Connect with us

ព័ត៌មានជាតិ

ក្រុមហ៊ុនមួយគ្រោងអភិវឌ្ឍន៍តំបន់អេកូទេសចរណ៍នៅស្រុកកំពង់សីលា

បានផុស

នៅ

លោកអភិបាលរងខេត្តព្រះសីហនុ និងក្រុមការងាររបស់ក្រសួងបរិស្ថាន បានចុះទៅត្រួតពិនិត្យទីតាំងភូមិសាស្ត្រ ដែលមានសក្តានុពលខាងវិស័យទេសចរណ៍ និងធម្មជាតិ ក្រោយពីក្រុមហ៊ុនផលិតថ្នាំពេទ្យមួយ បានស្នើសុំជួលដីបរិស្ថានក្នុងទំហំដីជាង១០ហិកតា នៅក្នុងស្រុកកំពង់សីលា ខេត្តព្រះសីហនុ កាលពីថ្ងៃទី១០ ខែសីហា ឆ្នាំ២០២២។ ប៉ុន្តែ នៅមិនទាន់មានការសម្រេចយ៉ាងណានៅឡើយទេ។

លោក ឡុង ឌីម៉ង់ អភិបាលរងខេត្តព្រះសីហនុ បានប្រាប់ “កម្ពុជាថ្មី” ថា ក្រុមហ៊ុន ហ្វាម៉ា ឃ៊ែរ បានស្នើ​ជួល​ដី​១០​ហិក​តា​ នៅជិតដីកម្មសិទ្ធិរបស់ខ្លួន ដែលកំពុងវិនិយោគលើផលិតផលថ្នាំពេទ្យនៅកម្ពុជា និងអភិវឌ្ឍន៍ធុរេនដែលទទួលបានផលរាប់តោនក្នុងមួយឆ្នាំៗ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការស្នើនេះ ក្នុងគោលបំណងអភិវឌ្ឍន៍ខាងវិស័យអេកូទេសចរណ៍ គ្មានការកាប់ទន្ទ្រានព្រៃឈើ និងបំផ្លាញជម្រកសត្វព្រៃឡើយ។ ចំពោះការត្រួតពិនិត្យរបស់អាជ្ញាធរវិញ គឺលោកបានទៅពិនិត្យក្នុងគោលបំណងចង់ដឹងថា តើគម្រោងនោះ មានការប៉ះពាល់ដល់ជីវចម្រុះ និងសត្វព្រៃដែរឬទេ? ជាពិសេស នៅតំបន់នោះ មានដំរីរស់នៅ ៥ក្បាល ប៉ុន្តែ ពួកវារស់នៅឆ្ងាយពីកន្លែងគ្រោងនឹងអភិវឌ្ឍន៍នោះ។ យ៉ាងណាមិញ សំណើរនេះ នៅមិនទាន់បានអនុម័តដោយក្រសួងនៅឡើយទេ។ 

គួរបញ្ជាក់ថា ក្រុមហ៊ុននេះ ក៏មានគម្រោងក្នុងការសាងសង់រូបព្រះពុទ្ធបដិមាដ៏ធំនៅតំបន់នោះ ដើម្បីទាក់ទាញភ្ញៀវទេសចរ ហើយក៏ផ្តល់ភាពងាយស្រួលដល់ប្រជាជនដែលមានបំណងចង់ទៅធ្វើសមាធិនៅលើភ្នំដែលមានទេសភាពស្រស់ស្អាតផង។ ក្នុងនោះ បន្ទាប់ពីមានការត្រួតពិនិត្យរួច ក៏មានកិច្ចពិភាក្សាលើសំណើរមួយនេះ ដោយមានការគាំទ្រលើគម្រោងអភិវឌ្ឍន៍ ភ្ជាប់នឹងធម្មជាតិនេះ ព្រោះជារឿងល្អ ក្នុងការថែរក្សាព្រៃឈើ និងអភិរក្សសត្វព្រៃនៅទីនោះ។ ការអភិវឌ្ឍអេកូទេសចរណ៍ គឺគ្មានការកាប់ទន្រ្ទានព្រៃឈើឡើយ មានតែការអភិរក្សបន្ថែម ដែលទាំងនេះអាចជួយដល់បរិស្ថាន និងសេដ្ឋកិច្ចកម្ពុជាតាមវិស័យទេសចរណ៍។ នេះបើតាមការបញ្ជាក់របស់លោក ឡុង ឌីម៉ង់។

លោក ឡុង ឌីម៉ង់ មានប្រសាសន៍ថា៖ “ប្រសិនមានការអនុញាតគម្រោងនេះហើយ យើងក៏បានស្នើឱ្យក្រុមហ៊ុនសហការជាមួយអង្គការអភិរក្សសត្វព្រៃ ជាពិសេសសត្វដំរី អាចរៀបចំផ្លូវដើរ កុំឱ្យមានផលប៉ះពាល់ដល់ដំរីនៅទីនោះ។ ហើយដំរីនឹងទៀត ខ្ញុំគិតថាអាចមានភាពទាក់ទាញ ដល់ភ្ញៀវទេសចរមកកម្សាន្តទីនេះច្រើន”។ លោកក៏បានស្នើសុំឱ្យមានការជ្រើសរើសយកពលរដ្ឋនៅក្បែរនោះឱ្យមានការងារធ្វើ ជាមួយក្រុមហ៊ុន ប្រសិនបើ គម្រោងនេះ​អាចដំណើរការបានដើម្បីឱ្យពលរដ្ឋមានឱកាសបង្កើន សេដ្ឋកិច្ចក្នុងគ្រួសារនីមួយៗ៕ 

ដោយ៖ អុន ស្រីមាន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

កីឡា១៦ នាទី មុន

សំបុត្រ VIP ទស្សនាការប្រកួតរវាង Messi និង Ronaldo តម្លៃខ្ពស់កប់ក្ដោង

ព័ត៌មានជាតិ៣៣ នាទី មុន

ក​.​ប​.​ប ចុះ​ពិសោធន៍​ផលិតផល​ត្រី​ប្រ​ម៉ា​ហើម​និង​ត្រីងៀត​គ្រប់​ប្រភេទ​នៅ​ស្រុក​ក្រគរ​រក​ពុំ​ឃើញ​មាន​សារ​ធាតុគីមី

ព័ត៌មានជាតិ១ ម៉ោង មុន

មន្ទីរសាធារណការខេត្តបន្ទាយមានជ័យចុះផ្សព្វផ្សាយច្បាប់ចរាចរណ៍ផ្លូវគោក ដើម្បី​ជំនួយស្មារតី​ដល់​អ្នកបើកបរ

ជីវិតកម្សាន្ដ២ ម៉ោង មុន

ស្ថាប័ន Miss Grand ថៃ ប្រកាសមិនអនុញ្ញាតឱ្យអតីត Miss Universe ចូលរួមប្រកួតកម្មវិធីរបស់ខ្លួន

ព័ត៌មានជាតិ២ ម៉ោង មុន

ទេសរដ្ឋមន្ត្រី លី ធុជ ចាត់​ទុក​ជំនួយ​របស់​ចិន គឺជា​ផ្នែក​ដ៏​សំខាន់​ក្នុង​ដំណើរការ​ឆ្ពោះទៅ​កម្ពុជា​គ្មាន​មីន​ឆ្នាំ​២០២៥

Sokha Hotels

ព័ត៌មានពេញនិយម