លោក ហេង សួរ៖ ការសម្រេចបានតួលេខប្រាក់ឈ្នួលកម្មករយឺតឬលឿន អាស្រ័យលើភាគីនិយោជក និងភាគីកម្មករ

លោក ហេង សួរ ប្រធានលេខាធិការដ្ឋានក្រុមប្រឹក្សាជាតិប្រាក់ឈ្នួលអប្បបរមាបានមានប្រសាសន៍ថា ការសម្រេចបានតួលេខប្រាក់ឈ្មួលកម្មករសម្រាប់ឆ្នាំ២០២៣នេះយឺតឬលឿននោះ វាអាស្រ័យទៅលើភាគីនិយោជក និងភាគីកម្មករនិយោជិត​​ដែលមានការយល់យោគនិងអធ្យាស្រ័យគ្នាទៅវិញទៅមកទេ។ លោកបានបន្តថា ចំណែកភាគីរាជរដ្ឋាភិបាលគ្រាន់ជាអ្នកសម្រួលសម្រួលនិងដាក់តួលេខមួយជាបន្ទាត់សម្រាប់ឱ្យភាគីទាំងពីរពិចារណាប៉ុណ្ណោះ។

ថ្លែងប្រាប់អ្នកសារព័ត៍មានក្រោយពីកិច្ចក្រុមប្រឹក្សាជាតិប្រាក់ឈ្នួលអប្បបរមានៅព្រឹកថ្ងៃទី២៤ ខែសីហា នេះ លោក
ហេង សួរ បានបន្តថា កិច្ចប្រជុំប្រាក់ឈ្នួលលើកទី២នៅមិនទាន់ទទួលបានលទ្ធផលអ្វីនៅឡើយទេដោយភាគីនីមួយៗបានប្រជុំផ្ទៃក្នុងភាគីរបស់ខ្លួនចំនួន២លើករៀងៗខ្លួនហើយភាគីទាំងពីរបានលើកហេតុផល និងបង្ហាញនូវគោលជំហរផ្ទៃក្នុងរបស់ខ្លួនទៅវិញទៅមកប្រកបដោយវិជ្ជាជីវៈ និងភាពចាស់ទុំអំពីសំណើរបស់ខ្លួន។

លោកបានបន្តទៀតថា ភាគីពាក់ព័ន្ធបានឯកភាពគ្នាកំណត់កិច្ចពិភាក្សាបន្តទៀតនៅម៉ោង ២:៣០នាទីរសៀល ថ្ងៃទី៣១ ខែសីហា ឆ្នាំ២០២២។ លោកបានបន្ថែមថា «ការចង់បាននូវតួលេខប្រាក់ឈ្មួលមួយយឺតឬលឿនវាអាស្រ័យលើភាគីនយោជកនិងភាគីកម្មករនិយោជិតដែលចេះយោគយល់និងអាធ្យាស្រ័យគ្នាទៅវិញទៅមកពិសេសប្រជុំនៅថ្ងៃទី៣១សីហាខាងមុខបើសិនជាមានវឌ្ឍនភាពឬមានភាពប្រហាក់ប្រហែលគ្នាឬមួយភាគីទាំងពីរអាចលើកជាជំហរសុំត្រឹមតែប៉ុណ្ណឹងកិច្ចប្រជុំអាចនឹងបញ្ចប់មុនថ្ងៃទី២២ឬ២៣កញ្ញា»។ លោកបានបន្ថែមថា កិច្ចប្រជុំនៅសល់៥លើកទៀតគឺនៅថ្ងៃទី២៤,ទី៣១​ខែសីហា,ទី៧,ទី១៤,ទី២២និងទី២៣ខែកញ្ញាឆ្នាំ២០២២។

លោក ហេង សួរ បានបញ្ជាក់ថា យ៉ាងណាក៏ដោយកិច្ចប្រជុំប្រាក់ឈ្មួលនេះនឹងធ្វើជាបន្តបន្ទាប់ទៀតព្រោះថា ជាធម្មតាការកំណត់ប្រាក់ឈ្មួលវាអាស្រ័យទៅលើវិនិច្ឆ័យទាំង៧ចំណុចដូចគ្នាតែការឱ្យពិន្ទុភាគីនីមួយៗមានលក្ខណៈខុសៗគ្នាហើយក្រៅពីនេះមានព័ត៍ទិន្នន័យផ្សេងទៀតសម្រាប់យកមកពិចារណាដែលទាមទារឱ្យភាគីនីមួយៗត្រូវចូលមកជជែកនិង
ពន្យល់គ្នាទៅវិញទៅមក។ លោកបានបញ្ជាក់ថា ទោះបីជាភាគរាជរដ្ឋាភិបាលមានតួលេខក្តីតែគ្រាន់ជាបន្ទាត់មួយសម្រាប់ភាគីពាក់ព័ន្ធយកទៅពិចារណាធ្វើការប្រៀបធៀបដើម្បីបង្ខិតឬតម្លើងតួលេខនៃគោលជំហររបស់ខ្លួនប៉ុណ្ណោះ។

គួរបញ្ជាក់ថា ប្រាក់ឈ្មួលកម្មករនិយោជិតសម្រាប់ឆ្នាំ២០២២នេះទទួលបាន១៩៤ដុល្លារអាមេរិកក្នុង១ខែ ដោយមិនគិតប្រាក់អត្ថប្រយោជន៍ផ្សេងៗទៀតនោះទេ៕

អត្ថបទ៖ សំអឿន