គណបក្សប្រជាជនកម្ពុជា​រាជធានីភ្នំពេញ​គាំទ្រទាំងស្រុង​ចំពោះ​ ការធ្វើវិសោធនកម្ម​រដ្ឋធម្មនុញ្ញ​លើកទី១០​ ​

សមាជិក សមាជិកា​គណៈកម្មាធិការ​គណបក្សប្រជាជនកម្ពុជា​ រាជធានីភ្នំពេញ ​នៅថ្ងៃ ៣០ ខែកក្កដា នេះ ​បានចេញសេចក្តីថ្លែងការណ៍​ប្រកាសគាំទ្រទាំងស្រុង​ចំពោះការធ្វើវិសោធនកម្ម​រដ្ឋធម្មនុញ្ញ​ លើក​​ទី១០ របស់កម្ពុជា។​

នៅក្នុង​ញត្តិគាំទ្រ បានកត់សម្គាល់ថា​ ការធ្វើវិសោធនកម្មនេះ គឺដើម្បីបម្រើឧត្តមប្រយោជន៍ជាតិ​ ធានាឱ្យដល់ស្ថាប័នជាតិ ជាពិសេសរាជរដ្ឋាភិបាលមានដំណើរការប្រព្រឹត្តទៅដោយរលូន មិន​មាន​ការជាប់គាំង និងធានាបាននិរន្តរភាពនៅគ្រប់កាលៈទេសៈ។

ការធ្វើវិសោធនកម្មលើកទី ១០ នេះ ​ជាការបំពេញភាពចន្លោះប្រហោងនៃច្បាប់​ ដោយពុំបានប៉ះពាល់​ដល់គោលការណ៍គ្រឹះនៃរដ្ឋធម្មនុញ្ញដូចជា របបប្រជាធិបតេយ្យសេរីពហុបក្ស និងរបបរាជា​និយម​អាស្រ័យរដ្ឋធម្មនុញ្ញ ​ហើយក៏ពុំបានធ្វើឡើងនៅក្នុងប្រទេស​កំពុងស្ថិតនៅក្នុងភាពអាសន្នឡើយ។​

សេចក្តីព្រាងច្បាប់ធម្មនុញ្ញស្តីពីការស្នើសុំធ្វើវិសោធនកម្ម មាត្រា១៩ ថ្មី(មួយ)​ មាត្រា៨៩ មាត្រា៩៨ថ្មី មាត្រា ១០២ថ្មី មាត្រា១១៩ថ្មី (មួយ) និងមាត្រា១២៥ ថ្មី នៃរដ្ឋធម្មនុញ្ញ និង​មាត្រា ៣ថ្មី និងមាត្រា ៤ថ្មី នៃច្បាប់ធម្មនុញ្ញនៃព្រះរា​ជាណាចក្រកម្ពុជា ត្រូវបានរដ្ឋសភា​អនុម័ត​ទាំងស្រុងក្រោមសំឡេង ១០៥ លើ១០៦ ក្នុងសម័យប្រជុំពេញអង្គនាព្រឹកថ្ងៃទី២៨ ខែកក្កដា ឆ្នាំ​២០២២៕

អត្ថបទ៖ ស្រីរ័ត្ន