មន្ត្រីជាន់ខ្ពស់ក្រសួងសង្គមកិច្ច ជំរុញឲ្យក្រុមការងារគ្រប់មូលដ្ឋាន ចុះផ្សព្វផ្សាយជូនពលរដ្ឋក្រីក្រ នាំកូនចៅទៅចាក់វ៉ាក់សាំង

ថ្នាក់ដឹកនាំក្រសួងសង្គមកិច្ច អតីតយុទ្ធជន និងយុវនីតិសម្បទា បានជំរុញឲ្យក្រុមការងារជំនាញ គ្រប់ថ្នាក់មូលដ្ឋានបន្តចុះផ្សព្វផ្សាយ ដើម្បីនាំកូនចៅប្រជាពលរដ្ឋ ជាពិសេសជនងាយរងគ្រោះ ទៅចាក់វ៉ាក់សាំងឲ្យបានគ្រប់ៗគ្នា ជាពិសេសកុមារមានអាយុ ៣ទៅ ៥ ឆ្នាំតែម្ដង។ នេះជាការលើកឡើង របស់លោក សំហេង បុរស រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី១០ ខែមីនា ឆ្នាំ ២០២២ ខណៈពេលនាយកដ្ឋានសុខុមាលភាពសង្គម សហ ការជាមួយអនុគណ:កម្មាធិការជំនួយសង្គម រៀបចំកិច្ចប្រជុំត្រៀមអនុវត្តការស្រង់ ទិន្នន័យគ្រួសារក្រីក្របានចាក់វ៉ាក់សាំង។

ពិធីនេះមានការចូលរួម ពីថ្នាក់អនុរដ្ឋលេខាធិការ ប្រធាន-អនុប្រធាន ប្រធានការិយាល័យ មន្រ្តីបច្ចេក​ទេស នៃនាយកដ្ឋានសុខុមាលភាពសង្គម លោក-លោកស្រីប្រធានមន្ទីរ ប្រធានប្រតិបត្តិ និងមន្រ្តីបច្ចេកទេស មន្ទីរទាំង ២៥ រាជធានី-ខេត្តទាំង ២៥ និងមន្រ្តីអង្គការយូនីសេហ្វ្វសរុបប្រមាណ ៩០រូប តាមប្រព័ន្ធអនឡាញពីចំងាយ (Zoom)។

លោក សំហេង បុរស រដ្ឋលេខាធិការ ក្រសួងសង្គមកិច្ច អតីតយុទ្ធជន និងយុវនីតិសម្បទា បានថ្លែងថា ដើម្បីកាន់តែជ្រាបច្បាស់បន្ថែមទៀតនោះ ក្រុមការងារជំនាញពាក់ព័ន្ធទាំងអស់ គ្រប់ថ្នាក់មូលដ្ឋានបន្តចុះផ្សព្វផ្សាយ ជូនដល់ប្រជាពលរដ្ឋក្រីក្រនាំកូនចៅ ទៅចាក់វ៉ាក់សាំងឲ្យបានគ្រប់ៗគ្នា ជាពិសេសកុមារមានអាយុ ៣ ទៅ ៥ឆ្នាំ តែម្ដង។

ជាមួយនេះដែរ ក្រុមការងារត្រូវជម្រាបជូនប្រជាពលរដ្ឋ បង្កើនការប្រុងប្រយ័ត្នខ្ពស់ តាមវិធានសុខាភិបាល ខណៈពេល កូវីដ-១៩ បំប្លែងខ្លួនថ្មីអូមីក្រុង កំពុងតែរាតត្បាតយ៉ាងខ្លាំង គួរឲ្យព្រួយបារម្មណ៍ នៅរាជធានី និងខេត្តមួយចំនួន។ ហេតុដូច្នោះ ត្រូវនាំគ្នាទៅទទួលវ៉ាក់សាំងបង្ការជំងឺកូវីដ-១៩ បំប្លែងខ្លួនថ្មីអូមីក្រុង តាមការកំណត់របស់ក្រសួងសុខាភិបាល និងគណៈគ្រប់គ្រងគ្រឹះស្ថានមធ្យមសិក្សា បឋមសិក្សា មត្តេយ្យសិក្សា ជាពិសេសកូនចៅប្រជាពលរដ្ឋក្រីក្រ ត្រូវបន្តផ្តោតការយកចិត្តទុកដាក់ អនុវត្តយ៉ាងហ្មត់ចត់៕

អត្ថបទ៖ វិមាន