លោកស្រី ជូ ប៊ុនអេង ៖ កម្ពុជា បាននិងកំពុងរិះរកគ្រប់វិធានការ ដើម្បីឆ្លើយតបឲ្យទាន់ពេលទៅលើបញ្ហាជួញដូរមនុស្ស

រាជរដ្ឋាភិបាលកម្ពុជា​ បាននិងកំពុងតែរិះរកគ្រប់វិធានការ ដើម្បីឆ្លើយតបឲ្យបានទាន់ពេល ទៅលើបញ្ហាជួញដូរមនុស្ស ដើម្បីកាត់បន្ថយភាពរងគ្រោះ​របស់ប្រជាពលរដ្ឋ ខណៈអំពើជួញដូរមនុស្ស បាននិងកំពុ​ងកើតឡើងយ៉ាងកក្រើក នៅទូទាំងពិភពលោក។

លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) មានប្រសាសន៍ក្នុងសន្និសីទសារព័ត៌មានស្តីពី «ស្ថានភាពនៃការជួញដូរមនុស្សនៅកម្ពុជា» នៅព្រឹកថ្ងៃទី ១២ ខែសីហានេះថា អំពើជួញដូរមនុស្ស បាននិងកំពុងកើតឡើងយ៉ាងកក្រើក នៅទូទាំងពិភព លោក ដែលជាវិបត្តិសកលមួយ ហើយទោះជាប្រទេសតូច ឬក៏ធំ ក៏ទទួលរងនូវអំពើជួញដូរមនុស្សនេះ ពីព្រោះវាជាឧក្រិដ្ឋកម្មឆ្លងដែន និងមានបណ្ដាញចាត់តាំងថែមទៀត។

មន្ត្រីជាន់ខ្ពស់ក្រសួងមហាផ្ទៃ បានថ្លែងថា ការទប់ស្កាត់ ឬលុបបំបាត់អំពើជួញដូរមនុស្សនេះ មិនអាចនរណាម្នាក់ ធ្វើបានតែឯងនោះទេ។ លោកស្រី ជូ ប៊ុងអេង ថា «ទោះបីរាជរដ្ឋាភិបាល ឬក៏សកលលោក ដែលខំប្រឹងបង្កើតនូវច្បាប់ នូវគោលនយោបាយ បទដ្ឋាន អនុសញ្ញា កតិកាសញ្ញា​ ជាបន្តបន្ទាប់ តែយើងធ្វើក្រោយពេលដែលរឿងវាកើតទេ គឺយើងខិតខំជំរុញស្ថានភាព ដើម្បីរត់ឲ្យទាន់ទៅស្កាត់មុខ ប៉ុន្តែមានពេលខ្លះ យើងដឹងហើយថា កលល្បិចជនល្មើស តើវាការបត់បែនប៉ុណ្ណា?»។

អនុប្រធានអចិន្ត្រៃយ៍ នៃគណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានថ្លែងបន្ថែមថា រាជរដ្ឋាភិបាលកម្ពុជា មិនអះអាងថា ជាប្រទេសដែលសក្ដានុពលខ្ពស់ នៅក្នុងការប្រយុទ្ធប្រឆាំងអំពើជួញដូរមនុស្សឥតខ្ចោះនោះដែរ ហើយក៏មិនមែនមានន័យថា អ្វីដែលកម្ពុជាធ្វើសុទ្ធតែល្អត្រឹមត្រូវ ឬសុទ្ធតែមានប្រសិទ្ធភាពនោះដែរ។

លោកស្រី ជូ ប៊ុនអេង បានលើកឡើងថា «ពីព្រោះយើងដឹងហើយថា វានៅតែកើតមានៗ នូវអំពើជួញដូរមនុស្ស អញ្ចឹងហើយដែលរាជរដ្ឋាភិបាល បាននិងកំពុងតែរិះរកគ្រប់វិធានការ ដើម្បីឆ្លើយតបឲ្យបានទាន់ពេល ពីព្រោះយើងចង់កាត់បន្ថយភាពរងគ្រោះ​ របស់ប្រជាពលរដ្ឋ»។

អនុប្រធានអចិន្ត្រៃយ៍ គ.ជ.ប.ជ បានលើកឡើងទៀតថា នាពេលបច្ចុប្បន្ននេះ វិទ្យាសាស្រ្ដកាន់តែទំនើប ហើយល្បិចកលរបស់ឧក្រិដ្ឋជនជួញដូរមនុស្ស ក៏កាន់តែជឿនលឿនណាស់ដែរ។ ត្រង់ចំណុចនេះ លោកស្រី ជូ ប៊ុនអេង បានបញ្ជាក់ថា «ពីព្រោះបើយើងប្រើវិទ្យាសាស្រ្ដ យើងប្រើព័ត៌មានវិទ្យា សម្រាប់ធ្វើការបង្រ្កាប អំពើជួញដូរមនុស្ស តែកុំភ្លេចជនល្មើសក៏គេចេះប្រើដែរ ហើយមានពេលខ្លះ គេមានភាពវៃឆ្លាតជាងយើងទៅទៀត ពីព្រោះគេត្រៀមលក្ខណៈនៅក្នុងការធ្វើឧក្រិដ្ឋកម្មនេះ»៕​

អត្ថបទ៖ ឃួន សុភ័ក្រ