ក្រសួងសង្គមកិច្ច សាទរចំពោះកិច្ចសហការល្អរបស់អាជ្ញាធរមូលដ្ឋាន ជុំវិញដំណើរការអនុវត្តកម្មវិធីឧបត្ថម្ភសាច់ប្រាក់

លោក ឈួរ សុបញ្ញា ប្រធាននាយកដ្ឋានសុខុមាលភាពសង្គម នៃក្រសួងសង្គមកិច្ចអតីតយុទ្ធជន និងយុវនីតិសម្បទា បានថ្លែងអំណរគុណ និងសាទរកិច្ចចំពោះការសហការល្អ របស់អាជ្ញាធរមូលដ្ឋានឃុំ ស្រុក ខេត្តស្ទឹងត្រែង ជុំវិញដំណើរការអនុវត្តកម្មវិធីឧបត្ថម្ភសាច់ប្រាក់ ជូនស្រី្តមានផ្ទៃពោះ និងកុមារអាយុក្រោម ២ឆ្នាំ ជួយជ្រុំជ្រែងគិតគូលើលទ្ធផល នៃការអនុវត្តកម្មវិធីឧបត្ថម្ភសាច់ប្រាក់ ជូនស្រី្តមានផ្ទៃពោះ និងកុមារអាយុក្រោម ២ឆ្នាំ និងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះអំឡុងប្រយុទ្ធជំងឺកូវីដ-១៩ នៅក្នុងខេត្តបានដោយរលូន។

លោកប្រធាននាយកដ្ឋាន ថ្លែងបែបនេះ ខណៈពេលចុះពិនិត្យការអនុវត្តកម្មវិធីឧបត្ថម្ភសាច់ប្រាក់ ជូនស្រី្តមានផ្ទៃពោះ និងកុមារអាយុក្រោម ២ឆ្នាំ និងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះអំឡុងប្រយុទ្ធជំងឺកូវីដ-១៩ នៅក្នុងឃុំកំភុន ស្រុកសេសាន ខេត្តស្ទឹងត្រែង កាលពីរសៀលថ្ងៃទី ២០ ខែមេសា ឆ្នាំ ២០២២។

ក្នុងជួបប្រជុំពិភាក្សាការងារ ជាមួយមន្ទីរពាក់ព័ន្ធជុំវិញខេត្តថ្មីៗនេះ លើលទ្ធផលនៃការអនុវត្តកម្មវិធីឧបត្ថម្ភសាច់ប្រាក់ជូនស្រី្តមានផ្ទៃពោះ និងកុមារអាយុក្រោម ២ឆ្នាំ និងកម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះអំឡុងប្រយុទ្ធជំងឺកូវីដ-១៩ នៅក្នុងខេត្តទាំងមូលទទួលបានភាពល្អប្រសើរទោះបីជាជំងឺរាតត្បាតកូវីដ-១៩ រីករាលដាលឆ្លង និងឆក់ យកអាយុជីវិតប្រជាពលរដ្ឋខ្មែរមួយចំនួនក៏ដោយ។

លោក ឈួរ សុបញា បានថ្លែងបញ្ជាក់ថា ក្រោយពីទទួលបានគោលនយោបាយជាតិគាំពារសង្គម (២០១៦-២០២៥) រាជរដ្ឋាភិបាល បានផ្ទេរការអនុវត្តកម្មវិធីឧបត្ថម្ភសាច់ប្រាក់ ជូនដល់គ្រួសារក្រីក្រ និងងាយរងគ្រោះ ពិសេសដែលទទួល ផលប៉ះបាល់ ដោយសារជំងឺរាតត្បាតកូវីដ-១៩ ដែលបានចុះឈ្មោះនិងមានប័ណ្ណសមធម៌ តាមមូលដ្ឋានឃុំ-សង្កាត់រួចរាល់ហើយ ត្រូវបន្តបើកប្រាក់ឧបត្ថម្ភ ពីរាជរដ្ឋាភិបាល ដែលបានរៀបចំរួចជាស្រេច។

ជាមួយគ្នានេះដែរ ក្រសួងសង្គមកិច្ច អតីតយុទ្ធជន និងយុវនីតិសម្បទា បានណែនាំដល់គ្រប់នាយកដ្ឋានពាក់ព័ន្ធ ធ្វើការអំពាវនាវបន្ថែមទៀតដល់ប្រជាពលរដ្ឋក្រីក្រ និងងាយរងគ្រោះទូទាំងប្រទេស បន្តមកពិនិត្យឈ្មោះតាមមូលដ្ឋានឃុំ-សង្កាត់ ដែលរស់នៅស្នាក់អាស្រ័យរៀងៗខ្លួន ដើម្បីបន្តទទួលសាច់ប្រាក់ឧបត្តម្ភ ពីរាជរដ្ឋាភិបាលបន្ថែមទៀត។

ដើម្បីបង្កើនភាពងាយស្រួលដល់គ្រួសារក្រីក្រ និងងាយរងគ្រោះនោះ លោកបន្តចុះពិនិត្យការអនុវត្តកម្មវិធី និងការបើកសាច់ប្រាក់នៅឃុំ-សង្កាត់ និងតាមភ្នាក់ងារវីង ដើម្បីបង្កើនប្រសិទ្ធភាព និងស្វែងយល់ពីការបើកសាច់ប្រាក់ ជូនគ្រួសារក្រីក្រស្របតាមអនុសាសន៍ណែនាំ របស់ថ្នាក់ដឹកនាំ ជាពិសេសលោក វង សូត រដ្ឋមន្រ្តីក្រសួងសង្គមកិច្ច អតីតយុទ្ធជន និងយុវនីតិសម្បទា។ ដោយឡែកគ្រួសារ ដែលមិនទាន់បានទទួលសាច់ប្រាក់ឧបត្ថម្ភ ពីរាជរដ្ឋាភិបាលដូចព័ត៌មានខាងលើ សូមរួសរាន់មកទំនាក់ទំនង​​ជាមួយអាជ្ញាធរមូលដ្ឋាន ដែលខ្លួនស្នាក់អាស្រ័យនោះ ដើម្បីទទួលបានអត្ថប្រយោជន៍ ដែលរាជរដ្ឋាភិបាលបានផ្តល់ជូន៕

អត្ថបទ៖ វិមាន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត