កម្ពុជា រកចំណូលបានពីការនាំចេញស្រូវ-អង្ករ ជាង ៥០០លានដុល្លារ ត្រឹមរយៈពេល៤ខែ

ការនាំចេញស្រូវអង្ករ របស់កម្ពុជា មានការកើនឡើងជាលំដាប់។ ជាក់ស្តែងនៅក្នុងរយៈពេល៤ខែ ដើមឆ្នាំ២០២២ កម្ពុជា នាំចេញអង្ករបានចំនួន ២២១ ១៣៨ តោន និងនាំចេញស្រូវបានចំនួន ១ ៦៤៨ ៤៧៤ តោន ដោយមានទំហំទឹកប្រាក់សរុបមានចំនួន ៥១៦.២១ លានដុល្លារ។

យោងតាមសេចក្តីប្រកាសព័ត៌មាន របស់សហព័ន្ធស្រូវអង្ករកម្ពុជា បានឱ្យដឹងថា ការនាំចេញនេះ ដោយក្រុមហ៊ុនចំនួន ៤៨ ទៅកាន់គោលដៅចំនួន ៥៤ ដែលក្នុងនោះ កម្ពុជាបាននាំទៅ ប្រទេសចិន និងតំបន់ស្វ័យតហុងកុង ម៉ាកាវបាន បានចំនួន ១១៥ ២៥៥ តោន ស្មើនឹង៥២.១២% នៃការនាំចេញសរុប ដែលគិតជាទឹកប្រាក់មានចំនួន ៦២.៧៤ លានដុល្លារ, តំបន់អឺរ៉ុបមានបរិមាណ ចំនួន ៦៨ ៥៥៥ តោន ស្មើនឹង ៣១% ទទួលបានទឹកប្រាក់ចំនួន ៥១.០២ លានដុល្លារ, តំបន់សមាជិកអាស៊ាន ចំនួន ២១ ៨៧៦ តោន ស្មើនឹង ៩.៨៩ % ទទួលបានទឹកប្រាក់ចំនួន១៣.៩០លានដុល្លារ និងបណ្តាប្រទេសផ្សេងៗ ក្រៅពីតំបន់ ខាងលើបានចំនួន ១៥ ៤៥២ តោន ស្មើនឹង ៦.៩៩% គិតជាទឹកប្រាក់មានចំនួន ១១.៧៤ លានដុល្លារ។

សូមរំលឹកថា ក្នុង​រយៈពេល​១២​ខែ ឆ្នាំ​២០២១ ​កន្លងទៅ​នេះ ប្រទេស​កម្ពុជា​បាន​នាំចេញ​ផលិតផល​កសិកម្ម​ ​មានទំហំទឹកប្រាក់​ប្រមាណ​ ៥ពាន់​លាន​ដុល្លារ​។ របាយការណ៍​បឋម​របស់​ក្រសួង​កសិកម្ម ​ បាន​បង្ហាញថា​ ការ​នាំចេញ​ស្រូវ អង្ករ ​និង​កសិផល​ក្រៅពី​ស្រូវ អង្ករ ​មាន​ទំហំ​ទឹកប្រាក់​ធំជាង​គេ ​ក្នុងចំណោម​កសិផល​សំខាន់​ៗ​ដទៃ​ទៀត​នៃ​វិស័យ​កសិកម្ម​៕