ព័ត៌មានជាតិ

ទូតម៉ាឡេស៊ីសន្យាថា នឹងជួយកៀរគរវិនិយោគិនមកបណ្តាក់ទុនរកស៊ី លើវិស័យ ៥ នៅខេត្តកំពង់ស្ពឺ

បានផុស

៤ years មុន

នៅ

ថ្ងៃពុធ ១៦ មីនា ២០២២

ដោយ

លោក ELDEEN HUSAINI HOHD HASHIM ឯកអគ្គរដ្ឋទូតប្រទេសម៉ាឡេស៊ី ប្រចាំនៅប្រទេសកម្ពុជា បានសន្យាថា នឹងខិតខំជួយកៀរគរវិនិយោគិនមកបណ្តាក់ទុនរកស៊ីលើវិស័យ ៥ នៅខេត្តកំពង់ស្ពឺ នាពេលខាងមុខនេះ ដោយសារខេត្តកំពង់ស្ពឺ មានសក្តានុពលខ្ពស់លើវិស័យសេដ្ឋកិច្ចខ្ពស់។

ការសន្យារបស់ឯកអគ្គរដ្ឋទូតប្រទេសម៉ាឡេស៊ីនេះ បានធ្វើឡើងនៅព្រឹកថ្ងៃទី ១៦ ខែមីនា ឆ្នាំ ២០២២ ក្នុងឱកាសជួបពិភាក្សាការងារជាមួយលោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ។ លោក វ៉ី សំណាង បានមានប្រសាសន៍ថាដំណើរទស្សនកិច្ចរបស់ឯកអគ្គរដ្ឋទូតប្រទេសម៉ាឡេស៊ីមកកាន់ខេត្តកំពង់ស្ពឺនាពេលនេះ ក្នុងគោលបំណងដើម្បីសិក្សាស្វែងយល់ពីសក្តានុពលរបស់ខេត្តកំពង់ស្ពឺ តាមការចង្អុលបង្ហាញរបស់សម្ដេចអគ្គមហាសេនាបតីតេជោ ហ៊ុន សែន នាពេលកន្លងមក។

លោកឯកអគ្គរដ្ឋទូតប្រទេសម៉ាឡេស៊ី បានលើកឡើងថា លោក និងកៀរគរអ្នកវិនិយោគលើវិស័យទេសចរណ៍ វិស័យពាណិជ្ជកម្ម វិស័យអចលនទ្រព្យ វិស័យកសិកម្ម វិស័យឧស្សាហកម្ម វិស័យអគ្គិសនីដើរដោយថាមពលព្រះអាទិត្យ មកវិនិយោគនៅទឹកដីខេត្តកំពង់ស្ពឺ នាពេលខាងមុខ។ លោកឯកអគ្គរដ្ឋទូតរំពឹងថា នៅពេលដែលអ្នកវិនិយោគរបស់ម៉ាឡេស៊ីមានចំណាប់អារម្មណ៍ហើយ មកបណ្ដាក់ទុននៅក្នុងខេត្តកំពង់ស្ពឺ ពេលនោះប្រជាពលរដ្ឋអ្នកខេត្តកំពង់ស្ពឺ នឹងមានប្រាក់ចំណូលបន្ថែមទៀត តាមរយៈឱកាសការងារដែលអ្នកវិនិយោគរបស់ម៉ាឡេស៊ីមកបណ្ដាក់ទុន។

លោកអភិបាលខេត្ត បានថ្លែងអំណរគុណចំពោះលោកឯកអគ្គរដ្ឋទូតប្រទេសម៉ាឡេស៊ី ដែលមានចំណាប់អារម្មណ៍មកទស្សនកិច្ចនៅខេត្តកំពង់ស្ពឺ និងបានជួយជំរុញឱ្យអ្នកវិនិយោគមកបណ្តាក់ទុកនៅខេត្តនាពេលខាងមុខ ដែលនឹងជួយលើកស្ទួយដល់សេដ្ឋកិច្ចខេត្ត ក៏ដូចជាលើកកម្ពស់ជីវភាពរស់នៅរបស់ប្រជាពលរដ្ឋកាន់តែរីកចម្រើនថែមទៀត៕

អត្ថបទ៖ សំអឿន