អាជ្ញាធរត្រៀមប្រតិបត្តិការរុះរើសំណង់នៅលើចំណីផ្លូវរថភ្លើង

នៅព្រឹកថ្ងៃទី ១៨ ខែ ធ្នូ នេះ លោក ផេង សិទ្ធី អភិបាលក្រុងបាត់ដំបង ខេត្តបាត់ដំបង បានអះអាងថា លោកនឹងចេញសេចក្តីជូនដំណឹងជាលើកទី ២ ដើម្បីឲ្យម្ចាស់សំណង់ដែលបានសង់បំពានលើដីចំណីផ្លូវរថភ្លើង ត្រូវរុះរើចេញឲ្យអស់។

គួររំលឹកថា កាលពីថ្ងៃទី ២៦ ខែ វិច្ឆិកា កន្លងមកនេះ រដ្ឋបាលក្រុងបាត់ដំបង បានចេញសេចក្តីជូនដំណឹងមួយច្បាប់តម្រូវឲ្យម្ចាស់រោងដែកមួយកន្លែង នៅត្រង់ចំណុចភូមិអណ្តូងចេញ ក្នុងសង្កាត់អូរចារ ក្រុងបាត់ដំបង ខេត្តបាត់ដំបង ដោយតម្រូវឲ្យបញ្ឍប់ដំណើរការសាងសង់ជាបន្ទាន់ក្រោយបានសាងសង់រំលោភលើដីចំណីថ្នល់ និងចំណីផ្លូវរថភ្លើង កាលពីដើមសប្តាហ៍កន្លងមក ហើយតម្រូវឲ្យរុះរើសំណង់ទាំងនោះចេញក្នុងរង្វង់រយៈពេល ៧ថ្ងៃជាកំហិត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ពេជ្រ ចំរើន អាយុ ៦១ឆ្នាំ ដែលអះអាងថា ជាឱពុកម្ចាស់រោងដែក បានបញ្ជាក់ថា ការសាងសង់រោងនេះឡើង គឺដើម្បីឲ្យកូនរបស់លោកបានលក់ដូរចំណីអាហារតិចតួចប៉ុណ្ណោះ ហើយចំពោះទីតាំងដែលបានធ្វើរោងនេះដែរ លោកបានការអនុញ្ញាតិពីម្ចាស់ដី ដែលបានអាស្រ័យផលតាំងពីឆ្នាំ ១៩៩០មក គឺលោក ចាន់ លាង ជាអាជីវករ។

បើទោះបីមានមតិលើកឡើងថា ជាសំណង់តូចតាចយ៉ាងណាក៏ដោយ ក៏នៅព្រឹកថ្ងៃទី ១៨ ខែធ្នូនេះ លោក ផេង សិទ្ធី អភិបាលក្រុងបាត់ដំបង បានបញ្ជាក់ថា នេះជាសំណង់ថ្មី ដែលមិនអាចអនុញ្ញតឲ្យសាងសង់បាននោះទេ ដោយសារតែសំណង់នេះ បានរំលោភលើដីចំណីផ្លូវជាតិផង និងចំណីផ្លូវរថភ្លើងផង។

លោកអភិបាលក្រុងបាត់ដំបង បញ្ជាក់ថា នៅដើមសប្តាហ៍ក្រោយ លោកនឹងសម្រេចចេញ ស ជ ណ ជាលើកទី ២ ដើម្បីកំណត់ឲ្យម្ចាស់រុះរើចេញទាំងអស់ ៕

អត្ថបទ ៖ សោ និយមរ័ត្ន