ទេសចរ​ផ្ទៃក្នុងជាង ​៣ សែននាក់​ធ្វើដំណើរ​កម្សាន្ត​នៅទូទាំង​ប្រទេស

ភ្ញៀវទេសចរផ្ទៃក្នុងជាង ៣ សែននាក់ (៣៦៤,៦៣៦)​ បានធ្វើដំណើរកម្សាន្ត​នៅទូទាំងប្រទេស​គិតត្រឹម ចុងសប្តាហ៍ទី៣ ថ្ងៃទី ១៨-១៩ ខែមិថុនា ឆ្នាំ២០២២។ នេះបើយោងតាមរបាយការណ៍ដែលចេញផ្សាយនាថ្ងៃទី ២០ មិថុនារបស់ក្រសួងទេសចរណ៍​ស្តីអំពីទេសចរផ្ទៃក្នុងប្រចាំសប្តាហ៍។

តាមរបាយការណ៍របស់ក្រសួងទេសចរណ៍បញ្ជាក់ថា ភ្ញៀវទេសចរជាតិប្រមាណ ៣៤៥,១៤៣នាក់ និងអន្តរជាតិផ្ទៃក្នុង ១៩,៤៩៣នាក់ បានធ្វើដំណើរកម្សាន្តផ្ទៃក្នុងនៅទូទាំងប្រទេសទៅកាន់ខេត្តតំបន់ទេសចរណ៍ផ្សេងរួមមាន៖ ខេត្តព្រះសីហនុដែលទទួលបានទេសចរប្រមាណ ៥៦,៨២៩នាក់ កំពតទទួលបាន ៤៨,៩០៥នាក់ ខេត្តសៀមរាប ៤៨,៨៦៧នាក់ ខេត្តបាត់ដំបង ៤៣,៦២១នាក់​ខេត្តកែប ៣៤,៥០០នាក់ ខេត្តបន្ទាយមានជ័យ ២២,៤៣០នាក់ រាជធានីភ្នំពេញ ១៧,០៩០នាក់ ខេត្តពោធិ៍សាត់ ១៦,១២០នាក់ និងខេត្តកំពង់ស្ពឺ ទទួលបានចំនួន ១៣,៥៨៤នាក់។

តួលេខ​ចុងសប្តាហ៍នេះ បន្តកើនឡើងប្រមាណ១១.៤៥% ធៀបនឹងចុងសប្តាហ៍កន្លងមក។ ការកើនឡើង នេះគេសង្កេតឃើញថា ភ្ញៀវទេសចរភាគច្រើន គឺធ្វើដំណើរទៅកាន់​តំបន់គោលដៅ​ទេសចរណ៍នៅក្នុង ខេត្តឆ្ងាយៗ ជាពិសេសបណ្តាខេត្តនៅតាមឆ្នេរសមុទ្រ សៀមរាប និងបាត់​ដំបងជាដើម៕

អត្ថបទ៖ នាង រតនៈ