អតីតប្រធានាធិបតីកូឡុំប៊ី អរគុណកម្ពុជា ផ្តល់ការហ្វឹកហ្វឺនដោះស្រាយវិបត្តិសំណល់ជាតិផ្ទុះ

អតីតប្រធានាធិបតីសាធារណៈរដ្ឋកូឡុំប៊ី លោក Andres Pastrana Arango​ និងជាប្រធានអង្គការអ្នកប្រជាធិបតេយ្យនិយមកណ្តាល ថ្លែងអំណរគុណព្រះរាជាណាចក្រកម្ពុជា ក្នុងការហ្វឹកហ្វឺនដល់សិក្ខាកាមកូឡុំប៊ី នូវជំនាញការគ្រប់គ្រងគុណភាព និងបទដ្ឋានប្រតិបត្តិការ។

ឆ្លៀតក្នុងឱកាសដំណើរទស្សនកិច្ច នៅថ្ងៃ០៦ ខែមិថុនា ឆ្នាំ២០២២នេះ លោក Andres Pastrana Arango បានចូលសួរសុខទុក្ខកងទ័ពកូឡំប៊ី ដែលកំពុងស្នាក់នៅហ្វឹកហ្វឺននៅកម្ពុជា និងស្របពេលដែលអង្គភាពស៊ីម៉ាក់កំពុងផ្តល់ការហ្វឹកហ្វឺនដល់សិក្ខាកាមកូឡុំប៊ី នូវជំនាញការគ្រប់គ្រងគុណភាព និងបទដ្ឋានប្រតិបត្តិការ។

លោកបានសម្ដែងការអរគុណចំពោះរាជរដ្ឋាភិបាល ដែលបានជួយផ្តល់បទពិសោធន៍នៃការដោះស្រាយវិបត្តិសំណល់ជាតិផ្ទុះពីសង្គ្រាម ដែលប្រទេស និងប្រជាជនកូឡុំប៊ី កំពុងប្រឈមមុខយ៉ាងធ្ងន់ធ្ងរក្នុងសង្គ្រាមស៊ីវិលជាង៥០ឆ្នាំ។

លោក Andres Pastrana Arango បានរំលឹកអំពីការពិភាក្សា និងសំណេះសំណាលជាមួយសម្តេចអគ្គមហាសេនាធិបតីតេជោ ក្នុងការដោះស្រាយវិបត្តិ និងការកសាងសន្តិភាពនៅកម្ពុជា និងកោតសរសើរចំពោះសមិទ្ធផលរីកចម្រើនយ៉ាងធំធេងក្រោមការដឹកនាំរបស់សម្តេចតេជោ រួមជាមួយនឹងការបោះឆ្នោតក្រុមប្រឹក្សាឃុំសង្កាត់ថ្មីៗកន្លងទៅនេះ តាមគន្លងលិទ្ធិប្រជាធិបតេយ្យសេរីពហុបក្ស។

គួរបញ្ជាក់ថា អតីតប្រធានាធិបតីសាធារណៈរដ្ឋកូឡុំប៊ី លោក Andres Pastrana Arango​ និងជាប្រធានអង្គការអ្នកប្រជាធិបតេយ្យនិយមកណ្តាល បានអញ្ជើញមកទស្សនៈកិច្ចមកកម្ពុជា នៅកំលុងពេលបោះឆ្នោតជ្រើសរើសក្រុមព្រឹក្សាឃុំសង្កាត់ ត្រូវបានទទួលស្វាគមន៍ពីសំណាក់លោក ហេង រតនា អគ្គនាយកស៊ីម៉ាក់នៅកម្ពុជា នៅទីបញ្ចាការស៊ីម៉ាក់ភ្នំពេញ៕

អត្ថបទ៖ ឌឿនចាន់ ថារី