មកដឹងអត្ថន័យនៃពាក្យ “អតិរេក និង ជវភាព” ក្នុងភាសាសេដ្ឋកិច្ច

សព្វថ្ងៃមានមនុស្សជាច្រើន យល់ច្រឡំប្រើពាក្យ អតិរេក និងជវភាព ខុស ឬកែអក្ខរាវិរុទ្ធទៅជា អធិរាជ និង ជីវភាព ទៅវិញ។​

ថ្ងៃនេះ“កម្ពុជាថ្មី​​” នឹងពន្យល់ប្រិយមិត្តអ្នកអានឱ្យបានយល់ន័យពាក្យទាំងពីរនេះ នៅក្នុងភាសាសេដ្ឋកិច្ច ឱ្យបានយល់កាន់តែច្បាស់។

យោងតាមវចនានុក្រមសម្តេចសង្ឃ ជួន ណាត់ បានពន្យល់ថា ពាក្យ «អតិរេក» មានន័យថា​ ច្រើនក្រៃ ច្រើនលើស ដែលលើសពីកំណត់ ដែលហួសពីចំនួន ហ៊ឹកហ៊ាក់ អធិកអធម ជាដើម។

ឧទាហរណ៍៖ បន្ទាប់ពីបានដាក់ឱ្យអនុវត្តកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈរួចមក រាជរដ្ឋាភិបាលសម្រេចបានជាមូលដ្ឋាននូវ «ភាពជឿទុកចិត្តនៃថវិកា»តាមរយៈការបង្កើនចំណូលនិងការ​ធ្វើវិចារណកម្មចំណាយជាពិសេសបង្កើនបាននូវ អតិរេក នៃថវិកាជាតិ ដែលអនុញ្ញាត​ឱ្យបង្កើនទុន​វិនិយោគសាធារណៈលើហេដ្ឋារចនាសម្ព័ន្ធ សង្គមសេដ្ឋកិច្ចក្នុងគោលដៅពង្រឹងនិងពង្រីកសេវាសាធារណៈ និង កាត់បន្ថយភាពក្រីក្ររបស់ប្រជាជន។

នៅក្នុងសេដ្ឋកិច្ច ពាក្យនេះសំដៅដល់ចំណូលច្រើនជាងចំណាយ ឬក៏ចំណាយមិនអស់ទៅតាមផែនការដែលបាន​គ្រោងទុក។ អតិរេកមានដូចជា អតិរេកថវិកា អតិរេកពាណិជ្ជកម្ម ជាដើម។

ដោយឡែកពាក្យ​ «ជវភាព» មានន័យថា សន្ទុះ ល្បឿននៃការកើនឡើង។ ឧទាហរណ៍ៈ អាជីវកម្មជាច្រើននៅកម្ពុជា មានជវភាពឡើងវិញគួរឱ្យកត់សម្គាល់បន្ទាប់ពីកូវីដ-១៩ បានធូរស្បើយ៕​

អត្ថបទ៖ នាង រតនៈ