កម្ពុជា ផ្សព្វផ្សាយច្បាប់វិនិយោគថ្មី ដល់ក្រុមប្រឹក្សាទំនាក់ទំនងសេដ្ឋកិច្ច តួកគី

ក្រុមការងារសម្របសម្រួលការទូតសេដ្ឋកិច្ច នៃក្រសួងការបរទេស និងសហប្រតិបត្តិការអន្តរជាតិ (កបទ.សអ) នៃព្រះរាជាណាចក្រកម្ពុជា បានជួបពិភាក្សាការងារជាមួយ ក្រុមប្រឹក្សាទំនាក់ទំនងសេដ្ឋកិច្ចបរទេសតួកគី (DEIK) នៅទីក្រុងអីស្តាបួរ ប្រទេសតួកគី ដើម្បីពង្រឹង និងពង្រីកកិច្ចសហប្រតិបត្តិការសេដ្ឋកិច្ច និងពាណិជ្ជកម្មរវាងប្រទេសទាំងពីរ។

កម្មវិធីនេះប្រព្រឹត្តិទៅក្រោមវត្តមានរបស់លោក ប្រាក់ ផល្លា តំណាងរបស់លោកឧបនាយករដ្ឋមន្រ្តី ប្រាក់ សុខុន និង លោក សន ច័ន្ទរិទ្ធី តំណាងប្រធានក្រុមការងារ សម្របសម្រួលការទូតសេដ្ឋកិច្ច ដោយមានការចូលរួមពីតំណាងក្រុមប្រឹក្សាទំនាក់ទំនងសេដ្ឋកិច្ចបរទេសតួកគី សរុបប្រមាណជាង ២០នាក់ នៅថ្ងៃទី២២ ខែកុម្ភៈ ឆ្នាំ២០២២។

កិច្ចពិភាក្សានេះផ្តោតលើប្រធានបទសំខាន់មួយចំនួនដូចជា ការផ្សព្វផ្សាយច្បាប់វិនិយោគថ្មីរបស់កម្ពុជា ការលើកកម្ពស់ពាណិជ្ជកម្ម និងការជំរុញវិស័យទេសចរណ៍ និងវប្បធម៌។

គោលបំណងនៃការរៀបចំកិច្ចប្រជុំនេះ គឺដើម្បីជួយត្រួសត្រាយផ្លូវដល់ធុរជន និងវិនិយោគិនតួកគី អាចស្វែងយល់ពីឱកាសនៃការវិនិយោគនៅកម្ពុជា តាមរយៈច្បាប់ វិនិយោគថ្មីដែលមានភាពអនុគ្រោះច្រើន ពង្រីកឱកាសទីផ្សាររបស់កម្ពុជាតាមរយៈអនុវត្តកិច្ចព្រមព្រៀងសេរីទ្វេភាគី និងពហុភាគី និងការផ្សព្វផ្សាយពីវិស័យទេសចរណ៍កម្ពុជា តាមរយៈវិធានការនានារបស់រាជរដ្ឋាភិបាល រួមមាន ការបើកទទួលទេសចរណ៍វ៉ាក់សាំង បន្ទាប់ពីជោគជ័យនៃយុទ្ធនាការចាក់វ៉ាក់សាំងដែលកម្ពុជាសម្រេចបានជិត ៩០% នៃចំនួនប្រជាជនសរុប និងកម្មវិធីស្តារ និងលើកស្ទួយវិស័យទេសចរណ៍កម្ពុជា ក្នុង និងក្រោយវិបត្តិជំងឺកូវីដ-១៩ ព្រមទាំងជំរុញការធ្វើដំណើរទៅវិញទៅមករវាងប្រទេសទាំងពីរ៕

អត្ថបទ៖ ណារី