ក្រសួងទេសចរណ៍ បានប្រកាសលើកលែងកតព្វកិច្ចស្នើសុំការវាយតម្លៃចំណាត់ថ្នាក់សណ្ឋាគារ និងសេវាកម្ម ស្នាក់នៅទេសចរណ៍ ចំពោះអាជីវកម្មស្នាក់នៅដែលជាប្រភេទសហគ្រាសធុនមធ្យម និងធុនតូចទាំងអស់ តាមសេចក្តីជូនដំណឹងលេខ ៣៦ សជណ.ហធ ចុះថ្ងៃទី២១ ខែមករា ឆ្នាំ២០២១ របស់ទីស្តីការគណៈរដ្ឋមន្រ្តី ស្តីពីលទ្ធផលកិច្ចប្រជុំគណៈកម្មាធិការលើកស្ទួយសហគ្រានធុនតូច និងមធ្យមលើកទី២ នាថ្ងៃទី ៨ សីហា ឆ្នាំ ២០២២។

បើតាមក្រសួងទេសចរណ៍ ចំពោះការលើកលែងស្នើសុំវាយតម្លៃចំណាត់ថ្នាក់នេះ គឺដើម្បីជំរុញដល់ការបើកអាជីវកម្ម​ឱ្យមានដំណើរការឡើងវិញ បន្ទាប់ពីវិបតិ្តកូវីដ-១៩ បានលុកលុយអស់រយៈពេលជាច្រើនឆ្នាំមកនេះ ដោយសហគ្រាស អាជីវកម្មសណ្ឋាគារ និងសេវាកម្មស្នាក់នៅជាប់ពន្ធតូច និងមធ្យម មិនចាំបាច់ធ្វើការស្នើសុំវាយតម្លៃ ចំណាត់ថ្នាក់​នោះឡើយ។ ប៉ុន្តែ ប្រសិនបើប្រភេទអាជីវកម្មខាងលើចង់ធ្វើការវាយតម្លៃចំណាត់ថ្នាក់ អាចស្នើសុំដល់គណៈកម្មការ​រៀបចំនិងវាយតម្លៃចំណាត់ថ្នាក់សណ្ឋាគារ និងសេវាកម្មស្នាក់នៅទេសចរណ៍ (គ.រ.ច.) បានធម្មតា។

ចំណែកអាជីវកម្មស្នាក់នៅដែលជាសហគ្រាសធុនធ្ងន់ជាប់ពន្ធធំ គឺនៅតែធ្វើការស្នើសុំវាយ តម្លៃចំណាត់ថ្នាក់ជាធម្មតា ដោយគ្មានការលើកលែងនោះឡើយ៕ អត្ថបទ៖ នាង រតនៈ