អង្គភាពស៊ីម៉ាក់គ្រោងបោសសម្អាតគ្រាប់មីនឱ្យអស់ត្រឹម១ខែ នៅស្រុកភ្នំស្រុកទាំងមូល

បន្ទាប់ពីទទួលបានបទបញ្ជារបស់សម្តេចតេជោនាយករដ្ឋមន្ត្រីរួចមក លោក ហេងរតនា ប្រតិភូរាជរដ្ឋាភិបាលទទួល​បន្ទុកជាអគ្គនាយកស៊ីម៉ាក់បានមានប្រសាសន៍ថា អង្គភាពស៊ីម៉ាក់គ្រោង​នឹងបោសសំអាតគ្រាប់មីននៅស្រុកភ្នំស្រុក​ខេត្តបន្ទាយមានជ័យ ឱ្យអស់ក្នុងរយៈពេល១ខែប៉ុណ្ណោះ។

សម្តេចអគ្គមហាសេនាបតីតេជោ ហ៊ុនសែនបានប្រកាសនៅក្នុងទិវាមច្ឆាជាតិកាលពីថ្ងៃទី០១កក្កដានៅខេត្តបន្ទាយ​មានជ័យដោយបានចេញបទបញ្ជាឱ្យធ្វើការងារបោសសំអាតគ្រាប់មីនសំណល់សង្គ្រាមនៅឃុំប៉ោចារ និងតំបន់ត្រពាំងថ្ម ស្រុកភ្នំស្រុក ខេត្តបន្ទាយមានជ័យឱ្យអស់ក្នុងឆ្នាំ២០២២នេះ។

លោក ហេងរតនា បានបន្តថា បន្ទាប់ពីទទួលបានបទបញ្ជារបស់សម្តេចតេជោ​ កម្លាំងស៊ីម៉ាក់ប្រចាំទិសបន្ទាយមានជ័យ​នឹងដាក់ពង្រាយកម្លាំង នៅថ្ងៃទី៤​ ខែកក្កដា​ ឆ្នាំ២០២២ ​ទៅភូមិសាស្ត្រ​នេះ​ ដោយអាចប្រើប្រាស់រយ:ពេល​តែមួយ​ខែប៉ុណ្ណោះ គឺខែកក្កដា​នេះនឹងត្រូវរំដោះស្រុកភ្នំស្រុកទាំងមូលពីការគំរាមកំហែងដោយសារ​គ្រាប់មីននិងសំណល់​យុទ្ធភណ្ឌសង្គ្រាម។

លោកអគ្គនាយកស៊ីម៉ាក់បានរំលឹកថា ស្រុកភ្នំស្រុកមានផ្ទៃដីមានបញ្ហាគ្រាប់មីនដែលមានកំណ​ត់ត្រាក្នុងប្រព័ន្ធទិន្នន័យ​មានចម្ការមីនចំនួន៨ និងមានផ្ទៃដីសរុបជាង២៥ហិចតា។

សម្ដេចតេជោ ហ៊ុន សែន ក៏បានអំពាវនាវដល់វិស័យឯកជន ក្នុងការចូលរួមសកម្មភាពដោះមីន ដើម្បីឱ្យកម្ពុជាក្លាយជាប្រទេសដែលគ្មានមីនតាមការគ្រោងទុក។

បន្ទាប់ពីសម្តេចនាយករដ្ឋមន្ត្រីបានដាក់បទបញ្ជារួចមក មានអ្នកឧញ៉ា ឧញ៉ាជាច្រើនបានចូលរួមផ្តល់ថវិកាជូនដល់​សម្តេចសម្រាប់​ឱ្យសម្តេចចាត់ចែងសម្រាប់បោសសំអាតគ្រាប់មីន និងគ្រាប់មិនទាន់ផ្ទុះនៅនៅឃុំប៉ោចារ និងតំបន់ត្រពាំង​ថ្ម ស្រុកភ្នំស្រុក ខេត្តបន្ទាយមានជ័យឱ្យអស់ក្នុងឆ្នាំ២០២២នេះ៕ សំអឿន