ត្បូងឃ្មុំ​នឹងប្រកាស​ដាក់ជាខេត្តដំបូងដែលគ្មានមីន​នៅដំណាច់ឆ្នាំនេះ

លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីនបានឱ្យដឹងថា អាជ្ញាធរមីនបានដាក់គោលដៅ ប្រើថវិកាគម្រោងសម្ដេចតេជោសម្រាប់សកម្មភាពមីន សម្រុកបោសសម្អាតមីននៅទីតាំងខេត្តចំនួន ៣ ឱ្យអស់ហើយខេត្តត្បូងឃ្មុំ នឹងត្រូវប្រកាសដាក់ជាខេត្តដំបូងថា ជាខេត្តគ្មានមីន នៅដំណាច់ឆ្នាំនេះ។

ខេត្តត្បូងឃ្មុំមានចម្ការមីនប្រមាណជាង ៤ គីឡូម៉ែត្រក្រឡា ដែលត្រូវប្រគល់ជូនកម្លាំងបោសសម្អាតមីនកងទ័ពមួកខៀវ។

ចំណែកឯខេត្តចំនួន ២ ទៀត គឺខេត្តតាកែវ និងខេត្តកំពត ប្រគល់ជូនមជ្ឈមណ្ឌលកម្ចាត់មីន (CMAC) ខណៈកម្លាំងនឹងចុះនៅពេលឆាប់ៗខាងមុខនេះ។

លោក លី ធុជ អំពាវនាវដល់ប្រជាពលរដ្ឋឱ្យចូលរួមចលនាជាតិ សង្គ្រោះជីវិតប្រជាជន បញ្ចៀសពិការរភាព និងប្រគល់ដីសុវត្ថិភាពជូនប្រជាជន។

លោកឱ្យដឹងថា គ្រាប់មីនមាននៅទូទាំងប្រទេស នៅសល់ ៧១៦ គីឡូម៉ែត្រក្រឡា ពេល​បោស​សម្អាតហើយដែលប្រើថវិកាគម្រោងសម្ដេចសម្រាប់សកម្មភាពមីន និងថវិកាប្រទេសជាមិត្តនោះដីចម្ការមីន ថយចុះមកនៅតិច ពី ៧០០ គីឡូម៉េត្រ មកនៅត្រឹម ៤០០ គីឡូម៉ែត្រ នៅពេលបញ្ចប់ខេត្តទាំង ៣ ខាងលើនេះ៕

អត្ថបទ៖ ឡេង ដេត