ព័ត៌មានអន្ដរជាតិ

មន្រ្តីអាមេរិក ទម្លាយថា ទាហានអាមេរិកជិត ១០០នាក់បានរងរបួស ក្នុងការវាយប្រហារនៅខែនេះ

បានផុស

៤ ម៉ោង មុន

នៅ

ថ្ងៃអង្គារ ២១ កក្កដា ២០២៦

ដោយ

សហរដ្ឋអាមេរិក បានចាប់ផ្តើមការវាយប្រហារតាមអាកាសក្នុងរយៈពេលចុងក្រោយនេះ ប្រឆាំងនឹងអ៊ីរ៉ង់ចំនួន ១០យប់ជាប់ៗគ្នា ក្នុងនោះអ៊ីរ៉ង់ក៏បានសងសឹកចូលទៅក្នុងប្រទេសក្នុងតំបន់មជ្ឈិមបូព៌ាយ៉ាងចាស់ដៃ ដោយបណ្តាលឱ្យយោធាអាមេរិកស្លាប់យ៉ាងតិច៣នាក់ និងរបួសច្រើននាក់។

មន្ត្រីសហរដ្ឋអាមេរិកបានប្រាប់សារព័ត៌មាន CBS News នៅថ្ងៃទី២០ ខែកក្កដា ឆ្នាំ២០២៦ ថា សមាជិកយោធាអាមេរិកជិត ១០០នាក់ បានរងរបួសនៅក្នុងការវាយប្រហារតាមអាកាសជាបន្តបន្ទាប់របស់អ៊ីរ៉ង់ទៅលើមូលដ្ឋានយោធានៅទូទាំងមជ្ឈិមបូព៌ាក្នុងខែនេះ។

មន្ត្រីទាំងនោះនិយាយថា ទាហានភាគច្រើនបានវិលត្រឡប់ទៅបំពេញកាតព្វកិច្ចវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរបស់មន្ទីរបញ្ចកោណ លោក Sean Parnell បានបញ្ជាក់ពីចំនួននេះ នៅក្នុងសេចក្តីថ្លែងការណ៍មួយទៅកាន់សារព័ត៌មាន CBS News ដោយនិយាយថា ទាហានជិត ១០០នាក់ ត្រូវបានចាត់ថា មានរបួស ចាប់តាំងពីថ្ងៃទី៧ ខែកក្កដា ឆ្នាំ ២០២៦ យ៉ាងណា ៩៦% នៃពួកគេ បានត្រឡប់ចូលសមរភូមិវិញ។

លោកនិយាយថា៖ « ពួកគេប្តេជ្ញាចិត្តវិលត្រឡប់ទៅប្រយុទ្ធវិញ។ ភាគច្រើននៃរបួស គឺជាការប៉ះទង្គិចខួរក្បាលតិចតួច»។

របាយការណ៍នេះបានកើតឡើង ពេលសហរដ្ឋអាមេរិកបន្តអនុវត្តការវាយប្រហារតាមអាកាសប្រឆាំងនឹងអ៊ីរ៉ង់ ដោយការវាយប្រហារភាគច្រើនផ្តោតលើភាគខាងត្បូងអ៊ីរ៉ង់។

ទីក្រុងតេហេរ៉ង់បានសងសឹកដោយការវាយប្រហារផ្តោតលើកន្លែង និងមូលដ្ឋាននៅប្រទេសក្នុងតំបន់ជាច្រើន ដែលខ្លួនអះអាងថា ត្រូវបានប្រើប្រាស់ដោយយោធាអាមេរិក។

គួរបញ្ជាក់ថា ការបាញ់ប្រហារគ្នារវាងប្រទេសទាំងពីរបានកើតឡើង ទោះបីជាមានកិច្ចព្រមព្រៀងក្របខ័ណ្ឌសម្របសម្រួលដោយប៉ាគីស្ថាន ចុះហត្ថលេខាក្នុងខែមិថុនា ដើម្បីបញ្ចប់សង្គ្រាម និងឈានដល់កិច្ចព្រមព្រៀងសន្តិភាពយូរអង្វែងក៏ដោយ៕