ្វៃដែលពេញនិយម សម្រាប់សែនចូលឆ្នាំចិន មានទម្ងន់ក្រោម ១៣គីឡូក្រាម ក្នុងនោះ ទំហំពី ៤-៥គីឡូ មានការកម្មង់ទិញច្រើនជាងគេ។

​ចំពោះតម្លៃអ្នកស្រី សុភាព បានឲ្យដឹងថា ជ្រូកខ្វៃទម្ងន់ ១គីឡូ តម្លៃ ៦៥,០០០រៀល។ ប៉ុន្តែចាប់ពីទម្ងន់៨-១៣ គីឡូក្រាម ម៉ៅក្នុងតម្លៃ ៦២ម៉ឺន ទៅ ៦៣ម៉ឺនរៀល ក្នុង១ក្បាល។ សព្វថ្ងៃអ្នកស្រីលក់ជ្រូកខ្វៃក្នុង១ថ្ងៃពី ១៥ក្បាល ទៅ ២០ក្បាល នៅផ្សារអូឬស្សី។​

អ្នកស្រី ធូ សុភាព បានរំឮកថា កាលពីឆ្នាំ ២០២១ ដោយសារការរីករាលដាលជំងឺកូវីដ-១៩ ទីផ្សារជ្រូកខ្វៃធ្លាក់ចុះខ្លាំង ពោលគឺរដូវកាលចូលឆ្នាំចិន លក់ចេញបានតែ ១០០ក្បាល ទៅ ២០០ក្បាលប៉ុណ្ណោះ។

ដោយឡែកអ្នកទទួលខ្វៃជ្រូកលក់មួយចំនួនទៀត បានបដិសេធការកម្មង់របស់អតិថជិន ដោយសារការបញ្ជាទិញមានចំនួនច្រើន ធ្វើមិនទាន់ឲ្យអតិថិជនក្នុងរាជធានីភ្នំពេញ។

សូមបញ្ជាក់ថា ពិធីបុណ្យចូលឆ្នាំចិន ចាប់ពីថ្ងៃទី៣១ ខែ មករា ឆ្នាំ២០២២ទៅ។ នៅក្នុងពិធីនេះ ប្រជាពលរដ្ឋខ្មែរកាត់សែស្រឡាយចិន តែងតែរៀបចំគ្រឿងរណ្តាប់សែនព្រេនជូនម្ចាស់ទឹកម្ចាស់ដី ជីដូនជីតាកុងម៉ា ក្នុងនោះ មានការរៀបចំសែនបាយសម្ល មីឆា មាន់ ទា នំពងទា ផ្លែឈើ ក្រដាសមាសប្រាក់ដុតសែន និងម្ហូបច្រើនមុខទៀត ទៅតាមគ្រួសារនីមួយៗ ហើយអ្វីដែលគេមិនសូវរំលងបាននោះគឺ «ជ្រូកខ្វៃ»។

បើតាមលោក លឹម កញ្ចរ៉ុង គ្រូបង្រៀនភាសាចិន នៅវិទ្យាស្ថានអន្តរជាតិកម្ពុជា-អាស៊ាន បានប្រាប់ព័ត៌មានក្នុងស្រុកថា ការសែនជ្រូកខ្វៃ គឺតំណាងឲ្យការរកស៊ីមានបាន ហូបឆ្អែត ហូបឆ្ងាញ់ និងគេងលក់ស្រួល ជាអ្វីដែលមនុស្សប្រាថ្នាចង់បាន។ នេះហើយដែលប្រជាជនចិន គិតថា នៅពេលដែលចូលឆ្នាំចិន សែនជ្រូកខ្វៃនឹងទទួលបានអ្វីដែលល្អៗ។ លោកបន្តថា ការសែនក៏ត្រូវតែរៀបចំឲ្យបានត្រឹមត្រូវ ពោលគឺក្បាលជ្រូក ត្រូវតែបែរចូលផ្ទះ រីឯកន្ទុយបែរចេញទៅខាងក្រៅ។ លោកថា « ជ្រូកប្រើច្រមុះរបស់វាដើម្បីកាយដី ឬកាយអ្វីមួយ… ដូច្នេះប្រជាជនចិនមានទស្សនថា នៅពេលប្រើជ្រូកយកទៅសែនចូលឆ្នាំចិន នឹងអាចនាំលាភ នាំជ័យ នាំមាស នាំប្រាក់នាំសំណាងចូលក្នុងផ្ទះយើង»។

ចំណែកកន្ទុយរបស់វា ចួលចិត្តបក់រុយ ឬបក់អ្វីដែលមិនល្អ ដូច្នេះគេយល់ឃើញថា អ្វីដែលមិនល្អ សំណាងអាក្រក់ ឧបសគ្គនានា កន្ទុយជ្រូកនេះ ជួយបក់ឲ្យចេញពីផ្ទះយើងតែម្តង៕

អត្ថបទ៖ ទួន សុផល