អ្នកនយោបាយ ស្នើអាជ្ញាធរបង្ក្រាបបទល្មើសនេសាទខុសច្បាប់ ក្នុងបឹងទន្លេសាបឲ្យបានជាប្រចាំ

អ្នកនយោបាយមើលឃើញថា អាជ្ញាធរខេត្តនៅជុំវិញបឹងទន្លេសាប បានចុះបង្ក្រាបជាបន្តបន្ទាប់នូវបទល្មើសនេសាទខុសច្បាប់នៅបឹងទន្លេសាប បន្ទាប់ពីទទួលបានបទបញ្ជា របស់សម្ដេចតេជោនាយករដ្ឋមន្ត្រី កាលពីពេលថ្មីៗនេះ។ ក៏ប៉ុន្តែអ្នកនយោបាយទាំងនោះ បានស្នើដល់អាជ្ញាធរខេត្តជុំវិញបឹងទន្លេ​សាបទាំងអស់ ត្រូវបន្តចុះបង្ក្រាបបទល្មើសនេះឲ្យបានជាប់ជាប្រចាំ ដើម្បីទប់ស្កាត់ការបាត់បង់ធនធានត្រី ក្នុងបឹងដ៏មួយនេះ។

លោក ពេជ្រ​ ស្រស់ ប្រធានគណបក្សយុវជនកម្ពុជា និងជាសមាជិកឧត្ដមក្រុមប្រឹក្សាពិគ្រោះ និងផ្ដល់យោបល់ បានមានប្រសាសន៍ប្រាប់កម្ពុជាថ្មីនៅថ្ងៃទី ៣០ ខែមីនានេះថា បន្ទាប់ពីសម្ដេចតេជោនាយករដ្ឋមន្ត្រី បានចេញបញ្ជាដល់អាជ្ញាធរខេត្តនៅជុំវិញបឹងទន្លេ​សា​​ប បង្ក្រាបបទល្មើសនេសាទខុសច្បាប់​​នោះមក លោកសង្កេតឃើញថាអាជ្ញាធរតាមបណ្ដាទាំងនោះ បានខិតខំបង្ក្រា​បបទល្មើសបានជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក៏ប៉ុន្តែអ្នកយោបាយរូបនេះ បានស្នើដល់អាជ្ញាធរខេត្តនៅជុំវិញបឹងទន្លេសាប ត្រូវបានបង្ក្រាបបទល្មើសនេសាទខុសច្បាប់ ក៏ដូចជាបទល្មើសផ្សេងទៀតជាប្រចាំ ដោយមិនត្រូវធ្វើឡើងដូចភ្លើងចំបើងនោះទេ។ លោក ពេជ្រ ស្រស់ បានបន្ថែមថា «អញ្ចឹងសុំឲ្យអាជ្ញាធរថ្នាក់ក្រោមជាតិគ្រប់ថ្នាក់ទាំងអស់ ឃ្លាំមើលបទល្មើសនានាក្នុងបឹងទន្លេសាប ហើយទប់ស្កាត់ឲ្យទាន់ពេលវេលា កុំចាំតែថ្នាក់លើដាក់បញ្ជាទើបនាំគ្នាធ្វើ អាហ្នឹងគឺអ្វីៗវាយឺតពេលហើយ»។

លោកផ្ដល់យោបល់ថា អាជ្ញាធរខេត្តនៅជុំវិញបឹងទន្លេសាប គួរតែបង្កើតប៉ុស្ដិ៍យាម និងក្រុមការងារឃ្លាំមើលជាប្រចាំ ទប់ស្កាត់បទល្មើសនេសាទខុសច្បាប់ ដើម្បីធ្វើយ៉ាងណាឲ្យធនធានត្រីនៅបឹងទន្លេសាប មានកើនឡើងវិញ សម្រាប់ទុកឲ្យមនុស្សជំនាន់ក្រោយបរិភោគ។ ប្រធានគណបក្សយុវជនកម្ពុជា បានលើកឡើងដែរថា «បើសិនជាយើងរួមគ្នាថែរក្សា រួមគ្នាការពារ គឺមានត្រីហូបទាំងអស់គ្នា បើយើងមិនរួមគ្នាថែរក្សា មិនរួមគ្នាការពារទេ អាហ្នឹងគឺយើងអត់អីហូបទាំងអស់គ្នា ប៉ុន្តែអ្នកដែលត្រូវធ្វើឲ្យជាប់លាប់ គឺអាជ្ញាធរនេះឯង»។

ចំណែកឯលោក ញឿន រ៉ាដែន អ្នកនាំពាក្យគណបក្សហ៊្វុនស៊ិនប៉ិច បានឲ្យដឹងដែរថា ក្នុងនាមគណប​ក្ស​​ហ៊្វុនស៊ិនប៉ិចលោកសូមស្វាគមន៍ និងសាទរចំពោះការដាក់បទបញ្ជា របស់សម្ដេចតេជោនាយករដ្ឋមន្ត្រីដែលឲ្យអាជ្ញាធរខេត្ត និងមន្ត្រីក្រសួងស្ថាប័នពាក់ព័ន្ធបង្ក្រាប បទល្មើសនេសាទខុសច្បាប់ ក៏ដូចជាបទល្មើសកាប់បំផ្លាញព្រៃលិចទឹក និងរុករានយកដីព្រៃជុំវិញបឹងទន្លេសាបផងដែរ។

លោក ញឿន រ៉ាដែន បានបន្ថែមថា នេះជាការយកចិត្តទុកដាក់ របស់សម្ដេចនាយករដ្ឋមន្ត្រី ដើម្បីការ​ពារធនធានធម្មជាតិ និងបរិស្ថាននៅក្នុងតំបន់បឹងទន្លេសាបនេះ ដែលជាជម្រកត្រីពង និងកន្លែងផ្គត់ផ្គង់ត្រីដ៏សំខាន់ សម្រាប់ប្រទេសកម្ពុជា។ អ្នកនាំពាក្យគណបក្សហ៊្វុនស៊ិនប៉ិចរូបនេះ បានលើកឡើងដែរថា «ខ្ញុំគិតថាអាជ្ញាធរ ជាពិសេសក្រសួងពាក់ព័ន្ធ មន្ត្រីគ្រប់ជំនាញគួរតែបន្តនូវសកម្មភាព ជាពិសេ​សការអនុវត្តច្បាប់​ ដែលច្បាប់យើងបានចែងយ៉ាងច្បាស់ហើយថា មានតួនាទី និងការបែងចែកភារកិច្ចហ្នឹងគឺទៅតាមក្រសួង ក៏ដូចជាតាមស្ថាប័ន»។

គួររំលឹកថា សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីថ្ងៃទី ២៣ ខែមីនា ឆ្នាំ ២០២២កន្លងទៅនេះ បានដាក់បទបញ្ជាឲ្យអាជ្ញាធរខេត្តជុំវិញបឹងទន្លេសាប និងក្រសួង-ស្ថាប័នពាក់ព័ន្ធ ត្រូវបើកប្រតិបត្តិការបង្ក្រាប បទល្មើលនេសាទខុសច្បាប់នៅបឹងទន្លេសាប ដើម្បីការពារធនធានត្រីឲ្យមានកំណើនឡើងវិញ។

បន្ទាប់ពីទទួលបានបទបញ្ជា របស់សម្ដេចតេជោនាយករដ្ឋមន្ត្រីរួចមក គឺសង្កេតឃើញថា អាជ្ញាធរខេត្តជុំវិញបឹងទន្លេសាប បានចុះបង្ក្រាបជាបន្តបន្ទាប់នូវបទល្មើសនេសាទខុសច្បាប់ ក្នុងដែនសមត្ថកិច្ចរប​ស់ខ្លួន។ ចំណែកក្រសួង-ស្ថាប័នពាក់ព័ន្ធ ក៏បានដាក់ចេញនូវផែនការមួយចំនួនផងដែរ ដើម្បីបង្ក្រាបបទល្មើសនេសាទនៅបឹងទន្លេសាបនេះ ឲ្យមានប្រសិទ្ធ ភាព៕

អត្ថបទ៖ ឃួន សុភ័ក្រ