ក្រសួងអប់រំ ប្រកាសកាលបរិច្ឆេទប្រឡងឌីប្លូម និងប្រឡងបាក់ឌុប ឆ្នាំ ២០២២

ក្រសួងអប់រំ យុវជន និងកីឡា បានប្រកាសកាលបរិច្ឆេទនៃការប្រឡងសញ្ញាបត្រមធ្យមសិក្សាមឋមភូមិ ឬឌីប្លូមនៅថ្ងៃទី២៤ ខែតុលា និងប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅថ្ងៃទី១៤ ខែវិច្ឆិកា ឆ្នាំ២០២២ ខាងមខុនេះ។

លោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រី ក្រសួងអប់រំ យុវជន និងកីឡា បានឱ្យដឹងនៅក្នុងសេចក្តីជួនដំណឹងដែល “កម្ពុជាថ្មី” ទើបទទួលបាននៅថ្ងៃនេះថា សម្រាប់ឆ្នាំសិក្សា ២០២១‑២០២២ នេះ ក្រសួងបានកំណត់ការបរិច្ឆេទនៃការប្រឡង សញ្ញាបត្រមធ្យមសិក្សាមឋមភូមិ នៅថ្ងៃទី២៤ ខែតុលា ឆ្នាំ២០២២ និងប្រកាសលទ្ធផលប្រឡងនៅថ្ងៃទី០១ ខែវិច្ឆិកា ឆ្នាំ២០២២។ ចំណែកប្រឡងសញ្ញាបត្រមធ្យមសិក្សាទុតិយភូមិវិញ ក្រសួងនឹងរៀបចំការប្រឡងនៅថ្ងៃទី១៤ ខែវិច្ឆិកា ឆ្នាំ២០២២ និងប្រកាសលទ្ធផលប្រឡង នៅថ្ងៃទី០៧ ខែធ្នូ ឆ្នាំ២០២២។

លោករដ្ឋមន្ត្រីបានបន្តថា ចំពោះការប្រឡងឆមាសទី១ សម្រាប់ប្រឡងឌីប្លូម ក្រសួងបានណែនាំឱ្យសាលានីមួយៗរៀបចំប្រឡងនៅថ្ងៃទី១៦ ដល់ថ្ងៃទី២១ ខែឧសភា ឆ្នាំ២០២២ និងប្រឡងឆមាសទី២ ប្រឡងនៅថ្ងៃទី១២ ដល់ថ្ងៃទី១៧ ខែកញ្ញា ឆ្នាំ២០២២។

លោករដ្ឋមន្ត្រីបានបន្តទៀតថា រីឯការប្រឡងឆមាសទី១ សម្រាប់ការប្រឡងបាក់ឌុបវិញ ក្រសួងបានឱ្យសាលារៀបចំប្រឡងចាប់ពីថ្ងៃទី២៣ ដល់ថ្ងៃ២៨ ខែឧសភា ឆ្នាំ២០២២ និងប្រឡងឆមាសទី២ ចាប់ពីថ្ងៃទី០៥ ដល់ថ្ងៃទី១០ ខែកញ្ញាឆ្នាំ២០២២។

គួរបញ្ជាក់ថា សម្រាប់ឆ្នាំសិក្សា ២០២០‑២០២១ កន្លងទៅក្រសួងអប់រំ យុវជន និងកីឡា បានរៀបចំការប្រឡង្រឡងសញ្ញាបត្រមធ្យមសិក្សាបឋមភូមិ នៅថ្ងៃទី១៥ ខែវិច្ឆិកា ឆ្នាំ២០២១ និងការប្រឡងសញ្ញាបត្រមធ្យមសិក្សាទុតិយភូមិ នៅថ្ងៃទី២៧ ខែធ្នូ ឆ្នាំ២០២១៕

អត្ថបទ​៖ សំអឿន