អាល្លឺម៉ង់ ៖ កិច្ចព្រមព្រៀង​ ៥​​ចំណុច​ មានភាព​ចាំបាច់​សម្រាប់​ដោះ​ស្រាយ​ បញ្ហានៅមីយ៉ាន់ម៉ា​

នៅ​ក្នុងជំនួប​​​រវាង​លោកស្រី ANNALENA BAERBOCK  រដ្ឋមន្ត្រីការបរទេស នៃសា​ធារណរដ្ឋ​សហព័ន្ធអាល្លឺម៉ង់ ជាមួយ​លោក​ឧបនាយករដ្ឋមន្ត្រី ប្រាក់ សុខុន ​រដ្ឋមន្ត្រីការបរទេស និងសហប្រតិបត្តិការអន្តរជាតិ​កម្ពុជា ​ភាគីទាំងពីរ​បានឯកភាពគ្នាថា កិច្ចព្រមព្រៀង​ជា​ឯកច្ឆន្ទ ៥​ ​ចំណុចរបស់ថ្នាក់ដឹកនាំ​អាស៊ាន​ មាន​ភាព​​ចាំបាច់ ​​សម្រាប់​​ដោះ​ស្រាយ​បញ្ហានៅមីយ៉ាន់ម៉ា​​ ហើយលោកស្រី ANNALENA BAERBOCK ​បានសម្តែងការគាំទ្រ​កម្ពុជា ក្នុងនាម​ជាប្រ​ធាន​អាស៊ាន និងបេសកជនពិសេស​នៃ​ប្រធានអាស៊ាន ​ក្នុងការ​ស្វែង​រក​សន្តិភាព និង​បញ្ចប់អំពើហិង្សា នៅមីយ៉ានម៉ា។ ​​​

នៅក្នុងជំនួប​នោះ រដ្ឋមន្ត្រី​ការបរទេស​ទំាងពីរ​ បាន​ផ្លាស់ប្តូរយោបល់គ្នាលើបញ្ហាតំបន់ និងអន្តរជាតិ ដែលជា​ផលប្រយោជន៍​ក៏ដូចជាកង្វល់ នៅក្នុងតំបន់ទាំងពីរ។​ ចំពោះ​បញ្ហា​នៅមីយ៉ាន់ម៉ា ភាគីទាំងពីរ​​បានឯកភាពគ្នាលើភាពចាំបាច់ ក្នុងការអនុវត្តកិច្ចព្រមព្រៀងជាឯកច្ឆន្ទ ៥ ចំណុច ដើម្បី​ជួយឲ្យ​ប្រទេសនេះ វិលត្រឡប់មករកប្រក្រតីភាពឡើងវិញ។

ទាក់​ទិន​នឹងបញ្ហា​នេះ លោកស្រី ANNALENA BAERBOCK រដ្ឋមន្ត្រីការ​បរទេស​នៃសាធារ​ណរដ្ឋសហព័ន្ធអាល្លឺម៉ង់ បាន​សម្តែង​​ការ​​​គាំទ្រ​​​​កម្ពុជា ជាប្រធាន​អាស៊ាន និងបេសកជនពិសេស​ នៃ​ប្រធានអាស៊ាន ដែលមាន​គម្រោង​​ធ្វើដំណើរ​ទៅកាន់ប្រទេស​មីយ៉ាន់ម៉ា ដើម្បីជំរុញការអនុវត្តកិច្ចព្រមព្រៀងជាឯកច្ឆន្ទ៥ ចំណុច ពោល​​គឺក្នុងការ​ស្វែង​រក​មូលដ្ឋាន​រួម ​ក្នុងការបញ្ចប់អំពើហិង្សា ការផ្តល់ជំនួយមនុស្សធម៌ និងការបង្កើតបរិយាកាសអំណោយផល ដើម្បីចាប់ផ្តើមការសន្ទនា ក្នុងចំណោមភាគីពាក់ព័ន្ធទាំងអស់។

លោកស្រីរដ្ឋមន្រ្តីការបរទេស​អាល្លឺម៉ង់ បានបង្ហា​ញពី​ឆន្ទៈ​របស់​អាល្លឺម៉ង់ ក្នុងការ​ចូលរួមក្នុងការផ្តល់ជំនួយមនុស្សធម៌ដល់ប្រជាជនមីយ៉ាន់ម៉ា ក្នុងអំឡុងពេលពិភាក្សាអំពីស្ថានភាពនៅអ៊ុយក្រែន លោកស្រី ANNALENA BAERBOCK បាន​សង្កត់ធ្ងន់​អំពីសារសំ​ខាន់ នៃសាមគ្គីភាព និងភាពជាដៃគូរវាង G7 និងអាស៊ាន។ ភាគីទាំង​ពីរ បានគូសបញ្ជាក់អំពីសារៈសំខាន់ នៃការធានាបាននូវសន្តិភាពពិភពលោក និងការរក្សាបាន​នូវនីតិរដ្ឋ ក្នុងកិច្ចការអន្តរជាតិ ដែលជាមូលដ្ឋានគ្រឹះ សម្រាប់កិច្ចសហប្រតិបត្តិការអន្តរជាតិ និងវិបុលភាពរួមគ្នា។ រដ្ឋមន្ត្រីទាំងពីរ ក៏បានសម្តែងការពេញចិត្តយ៉ាងខ្លាំង ចំពោះការផ្លាស់ប្តូរការគាំទ្រគ្នាទៅវិញទៅមក សម្រាប់បេក្ខភាពរបស់ខ្លួន នៅក្នុងស្ថាប័នអន្តរជាតិ។​​

សូមបញ្ជាក់ថា លោក​ឧប​នា​យក​រដ្ឋមន្ត្រី ប្រាក់ សុខុន ​បានបំពេញទស្សនកិច្ចផ្លូវការនៅសា​ធារ​ណរដ្ឋសហព័ន្ធអាល្លឺម៉ង់ កាលពីថ្ងៃទី ២៣ ខែកុម្ភៈ ឆ្នាំ ២០២២ ដែលជាទស្សនកិច្ចលើកទី ១ ក្នុងរយៈពេល​២៥ ឆ្នាំ បន្ទាប់ពីការផ្លាស់ប្តូរដំណើរទស្សនកិច្ចចុងក្រោយ នៅក្នុងខែមករា ឆ្នាំ ១៩៩៧ ដើម្បីជំរុញទំនាក់ទំនងមិត្តភាពដ៏ល្អប្រសើរ និងពង្រីកកិច្ចសហប្រតិបត្តិការលើគ្រប់វិស័យ រវាងប្រទេសទាំងពីរ។

ក្នុងឱកាសបំពេញទស្សនកិច្ចនេះ លោក​ឧប​នា​យក​រដ្ឋមន្ត្រី ប្រាក់ សុខុន ​បាន​ជួប​ពិភាក្សាការ​ងារផ្លូវការជាមួយលោកស្រី ANNALENA BAERBOCK  ដើម្បីពិភាក្សាអំពីទំនាក់​ទំនងទ្វេភាគី កិច្ចសហ​ប្រតិបត្តិការជាមួយអាស៊ាន និងតំបន់​ឥណ្ឌូ-ប៉ាស៊ីហ្វិក  ស្ថានភាព​​នៅ​​​មីយ៉ាន់ម៉ា និង​នៅអ៊ុយ​ក្រែន និង​ការ​​ប្រែ​ប្រួល​អាកាសធាតុ ព្រមទំាងប្រធានបទផ្សេងៗជាច្រើន​ទៀត៕

អត្ថបទ៖ កោះកែវ