Connect with us

ព័ត៌មានជាតិ

លោក Antony J. Blinken នឹងមកកម្ពុជារយៈពេល ៣ ថ្ងៃ ដើម្បីចូលរួមប្រជុំនៅរាជធានីភ្នំពេញ

បានផុស

នៅ

​រដ្ឋមន្ត្រីការបរទេស​សហរដ្ឋអាមេរិក លោក Antony J. Blinken នឹងធ្វើ​ដំណើរ​មកដល់​ទីក្រុង​ភ្នំពេញ នា​ថ្ងៃទី​ ០៣ ខែសីហា ឆ្នាំ​ ២០២២ ខាងមុខ ដើម្បី​ចូលរួម​កិច្ចប្រជុំ​រដ្ឋមន្ត្រីការបរទេស​សហរដ្ឋអាមេរិក​-​អាស៊ាន ដែល​កម្ពុជា​ធ្វើជា​ម្ចាស់ផ្ទះ ហើយ​ដំណើ​មក​ចូលរួម​ប្រជុំ​នេះ ធ្វើឡើង​រយៈពេល​៣ ថ្ងៃ​ដោយ​ចាប់ពី​ថ្ងៃទី​ ០៣ ដល់​ថ្ងៃទី ​០៥ ខែសីហា ឆ្នាំ ​២០២២ នេះ​បើ​យោងតាម​ការ​ឲ្យ​ដឹង​ពី​ស្ថានទូត​សហរដ្ឋអាមេរិក​ប្រចាំ​កម្ពុជា​។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

​ស្ថានទូត​បានបញ្ជាក់​ថា កិច្ចប្រជុំ​រដ្ឋមន្ត្រីការបរទេស​សហរដ្ឋអាមេរិក និង​អាស៊ាន ជា​ផ្នែក​មួយ នៃ​កិច្ចប្រជុំ​កំពូល​អាស៊ី​បូព៌ា និង​វេទិកា​តំបន់​អាស៊ាន ដែល​លោក Antony J. Blinken នឹងធ្វើ​ការបញ្ជាក់​ពី​ការប្តេជ្ញាចិត្ត​របស់​សហ​រដ្ឋ​អាមេរិក​ចំពោះ​ម​ជ្ឈ​ភាព​អាស៊ាន និង​ការអនុវត្ត​ប្រកបដោយ​ជោគជ័យ នៃ​ទស្សនវិស័យ​អាស៊ាន ស្តីពី​តំបន់​ឥណ្ឌូ​ប៉ាស៊ីហ្វិក​។​

​នៅពេល​ស្នាក់នៅ​ប្រទេស​កម្ពុជា លោក Antony J. Blinken ក៏​នឹង​ជួប​ទ្វេភាគី​ផងដែរ ជាមួយ​សម្តេច​តេ​ជោ ហ៊ុន សែន និង​លោក​ឧបនាយករដ្ឋមន្ត្រី ប្រាក់​សុខុន ដើម្បី​ពិភាក្សា​ពី​ការគាំទ្រ​របស់​សហរដ្ឋ​អាមេរិក ចំពោះ​អាស៊ាន និង​កិច្ចខិតខំ​ប្រឹងប្រែង​ក្នុងការ​ពង្រឹង​នូវ​ទំនាក់ ទំនង​ទ្វេភាគី​ជាមួយ​កម្ពុជា ។​

​កម្ពុជា​ក្នុងនាម​ប្រធាន​អាស៊ាន នឹង​រៀបចំ​កិច្ចប្រជុំ​រដ្ឋមន្ត្រីការបរទេស​អាស៊ាន លើក​ទី ​៥៥ និង​កិច្ចប្រជុំ​ពាក់ព័ន្ធ (55th AMM and Related Meetings) រួមមាន​ទាំង​សន្និសីទ​ក្រោយ​កិច្ចប្រជុំ​រដ្ឋមន្ត្រីការបរទេស​អាស៊ាន (ASEAN Post Ministerial Conference) កិច្ចប្រជុំ​អាស៊ាន​បូក​ ៣ លើក​ទី​ ២៣ (23rd ASEAN Plus Three) កិច្ចប្រជុំ​កំពូល​អា​ស៊ី​បូព៌ា​លើក​ទី​ ១២ (12th East Asia Summit) និង​វេទិកា​តំបន់​អាស៊ាន លើក​ទី​ ២៩ (29th ASEAN Regional Forum) ចាប់ពី​ថ្ងៃទី​ ៣១ ខែកក្កដា រហូតដល់​ថ្ងៃទី​ ៦ ខែសីហា ឆ្នាំ ​២០២២ នៅ​រាជធានី​ភ្នំពេញ តាម​ទម្រង់​ដោយផ្ទាល់​។​

​បើតាម​ក្រសួងការបរទេស​បាន​ឲ្យ​ដឹងថា នៅក្នុង​កិច្ចប្រជុំ​ថ្នាក់​រដ្ឋមន្ត្រីការបរទេស​អាស៊ាន និង​កិច្ចប្រជុំ​ពាក់ព័ន្ធ ដែល​កម្ពុជា​ធ្វើជា​ម្ចាស់ផ្ទះ​នោះ នឹងមាន​ការចូលរួម​រហូតដល់​ទៅដល់​៣៨ ប្រទេស (៣៩ ទាំង​កម្ពុជា​) ក្នុងនោះ រដ្ឋមន្ត្រីការបរទេស នៃ​បណ្តា​ប្រទេស​ធំៗ ដូចជា​រដ្ឋមន្ត្រីការបរទេស សហរដ្ឋអាមេរិក (​លោក Antony Blinken), រដ្ឋមន្ត្រីការបរទេស​ចិន (​លោក Wang Yi), រដ្ឋមន្ត្រីការបរទេស​រុស្ស៊ី (​លោក Sergei Lavrov), រដ្ឋមន្ត្រីការបរទេស​ជប៉ុន (​លោក Hayashi Yoshimasa), រដ្ឋមន្ត្រីការបរទេស​ឥណ្ឌា (​លោក S. Jaishankar) និង​រដ្ឋមន្ត្រីការបរទេស​អូស្ត្រាលី (​លោក Penny Wong) ក៏​នឹង​អញ្ជើញ​មក​ចូលរួម​ផងដែរ​។​

​បើតាម​លោក​ឧបនាយករដ្ឋមន្ដ្រី ប្រាក់ សុខុន ក្នុង​កិច្ចប្រជុំ​ដែល​កម្ពុជា​ធ្វើជា​ម្ចាស់ផ្ទះ​នេះ ក៏មាន​កិច្ចប្រជុំ​រវាង​អាស៊ាន និង​ចក្រភព​អង់គ្លេស ដែលជា​ដៃគូ​របស់​អាស៊ាន​លើក​ទី​ ១ បន្ទាប់ពី​អង់គ្លេស​បាន​ចាក​ចេញពី​សហភាព​អឺរ៉ុប​មក​។ ក្រៅពីនេះ អាស៊ាន​ក៏មាន​ប្រទេស​ចំនួន​ ៦ ដែល​នឹង​ចុះហត្ថលេខា​ក្លាយទៅជា​ភាគី នៃ​សន្ធិសញ្ញា​មិ​ត្ដ​ភាព និង​កិច្ចសហប្រតិបត្តិការ នៅក្នុង​តំបន់​អាស៊ាន​។ ចំពោះ​ប្រទេស​ទាំង ​៦ នោះ គឺមាន​ប្រទេស​៣ មកពី​មជ្ឈិម​បូព៌ា រួមមាន ប្រទេស​អេ​មី​រ៉ា​ត​អារ៉ាប់​រួម ប្រទេស​អូ​ម៉​ង់ និង​ប្រទេស​កាតា ហើយ​ប្រទេស​៣​ទៀត មកពី​អឺរ៉ុប រួមមាន ប្រទេស​ក្រិច ប្រទេស​ហូ​ឡង់ និង​ដា​ណឺ​ម៉ាក​។​

​លោក​ឧបនាយករដ្ឋមន្ដ្រី ប្រាក់ សុខុន បាន​ឲ្យ​ដឹង​ដែរ​ថា ប្រទេស​អ៊ុយ​ក្រែ​ន​ក៏បាន​សំណូមពរ​ចង់​ចូលរួម​ជា​ភាគី​ជាមួយ​អាស៊ាន​ដែរ តែដោយសារ​ដាក់ ពាក្យ​យឺត ដូច្នេះ​វាយតម្លៃ​នៃ​ការចូលរួម​របស់​អ៊ុយ​ក្រែ​ន ធ្វើ​មិនទាន់​នោះទេ ប៉ុន្តែ​តាមរយៈ​ការពិភាក្សា​ជាមួយ​អគ្គលេខា ធិ​ការ​អាស៊ាន ប្រទេស​អ៊ុយ​ក្រែ​ន អាច​ចូលរួម​ជា​ភាគី​ជាមួយ​អាស៊ាន​បាន​នៅ​ឆ្នាំក្រោយ​។​

​ចំណែក​លោក លុយ ដា​វីត រដ្ឋលេខាធិការ​ក្រសួងការបរទេស និង​សហប្រតិបត្តិការ អន្តរជាតិ បាន​ឲ្យ​ដឹងថា សម្រាប់​កិច្ចប្រជុំ​ខាងលើនេះ តាម​កម្មវិធី នៅ​ថ្ងៃទី​ ៣០ និង​ ៣១ ខែកក្កដា មានការ​ប្រជុំ​ថ្នាក់​អគ្គនាយក ដើម្បី​ចរចា​ទៅលើ​ការរៀបចំ​អត្ថបទ​ទាំងអស់ សម្រាប់​កិច្ចប្រជុំ ហើយ​នៅ​ថ្ងៃទី​ ០១ ខែសីហា ចាប់ផ្តើម​កិច្ចប្រជុំ​ថ្នាក់​ឧ​ត្ត​ម​មន្ត្រី​អាស៊ាន​។ រីឯ​កិច្ចប្រជុំ​ថ្នាក់​រដ្ឋមន្ត្រី​កាបរទេស ចាប់ផ្តើម​នៅ​ថ្ងៃទី ​០២ ខែសីហា​។​

​សូមបញ្ជាក់ថា AMM ត្រូវបាន​បង្កើតឡើង​នៅ​ឆ្នាំ​ ១៩៦៧ ដោយ​សេចក្ដីថ្លែងការណ៍ រាជធានី​បាងកក បន្ទាប់ពី​អាស៊ាន​ត្រូវបាន​បង្កើតឡើង​។ AMM ប្រជុំ​យ៉ាងហោចណាស់​ ៤​ ដង ក្នុង​មួយឆ្នាំ ហើយ​អាច​កោះប្រជុំ​ពិសេស​នៅពេល​ចាំបាច់ ដើម្បី​ពិភាក្សា​អំពី​បញ្ហា ដែល​ទាមទារ​ឲ្យ​មានការ​យកចិត្តទុកដាក់​បន្ទាន់​ពី​អាស៊ាន​។ AMM ពិនិត្យ និង​ពិភាក្សា ជា​ទៀងទាត់ អំពី​កិច្ចខិតខំ​ប្រឹងប្រែង​កសាង​សហគមន៍​អាស៊ាន និង​ទិសដៅ​ជា​យុទ្ធសាស្ត្រ​របស់ខ្លួន ក៏ដូចជា​ការប្រព្រឹត្តទៅ​នៃ​ទំនាក់ទំនង​ខាងក្រៅ របស់​អាស៊ាន​៕

អត្ថបទ៖ កោះ​កែវ​

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានអន្ដរជាតិ១៣ នាទី មុន

រុស្ស៊ី កាន់តែមានព័ស្តុតាង អ៊ុយក្រែន ជាប់ពាក់ព័ន្ធការវាយប្រហារភេរវកម្ម មិនអាចប្រកែកបាន

ព័ត៌មានអន្ដរជាតិ១១ ម៉ោង មុន

តុលាការឧក្រិដ្ឋកម្មទីក្រុងបាងកក កាត់ទោសមនុស្សជិត ៧០នាក់ពាក់ព័ន្ធនឹងការតវ៉ាដ៏ធំ កាលពីឆ្នាំ ២០០៨

ព័ត៌មានជាតិ១៦ ម៉ោង មុន

រដ្ឋបាលខណ្ឌប្ញស្សីកែវ ឆ្លើយតបចំពោះការផ្សព្វផ្សាយព័ត៌មានមិនពិត ប៉ះពាល់ដល់រដ្ឋបាលខណ្ឌ

ព័ត៌មានជាតិ១៦ ម៉ោង មុន

អភិបាលរងខេត្តស្វាយរៀងថា ធនធានមនុស្សជំនាញ ​​ជួយជំរុញ​ទាក់ទាញដល់​អ្នក​​វិនិយោគ​

ព័ត៌មានជាតិ១៦ ម៉ោង មុន

កម្ពុជា នឹងកែក្រមទាំង៤ឡើងវិញឱ្យត្រូវនឹងបញ្ហាសង្គមបច្ចុប្បន្ន ដោយប្រើកូនខ្មែរសុទ្ធសាធ លែងពឹងបរទេស

Sokha Hotels

ព័ត៌មានពេញនិយម