អង្គការ-សមាគម ១០ ចុះកិច្ចព្រមព្រៀងជាមួយក្រសួងសង្គមកិច្ច ដើម្បីរួមគ្នាលើកស្ទួយកុមារ និងជនពិការ

នាយកដ្ឋានសុខុមាលភាពកុមារ សហការជាមួយនាយកដ្ឋានសុខុមាលភាពជនពិការ បានរៀបចំពិធីចុះកិច្ចព្រមព្រៀងគម្រោងកម្មវិធី (MoU) រវាងអង្គការសមាគមចំនួន ១០អង្គការ ដើម្បីលើកស្ទួយសិទ្ធសេរីភាពកុមារ និងជនពិការ ជាពិសេសទប់ស្កាត់ការជួញដូ និងអំពើហឹង្សារតែម្ដង។

ពិធីនេះធ្វើឡើង នៅទីស្តីការក្រសួងសង្គមកិច្ច អតីតយុទ្ធជន និងយុវនីតិសម្បទា ថ្ងៃទី១៥ ខែមីនា ឆ្នាំ២០២២នេះ ដែលមានការចូលរួម ពីលោកនាយកមូលនិធិជនពិការ លោក លោកស្រី ប្រធាន-អនុប្រធានមន្ទីរស.អ.យ រាជធានី ខេត្ត លោក លោកស្រី នាយក-នាយិកាអង្គការ លោក លោកស្រី ប្រធាន-អនុប្រធាននាយកដ្ឋាន លោក លោកស្រី ប្រធាន-អនុប្រធានការិយាល័យ និងមន្រ្តីជាច្រើនរូបផងដែរ។

ក្នុងនាមលោកវង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទាលោក តូច ចាន់នី អគ្គនាយក នៃអគ្គនាយកដ្ឋានបច្ចេកទេស បានថ្លែងនូវសាទរ និងគាំទ្រចំពោះការចុះកិច្ចព្រមព្រៀងគម្រោងកម្មវិធី (MoU) រវាងអង្គការសមាគមចំនួន ១០អង្គការ រួមមានអង្គការទឹកនៃជីវិត អង្គការអលឃីដស៍ អង្គការផ្ទះមីគី អង្គការCIFA  សមាគមកុមាររីករាយ អង្គការសេរីភាពកម្ពុជាអូស្រ្តាលី អង្គការមូលនិធិគ្រួសារសម្រាប់កុមារ អង្គការស៊ីអូម៉ាល់ អង្គការជនមានពិការភាពសិលាកម្ពុជា និងវិទ្យាស្ថានស្រាវ​ជ្រាវត្រីកោណ ជាមួយនឹងក្រសួងសង្គមកិច្ច អតីតយុទ្ធជន និងយុវនីតិសម្បទា នាឪកាសនេះ។

លោក តូច ចាន់នី បានថ្លែងបន្តថា ការចុះកិច្ចព្រមព្រៀងនេះ មានអត្ថប្រយោជន៍ណាស់ ដែលជាការរួមគ្នាលើកស្ទួយសិទ្ធិសេរី ចំណេះដឹង ជំនាញ ដល់ជនពិការ និងកុមារតែម្ដង ស្របតាមទិសដៅយុទ្ធសាស្ត្រ របស់រាជរដ្ឋាភិបាលកម្ពុជា តែងតែគិតគូរខ្ពស់ចំពោះកុមារ និងជនពិការតែម្ដងដោយមិនឲ្យពួកគេនៅឯកាឡើយ៕

អត្ថបទដ៖ វិមាន