នាយករដ្ឋមន្ត្រី​ទទូច​ឱ្យ​ពលរដ្ឋ​បន្ត​ចាក់វ៉ាក់​សាំងដូសទី ៣​ ដើម្បី​សុខភាព​ និង​ការពារ​អាយុជីវិត

​សម្ដេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃទី ២៦ ខែមេសា ឆ្នាំ ២០២២នេះ បានថ្លែង​អំពាវ​នាវឱ្យប្រជាពលរដ្ឋ​មកទទួលយកការ​ចាក់វ៉ាក់​សាំង ដូសទី ៣ ខណៈចំនួនអ្នកទទួលនូវដូសទី ៣ស្ថិតនៅក្នុង​​កម្រិត​​ទាបនៅឡើយ។

​នៅកម្ពុជា​មាន​ប្រជាពល​រដ្ឋ​ជាង ៦ លាននាក់ (៦ ៤០០ ០០០) មិនទាន់​បានទទួល​នូវការ​ចាក់វ៉ាក់​សាំងការពារជំងឺកូវីដ​១៩ដូសទី ៣។

សម្ដេចតេជោ ហ៊ុន សែន លើកឡើងថា “ចំណុចនេះគឺ​ទាមទារអំពី​សុខមាល​ភាព​របស់​បងប្អូន និងការពារអាយុជីវិតក៏ដូចជាក្រុមគ្រួសារ និងខ្លួនយើងម្នាក់ៗ”។

ការចាក់ដូសទី ៣ គឺជាកាតព្វកិច្ច មិនពាក់ព័ន្ធនឹងផ្លូវច្បាប់នោះទេ ពោលគឺជាការចាក់ដោយ​ឈរលើគោល​ការណ៍​ស្ម័គ្រចិត្រ។ ហើយប្រសិនបើមិនបានចាក់ ក៏មិនមានច្បាប់មួយណាតម្រូវ​ឱ្យមានការផាក​ពិន័យ​ និងវិធានការរដ្ឋបាលនោះទេ។

សម្ដេចតេជោ ហ៊ុន សែន នៅតែទទូចឱ្យបងប្អូនជនរួមជាតិទៅទទួលយកដូសទី ៣ ដែលជា​ដូស​តិចបំផុត ដែលត្រូវតែ​មានសម្រាប់អ្នកដែលបានចាក់ដូសទី ១ និងទី ២ រួចហើយ៕

អត្ថបទ៖ ឡេង ដេត