សត្វព្រៃ៣ប្រភេទ បានផុតពូជពីប្រទេសកម្ពុជា

ជារឿងគួរឱ្យសោកស្តាយមួយដែលប្រទេសកម្ពុជាបានបាត់បង់នូវវត្តមានសត្វព្រៃ ៣ប្រភេទដែលជាសត្វកម្រ ហើយត្រូវបានគេសង្ស័យថា សត្វព្រៃមួយចំនួនដែលបានផុតពូជនេះ បណ្តាលមកពីការលបដាក់អន្ទាក់ និងបរបាញ់ខុសច្បាប់។សត្វព្រៃ៣ប្រភេទនេះ គឺរួមមាន សត្វរមាស សត្វគោព្រៃ និងសត្វខ្លាធំ។

រដ្ឋលេខាធិកាក្រសួងបរិស្ថាន លោក នេត្រ ភក្រ្តា បានលើកឡើងថា សត្វរមាស ជាសត្វកម្រនៅលើពិភពលោក ប៉ុន្តែ ភាគច្រើនសម្បូរនៅពាសពេញតំបន់អាស៊ីអាគ្នេយ៍ ជាពិសេស នៅប្រទេសឥណ្ឌា និង ចិន។ កម្ពុជា ក៏ធ្លាប់ជាប្រទេសសម្បូររមាសដូចគ្នានៅក្នុងសម័យបុរាណ ប៉ុន្តែក្នុងកំលុងឆ្នាំ១៩៣០ គេមិនបានឃើញមានវត្តមានសត្វរមាសនៅប្រទេសកម្ពុជាទៀតឡើយ។ កម្ពុជា ត្រូវបានសន្មតដោយអ្នកជំនាញថា បាត់បង់សត្វរមាសតាំងពីពេលនោះមក។ 

ចំពោះសត្វគោព្រៃ ដែលជាសត្វតំណាងឱ្យប្រទេសកម្ពុជាវិញ ត្រូវបានគេឃើញលើកចុងក្រោយក្នុងឆ្នាំ១៩៨៨។ តាំងពីពេលនោះមកដល់បច្ចុប្បន្នគេមិនបានឃើញមានវត្តមានគោព្រៃនៅប្រទេសកម្ពុជាទៀតឡើយ។

ចំណែកសត្វខ្លាធំ ជាសត្វមានអំណាច និងកាចសាហាវផងនោះ ក៏លែងមានវត្តមាននៅកម្ពុជាដូចគ្នា។ គេឃើញសត្វខ្លាធំនេះលើកចុងក្រោយនៅឆ្នាំ២០០៧។ បន្ទាប់ពីបាត់វត្តមានរយៈពេល ១៥ឆ្នាំមក សត្វខ្លាធំ ត្រូវបានអ្នកជំនាញគិតថាបានផុតពូជបាត់ទៅហើយ ដោយមូលហេតុប្រហែល​មកពីការលបដាក់អន្ទាក់ក្នុងព្រៃ។ ទន្ទឹមនឹងបញ្ហានេះ ក្រសួងបរិស្ថាន និងមន្រ្តីពាក់ព័ន្ធបានព្យាយាមខ្នះខ្នែងការពារជីវិតសត្វព្រៃបន្ថែមទៀតតាមរយៈការអភិរក្ស ការចាត់វិធានការច្បាប់ និងការដោះអន្ទាក់នៅក្នុងព្រៃ និងផ្តល់សុវត្ថិភាពដល់សត្វព្រៃផងដែរ។ 

គួរបញ្ជាក់ថា ក្រសួងបរិស្ថាន និងអង្គការពាក់ព័ន្ធ ដែលមានតួនាទីអភិរក្សសត្វព្រៃក៏បានធ្វើការអំពាវនាវដល់សា​ធា​រ​ណជនបញ្ឈប់ការបរបាញ់សត្វព្រៃ ជួញដូរ និងការបរិភោគសាច់សត្វព្រៃគ្រប់ប្រភេទ ព្រមទាំងជួយអភិរក្សសត្វព្រៃនៅក្នុងប្រទេសកម្ពុជាទៀតផង។ យ៉ាងណាមិញ ទោះបីកម្ពុជា បានផុតពូជនូវប្រភេទសត្វដ៏កម្រទាំងបីនេះ ប៉ុន្តែកម្ពុជាក៏បានរកឃើញនូវសត្វប្រភេទថ្មីនៅភូមិភាគឦសាន ក្នុងខេត្តមណ្ឌលគិរី និងព្យាយាមអភិរក្សឱ្យបានគង់វង្សផងដែរ៕

ដោយ៖ អុន ស្រីមាន