Connect with us

ព័ត៌មានជាតិ

ក្រសួងការបរទេសច្រានចោលការចោទប្រកាន់ថា ចារកម្មកូរ៉េខាងជើងបើកសណ្ឋាគារ កាស៊ីណូ និងភ្នាក់ងារទេសចរណ៍ នៅកម្ពុជា

បានផុស

នៅ

នៅល្ងាចថ្ងៃនេះ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា បានច្រានចោលទាំងស្រុងនូវរបាយការណ៍មួយ ដែលបានចោទប្រកាន់ថា “ចារកម្មកូរ៉េខាងជើងបានបើកដំណើរការសណ្ឋាគារ កាស៊ីណូ និងភ្នាក់ងារទេសចរណ៍នៅកម្ពុជា” ដែលព័ត៌មាននេះ ត្រូវបានចុះផ្សាយក្នុង NK News កាលពីថ្ងៃទី១៥ ខែកុម្ភៈ ឆ្នាំ២០២២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

 បើតាមអ្នកនាំពាក្យ កម្ពុជាបានអនុវត្តយ៉ាងត្រឹមត្រូវស្របតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) ដោយបានបិទគ្រប់អាជីវកម្ម និងគណនីធនាគាររបស់សាធារណរដ្ឋប្រជាមានិតប្រជាធិបតេយ្យកូរ៉េ (កូរ៉េខាងជើង) នៅក្នុងប្រទេសកម្ពុជា និងបានបញ្ឈប់ការផ្តល់ប័ណ្ណការងារដល់កម្មករមកពីកូរ៉េខាងជើងផងដែរ។

ក្រសួងការបរទេស តាមរយៈស្ថានបេសកកម្មអចិន្ត្រៃយ៍នៃព្រះរាជាណាចក្រកម្ពុជា ប្រចាំអង្គការសហប្រជាជាតិ កាលពីថ្ងៃទី២០ ខែមករា ឆ្នាំ ២០២០ បានបញ្ជូនរបាយការណ៍ជាតិរបស់កម្ពុជា អំពីការអនុវត្តសេចក្ដីសម្រេចរបស់ UNSC ស្តីពីការដាក់ទណ្ឌកម្មលើ ស.ប.ប.ក ទៅកាន់ប្រធានគណៈកម្មាធិការ UNSC ដែលត្រូវបានបង្កើតឡើងអនុលោមតាមសេចក្ដីសម្រេចរបស់ UNSC លេខ ១៧១៨ (ឆ្នាំ ២០០៦) ។ 

កម្ពុជាតែងតែប្រកាន់ខ្ជាប់នូវជំហរម៉ឺងម៉ាត់របស់ខ្លួនចំពោះការគាំទ្រការមិនរីកសាយភាយអាវុធមហាប្រល័យ ដើម្បីឆ្ពោះទៅរកការលុបបំបាត់ទាំងស្រុងនូវអាវុធទាំងនេះ និងគូសបញ្ជាក់ថា “ក្នុងនាមជាសមាជិកមួយរូបរបស់អង្គការសហប្រជាជាតិដែលមានការទទួលខុសត្រូវ កម្ពុជាបានបំពេញទាំងស្រុងនូវកាតព្វកិច្ចអន្តរជាតិរបស់ខ្លួនក្រោមធម្មនុញ្ញអង្គការសហប្រជាជាតិ ហើយបានអនុវត្តយ៉ាងស្មោះត្រង់នូវសេចក្ដីសម្រេចរបស់ UNSC ស្តីពីការដាក់ទណ្ឌកម្មលើ ស.ប.ប.ក”។

ដើម្បីអនុវត្តប្រកបដោយប្រសិទ្ធភាពនូវតម្រូវការនៃសេចក្ដីសម្រេចដាក់ទណ្ឌកម្មរបស់ UNSC លើកូរ៉េខាងជើង ក្រសួងការបរទេស បានជូនដំណឹងយ៉ាងត្រឹមត្រូវដល់ក្រសួង និងស្ថាប័នពាក់ព័ន្ធទាំងអស់ អំពីសេចក្ដីសម្រេចទាំងអស់របស់ UNSC  ដើម្បីចាត់វិធានការជាក់ស្តែង។  

នៅថ្ងៃទី០១ ខែមីនា ឆ្នាំ២០១៨ រាជរដ្ឋាភិបាលកម្ពុជា បានបង្កើតក្រុមការងារចំពោះកិច្ចអន្តរក្រសួង ដើម្បីធ្វើការត្រួតពិនិត្យរាល់ឯកសារ និងការស៊ើបអង្កេតលើបណ្តាក្រុមហ៊ុន និងអាជីវកម្មរបស់កូរ៉េខាងជើង។ ក្រុមការងារចំពោះកិច្ចអន្តរក្រសួង បានរៀបចំកិច្ចប្រជុំយ៉ាងហោចណាស់ចំនួនប្រាំបួនដង ដែលបានធ្វើជាសហប្រធានដឹកនាំដោយក្រសួងការបរទេស និងសហប្រតិបត្តិការអន្តរជាតិ និងក្រសួងពាណិជ្ជកម្ម ដើម្បីធ្វើការសម្រេចលើវិធានការជាក់ស្តែង ដើម្បីអនុវត្តស្របតាមប្រភេទទណ្ឌកម្មផ្សេងៗ ដូចមានចែងក្នុងសេចក្ដីសម្រេចរបស់ UNSC ។

ជាលទ្ធផល គណនីធនាគារចំនួនប្រាំពីរ នៅក្នុងស្ថាប័នហិរញ្ញវត្ថុពីរផ្សេងគ្នា ត្រូវបានបិទចាប់តាំងពីឆ្នាំ២០១៧ មក។ កម្ពុជាបានបិទគ្រប់អាជីវកម្មរបស់កូរ៉េខាងជើងទាំងអស់ រួមទាំងភោជនីយដ្ឋាន និងសារមន្ទីរដែលធ្វើប្រតិបត្តិការនៅកម្ពុជា។ 

កាលពីថ្ងៃទី១២ ខែមិថុនា ឆ្នាំ២០១៩ ក្រសួងពាណិជ្ជកម្ម បានលុបឈ្មោះក្រុមហ៊ុន Glory Worldwide Glow Co. Ltd របស់ កូរ៉េខាងជើង ចេញពីបញ្ជីពាណិជ្ជកម្ម។ ក្រសួងពាណិជ្ជកម្ម បានស្រាវជ្រាវក្រុមហ៊ុននានាដែលបានចុះបញ្ជីក្នុងប្រព័ន្ធរបស់ខ្លួន និងបានរកឃើញក្រុមហ៊ុនចំនួន ១២ រួមទាំងក្រុមហ៊ុន Mansudae New Tech Corporation Ltd. ផង ដែលបានជាប់ពាក់ព័ន្ធជាមួយ កូរ៉េខាងជើង។ ក្រុមហ៊ុនទាំងនេះត្រូវបានលុបឈ្មោះចេញពីបញ្ជី កាលពីថ្ងៃទី៣០ ខែធ្នូ ឆ្នាំ២០១៩ ។ ភោជនីយដ្ឋានចំនួនប្រាំបីត្រូវបានដកហូតអាជ្ញាប័ណ្ណ និងបិទទ្វារ កាលពីថ្ងៃទី៥ ខែធ្នូ ឆ្នាំ២០១៩ ។ 

ចាប់តាំងពីឆ្នាំ២០១៧មក កម្ពុជាបានបញ្ឈប់ទាំងស្រុងការផ្តល់ប័ណ្ណការងារដល់ពលករមកពី ស.ប.ប.ក។ គិតត្រឹមថ្ងៃទី៣០ ខែវិច្ឆិកា ឆ្នាំ២០១៩ រាជរដ្ឋាភិបាលបានសម្រេចមិនពន្យារទិដ្ឋាការដល់ប្រជាជន កូរ៉េខាងជើង ដែលបានធ្វើការនៅកម្ពុជាទៀតទេ។

សូមជម្រាបថា ក្រុមប្រឹក្សាសន្តិសុខអង្គការសហប្រជាជាតិ បានដាក់ចេញនូវសេចក្ដីសម្រេចមួយកលពីខែកញ្ញា ឆ្នាំ២០១៩ បានទណ្ឌកម្មទៅកូរ៉េខាងជើង ដែលបានសាកល្បងអាវុធនុយក្លេអ៊ែរ លើអាជីវកម្មក្រៅប្រទេសរបស់ជន ជាតិកូរ៉េខាងជើង និងទាមទារឲ្យមានការបញ្ជូនជនជាតិកូរ៉េ ខាងជើងដែលធ្វើការនៅក្រៅប្រទេសត្រឡប់ទៅប្រទេស កូរ៉េខាងជើងវិញ៕

អត្ថបទ៖ កោះកែវ

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

Sokha Hotels

ព័ត៌មានពេញនិយម