ព័ត៌មានជាតិ

លោក លី ធុជ ៖ ការគាំទ្រពីមហាជន គឺជាអាយុជីវិតរបស់គណបក្សយើង

បានផុស

៤ years មុន

នៅ

ថ្ងៃសៅរ៍ ១២ មីនា ២០២២

ដោយ

បាវិត ៖ “ការគាំទ្រពីមហាជន គឺជាអាយុជីវិតរបស់គណបក្សយើង” ហើយក្រុមការងារគណបក្សគ្រប់លំដាប់ថ្នាក់ទាំងអស់ ត្រូវរក្សាឲ្យបាននូវភាពជឿទុកចិត្ត ស្គាល់ខ្លួនឯង ស្គាល់ក្រុមការងារខ្លួនឯង ស្គាល់សត្រូវខ្លួនឯង ស្គាល់បេះដូងប្រជាពលរដ្ឋ និងត្រូវមានផែនការជាប្រចាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នេះជាលើកឡើងរបស់ លោក លី ធុជ សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានក្រុងបាវិត នារសៀលថ្ងៃទី១២ ខែមីនា ឆ្នាំ២០២២ ក្នុងនាមលោកស្រីកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា និងជាប្រធានក្រុមការងារគណបក្សចុះមូលដ្ឋានខេត្តស្វាយរៀង ក្នុងពិធីជួបសំណេះសំណាលជាមួយក្រុមការងារគណបក្សចុះមូលដ្ឋានសង្កាត់បាវិត គណបក្សសង្កាត់បាវិត សាខាបក្សភូមិ និងអនុសាខាបក្សភូមិ ដើម្បីធ្វើការវាយតម្លៃស្ថានការណ៍ និងដោះស្រាយបញ្ហាប្រឈមនៅមូលដ្ឋានសង្កាត់បាវិត ឈានទៅរកភាពជោគជ័យក្នុងការបោះឆ្នោតជ្រើសរើសក្រុមប្រឹក្សា សង្កាត់អាណត្តិទី៥ ឆ្នាំ២០២២ ជូនគណបក្សប្រជាជនកម្ពុជា។

លោក លី ធុជ បានមានប្រសាសន៍ថា “ការងារចម្បងរបស់គណបក្សប្រជាជនកម្ពុជា ដែលជាបក្សកាន់អំណាច ត្រូវធ្វើការឆ្លើយតប និងដោះស្រាយបញ្ហាជូនប្រជាពលរដ្ឋឲ្យទាន់ពេលវេលា ដោយមិនត្រូវទុកចោលនូវបញ្ហាតូចៗ ឲ្យកាន់តែរីកធំឡើងៗដោយមិនបានយកចិត្តទុកដាក់ឡើយ។

យើងទាំងអស់គ្នា ត្រូវយកចិត្តទុកដាក់លើអនាគត និងជោគវាសនារបស់ភូមិយើង និងមូលដ្ឋានយើង ហើយការគាំទ្រពីមហាជន គឺជាអាយុជីវិតរបស់គណបក្សយើង។ យើងត្រូវមានភាពស្មោះត្រង់ចំពោះគ្នា ពីព្រោះឥឡូវនេះ យើងកំពុងជិះនៅលើទូកតែមួយ និងមានបេសកកម្មរួមគ្នា ដើម្បីសម្រេចគោលដៅក្នុងការដណ្តើមជ័យជម្នះជូនគណបក្សប្រជាជនកម្ពុជា និងសម្រាប់ប្រទេសជាតិ និងប្រជាជនយើងទាំងមូល។

លោកបន្តលើកឡើងទៀតថា ក្រុមការងារគណបក្សគ្រប់លំដាប់ថ្នាក់ទាំងអស់ ត្រូវរក្សាអោយបាននូវភាពជឿទុកចិត្ត ស្គាល់ខ្លួនឯង ស្គាល់ក្រុមការងារខ្លួនឯង ស្គាល់សត្រូវខ្លួនឯង ស្គាល់បេះដូងប្រជាពលរដ្ឋ និងត្រូវមានផែនការជាប្រចាំ។ ទន្ទឹមនឹងនោះ ក្រុមការងារទាំងអស់ ត្រូវបន្តចុះសកម្មភាពដោយផ្ទាល់ឲ្យដល់ក្រុមបក្ស និងគ្រួសារបក្សទាំងអស់ក្នុងមូលដ្ឋាន៕