កសិករ​ស្រុក​ជលគីរី​ថា ​ប្រមូល​ផលស្រូវ​បាន​ទាប​ ខណៈ​តម្លៃ​ក៏ចុះ​ថោក​

កសិករនៅភូមិព្រៃគ្រី ឃុំព្រៃគ្រី ស្រុកជលគីរី ខេត្តកំពង់ឆ្នាំង បានត្អូញត្អែរពីការប្រមូលទិន្នផលស្រូវបានតិច ខណៈតម្លៃស្រូវក្នុងទីផ្សារក៏ចុះថោកក្នុងមួយគីឡូលក់បានតែ ៧៥០ រៀល ទូទាត់ជាមួយការទិញជីដាក់ស្រែ និងប្រេងសាំងមិនចំណេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ដ្រី យ៉ាត យ៉ាន អាយុ ៤៥ ឆ្នាំ ជាកសិករនៅឃុំភូមិព្រៃគ្រី បានឱ្យដឹងថា នាងមានដីស្រែ ២,៥០ ហិកតាឆ្នាំនេះការធ្វើស្រែប្រាំងដោយបានដាក់ជីខុស ដោយទិញជីដែលមានតម្លៃថោកមកដាក់ស្រែ ពេលប្រមូលគឺបានស្រូវតែ ១៦០ បាវ ខុសពីឆ្នាំមុនប្រមូលផលបានដល់ទៅ ២៣០ បាវ ដោយស្រូវក្នុងមួយបាវៗ មានទម្ងន់ពី ៧៥ ទៅ ៨០ គីឡូ។

បើគិតជាតោនវិញ គឺឆ្នាំមុនទទួលផលក្នុង ១ហិកតាបាន ៨តោន ប៉ុន្តែឆ្នាំនេះទទួលផលបានក្នុង១ហិកតា តែ៥តោនប៉ុណ្ណោះ។ ចំណែកតម្លៃក្នុងទីផ្សារវិញឆ្នាំនេះស្រូវ ១ គីឡូលក់បានតែ ៧៥០ រៀល ខុសពីឆ្នាំមុនលក់បានថ្លៃពី៩០០រៀល ដល់១០០០រៀល។

ដោយឡែកស្ត្រីជាកសិករម្នាក់ទៀតឈ្មោះស្រីអូន អាយុ ៣៥ ឆ្នាំរស់នៅភូមិព្រៃគ្រី ឃុំព្រៃគ្រីបាននិយាយឲ្យដឹងថា ឆ្នាំនេះជីខ្មៅឡើងថ្លៃគឺក្នុង ១ បាវ តម្លៃ ២២ម៉ឺនរៀល គាត់ក៏បានកាត់បន្ថយការដាក់ជីក្នុងស្រែ។

ដូច្នេះពេលប្រមូលផល គឺបាត់ធា ទទួល ផលបានទាប ដោយក្នុង១ហិកតា ប្រមូលផលបានតែ ៦០ បាវ ខុសពីឆ្នាំមុនដាក់ជីច្រើន ក្នុង១ ហិកតា ប្រមូលផលបានដល់ទៅ ៨០ បាវ។

ចំណែកថ្លៃជួលម៉ាសុីនច្រូតស្រូវក្នុង ១ហិកតា ថ្លៃ៣៥ ម៉ឺនរៀលសម្រាប់ស្រូវឈរ តែបើស្រូវដួលដេកវិញនោះពិបាកច្រូតក្នុង ១ ហិកតាគេយក ៣៨ ម៉ឺនរៀល។ ចំពោះរូបគាត់ការទទួលផលបានទាបដូច្នេះ គឺមិនចំណេញនោះឡើយ។

ក្រុមកសិករបានបញ្ជាក់ថា ការធ្វើស្រែក្នុងសម័យបច្ចុប្បន្ននេះ ការភ្ជួររាស់ក៏ជួលត្រាក់ទ័រ ការច្រូតកាត់ក៏ជួលម៉ាស៊ីនច្រូត គឺត្រូវចំណាយប្រាក់ទាំងអស់។ បូកផ្សំនឹងជីក៏ឡើងថ្លៃ ប្រេងបូមទឹកដាក់ស្រែក៏ឡើងថ្លៃ ដូចនេះកសិករភាគច្រើនដែលមានដីស្រែតិចតួចនោះ គឺមិនចំណេញនោះឡើយ។ ចំពោះតម្លៃស្រូវក្នុងទីផ្សារវិញពេលស្រូវសំបូរចុះថោក ពេលស្រូវមានតិចគឺឡើងដែលនេះគឺជាក្រិតក្រមលើទីផ្សារសេរី។

តារាងតម្លៃស្រូវសើមរបស់សហព័ន្ធស្រូវអង្ករកម្ពុជា ចេញផ្សាយនៅថ្ងៃទី ១៤ ខែមីនា បង្ហាញថា តម្លៃស្រូវសើម ប្រភេទស្រូវអូអឹម និងស្រូវអ៉ីអ៊ែ នៅខេត្តកំពង់ឆ្នាំង មានតម្លៃចាប់ពី ៨០០ រៀល ដល់ ៨២០ រៀល៕

អត្ថបទ៖ ឈៀងថារិទ្ធ