នយោបាយឈ្នះ​-ឈ្នះ ត្រូវបាន​រំលេច​ឡើងក្នុងកិច្ចប្រជុំ រដ្ឋមន្ត្រីការពារជាតិអាស៊ាន​លើកទី ១៦

នេះជាការបញ្ជាក់ របស់សម្ដេចពិជ័យសេនា ទៀ បាញ់ ឧបនាយករដ្ឋមន្តី រដ្ឋមន្ត្រីការពារជាតិ នៃព្រះរាជា​ណាចក្រកម្ពុជា​ ​នៅក្នុងសន្និសីទសារព័ត៌មាន​​ ក្រោយ​កិច្ចប្រជុំរដ្ឋមន្ត្រីការពារជាតិអាស៊ាន លើកទី ១៦ (16th ADMM) ​ដែលកម្ពុជា​ធ្វើជាម្ចាស់ផ្ទះ​ នាព្រឹក​ថ្ងៃទី ២២ ខែមិថុនា ឆ្នាំ ​២០២២នេះ។

​សម្ដេចពិជ័យសេនា ទៀ បាញ់​ មានប្រសាសន៍ថា ក្នុងកិច្ចប្រជុំរដ្ឋមន្ត្រីការពារជាតិអាស៊ាន​នេះ ក៏បាន​​ផ្សព្វផ្សាយ​អំពីនយោ​បាយឈ្នះ-ឈ្នះផងដែរ ដោយសម្តេចបាន​​លើកឡើងនៅ​ក្នុង​កិច្ច​ប្រជុំ​ថា សុខសន្តិភាពពេញលេញរបស់កម្ពុជាសព្វថ្ងៃនេះ ​​គឺទទួលបានតាមរយៈនយោបាយឈ្នះ-ឈ្នះ ដែល​មានតម្លៃដ៏ធំធេងជាទីបំផុត។

បើតាមសម្ដេចពិជ័យសេនា ទៀ បាញ់​ ដោយសារតែកម្ពុជាបានកសាងនូវវិមានឈ្នះ-ឈ្នះ​មួយ នៅរាជធានីភ្នំពេញ សម្ដេចនឹងអញ្ជើញ​រដ្ឋមន្ត្រីការពារជាតិអាស៊ាន​ទាំងអស់ ដែលអញ្ជើញ​មកប្រជុំ ដើម្បី​ទៅ​ទស្សនា​វិមានឈ្នះ-ឈ្នះ​ ដែលជាកន្លែងចារិក ឬតម្កល់ទុកនូវតឹកតាងមួយចំនួន ដែលជាប្រវត្តិសាស្រ្តនៃនយោបាយឈ្នះ-ឈ្នះ ​ផងដែរ។​​

គួរបញ្ជាក់ថា នយោបាយ ឈ្នះ-ឈ្នះ​ គឺ​ជា​យុទ្ធសាស្ត្រ​នយោបាយដ៏​សំខាន់​មួយ ដែល​សម្តេចតេជោ ហ៊ុន សែន ​បាន​បង្កើតឡើងនៅឆ្នាំ ១៩៩៤ ដើម្បី​ធ្វើ​ឲ្យ​រលាយ​អង្គការ​ចាត់​តាំង ​របស់​ខ្មែរក្រហម ដែលតស៊ូតាមព្រៃជាយដែនខ្មែរ-ថៃ ក្នុងខេត្តបន្ទាយមានជ័យ ឧត្តរមានជ័យ និងប៉ៃលិនជាដើមនោះ។ នយោបាយ​ឈ្នះ-ឈ្នះ បានដាក់ចេញយុទ្ធសាស្ត្រ​ ៣​ចំណុច​សំខាន់ៗក្នុងការ​ធានាដល់សុវត្ថិភាព សម្រាប់កងទ័ពខ្មែរក្រហម៖ ទី១. ធានាអាយុជីវិត និងសុវត្ថិភាពរូបកាយ, ទី២. ធានាអាជីព និងមុខរបរ និងទី៣. ធានាសន្តិ សុខលើទ្រព្យសម្បត្តិ ទាំងអចលនទ្រព្យ និងចលនទ្រព្យ។

នយោបាយឈ្នះ-ឈ្នះ របស់សម្តេចតេជោ ហ៊ុន សែន បានធ្វើឲ្យសង្គ្រាមរ៉ាំរ៉ៃនៅកម្ពុជា ដែលបាន​ចាប់ផ្តើមឡើងចាប់តាំងពីថ្ងៃទី ១៨ ខែមីនា ឆ្នាំ ១៩៧០នោះ ត្រូវបានបិទបញ្ចប់ទៅវិញទាំង​ស្រុងនៅថ្ងៃទី ២៩ ខែធ្នូ ឆ្នាំ ១៩៩៨ ខណៈដែល​អ៊ុនតាក់ចំណាយទឹកប្រាក់ អស់ប្រមាណ ២០០០​លានដុល្លារ តែមិនអាចបញ្ចប់ភ្លើងសង្គ្រាមនៅកម្ពុជានោះឡើយ។ ការបញ្ចប់ភ្លើងសង្គ្រាមរ៉ាំរ៉ៃជិត ​៣ទសវត្សរ៍នេះ បានធ្វើឲ្យកម្ពុជា​ទទួលបានពន្លឺសន្តិភាពជាថ្មី និងធ្វើឲ្យកម្ពុជាទទួលបានឱកាសអភិវឌ្ឍន៍ប្រទេស ឲ្យឈានមករកការរីកចម្រើនដល់ពេលបច្ចុប្បន្ន៕

អត្ថបទ៖ កោះកែវ