លោកបណ្ឌិត ហង់ជួន ណារ៉ុន ៖ វិបត្តិកូវីដ-១៩ បានបង្ហាញឲ្យឃើញយ៉ាងច្បាស់ថា គ្រូបង្រៀន គឺជាក្បាលម៉ាស៊ីននៃប្រព័ន្ធអប់រំរបស់យើង

រដ្ឋមន្ត្រីក្រសួងអប់រំ យុវជន និងកីឡា បានកត់សម្គាល់ថា នៅក្នុងស្ថានភាពនៃវិបត្តិជំងឺកូវីដ-១៩ បានបង្ហាញឲ្យឃើញយ៉ាងច្បាស់ថា គ្រូបង្រៀន គឺជាក្បាលម៉ាស៊ីននៃប្រព័ន្ធអប់រំរបស់កម្ពុជា ហើយគ្រូបង្រៀន គឺជាបេះដូងនៃការអប់រំ ផងដែរ។  

លោកបណ្ឌិត ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានថ្លែងក្នុងទិវាគ្រូបង្រៀន ៥តុលា ២០២២ ក្រោមប្រធានបទ «គ្រូបង្រៀនយើង អនាគតយើង ប្រទេសជាតិយើង» ថា ការប្រារព្ធទិវាគ្រូបង្រៀនអន្តរជាតិថ្ងៃនេះ គឺស្របពេលដែលពិភពលោក ក៏ដូចជាព្រះរាជាណាចក្រកម្ពុជា បាននិងកំពុងប្ដេជ្ញាចិត្ត ដើម្បីធ្វើបរិវត្តកម្មអប់រំ និងដោះស្រាយនូវឧបសគ្គចម្បងៗ ដើម្បីជួយគាំទ្រដល់គ្រូបង្រៀនលើគ្រប់ទិដ្ឋភាព ក្នុងដំណើរការនៃការផ្លាស់ប្ដូរ ដែលប្រកប​ដោយភាពស្មុគស្មាញ ក្នុងបរិការណ៍នាពេលបច្ចុប្បន្ននេះ ជាពិសេសក្នុងអំឡុងពេល នៃការស្ដារវិស័យអប់រំចេញពីវិបត្តិកូវីដ-១៩ តាមទស្សនាទាន «គន្លងជីវិតថ្មីក្នុងវិស័យអប់រំ»។

លោកបណ្ឌិត ហង់ជួន ណារ៉ុន លើកឡើងថា «ជាក់ស្ដែង វិបត្តិកូវីដ-១៩ បានបង្ហាញឲ្យឃើញយ៉ាងច្បាស់ថា គ្រូបង្រៀន គឺជាក្បាលម៉ាស៊ីននៃប្រព័ន្ធអប់រំរបស់យើង គ្រូបង្រៀន គឺជាបេះដូងនៃការអប់រំ»។ លោកបន្តថា តួនាទី និងប្រសិទ្ធភាព នៃការបំពេញការងាររបស់គ្រូបង្រៀន ពិតជាមានសារៈសំខាន់ខ្លាំងណាស់ ដើម្បីធានាឲ្យសិស្សានុ-សិស្ស និងនិស្សិតទទួលបានការអប់រំ នៅគ្រប់កាលៈទេសៈ ប្រកបដោយសមធម៌ បរិយាបន្ន និងគុណភាព។

លោករដ្ឋមន្ត្រីក្រសួងអប់រំ យុវជន និងកីឡា លើកឡើងបន្តថា គ្រូបង្រៀន ក៏មានតួនាទីសំខាន់ផងដែរ ក្នុងការស្ដារវិស័យអប់រំឡើងវិញ ចេញពីវិបត្តិកូវីដ-១៩ និងដើម្បីកំណត់អនាគតរបស់អ្នកសិក្សាគ្រប់រូប។ លោកថា «ដូច្នេះ យើងទាំងអស់គ្នាត្រូវលើកកម្ពស់គ្រូបង្រៀន លើកកម្ពស់ការបង្រៀន និងវិជ្ជាជីវៈគ្រូបង្រៀន ដើម្បីឈានទៅសម្រេចអនាគតដ៏ប្រសើររបស់កុមារ និងយុវជនកម្ពុជា»។

ក្នុងរយៈពេល នៃការប្រយុទ្ធប្រឆាំងនឹងជំងឺកូវីដ-១៩ យើងទាំងអស់គ្នាបានមើលឃើញយ៉ាងប្រត្សក្រ នូវតួនាទីរបស់គ្រូបង្រៀនរឹងរឹតតែសំខាន់ជាងមុន ក្នុងការធានាបានទាំងសុវត្ថិភាព សុខភាព និងនិរន្តភាព នៃការសិក្សារបស់សិស្ស។ នេះជាការកត់សម្គាល់របស់លោកបណ្ឌិត ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។

លោកបន្ថែមទៀតថា ក្រៅពីគិតគូរដល់កត្តាសុខភាពរបស់ខ្លួន និងការពារខ្លួនពីការឆ្លងជំងឺកូវីដ-១៩ គ្រូបង្រៀនត្រូវឆ្លងកាត់បទពិសោធន៍ជាច្រើន ដូចជា៖ ការរិះរកវិធីសាស្រ្ដបង្រៀន, សកម្មភាពបង្រៀន, ការជួយសិស្ស, និងទំនាក់ទំនងជាមួយសិស្ស មាតា-បិតាសិស្ស, តាមរូបភាពជាការបង្រៀនពីចម្ងាយ,  ការរៀនតាមបណ្ដុះ, ការបង្រៀនតាមប្រព័នញធអេឡិចត្រូនិក, ការបែចែង និងកែសន្លឹកកិច្ចការ, ក៏ដូចជា ការថតវីដេអូបង្រៀនជាដើម៕

អត្ថបទ៖ ឃួន សុភ័ក្រ