ព័ត៌មានជាតិ

ខឹងគេស្រលាញ់សង្សារចាស់របស់ខ្លួន កាប់បុរសម្នាក់រងរបួសធ្ងន់ ត្រូវប៉ូលិសចាប់បាន

បានផុស

៦ years មុន

នៅ

ថ្ងៃព្រហស្បតិ៍ ៣១ ធ្នូ ២០២០

ដោយ

ជនសង្ស័យជាជនដៃដល់ម្នាក់ ក្នុងចំណោមបក្ខពួក៣នាក់ផ្សេងទៀត ដែលបានប្រើអំពើហិង្សា(កាប់)បង្កឲ្យមានរបួសស្នាមធ្ងន់ធ្ងរទៅលើជនរងគ្រោះម្នាក់ ត្រូវបានសមត្ថកិច្ចឃាត់ខ្លួនហើយ។ការឃាត់ខ្លួនជនសង្ស័យម្នាក់ខាងលើនេះ បានធ្វើឡើងកាលពីថ្ងៃទី៣០ ខែធ្នូ ឆ្នាំ២០២០ម្សិលមិញ នៅវេលាម៉ោង១១និង៤០នាទី នៅចំណុចភូមិស្តីលើ ឃុំព្រែកហ្លួង ស្រុកឯកភ្នំ ខេត្តបាត់ដំបង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកវរសេនីយ៍ឯក ឈឿង គឹមសុង មន្ត្រីព្រហ្មទណ្ឌកម្រិតស្រាលនៃស្នងការខេត្តបានឲ្យដឹងថា ក្រោយពីទទួលបានពាក្យបណ្តឹងរបស់ជនរងគ្រោះ កាលពីថ្ងៃទី៣០ខែធ្នូភ្លាមៗនោះ សមត្ថកិច្ចធ្វើការស្រាវជ្រាវជុំវិញករណីហិង្សានេះ រហូតឈានទៅកំណត់បាននូវមុខសញ្ញាធ្វើសកម្មភាពនិងបានសម្រេចឃាត់ខ្លួនជនសង្ស័យម្នាក់ ស្របតាមការសម្របសម្រួលលើនីតិវិធីពីលោក គឺ ប៊ុណ្ណារ៉ា ព្រះរាជអាជ្ញាអមសាលាដំបូងខេត្តបាត់ដំបងផង។ លោកបន្តថា កិច្ចប្រតិបត្តិការខាងលើ លោកបានដឹកនាំកម្លាំងជំនាញសហការជាមួយកម្លាំងក្រុមអន្តរាគមន៍បង្ការបង្ក្រាបរបស់ស្នងការដ្ឋានសហការជាមួយកម្លាំងនគរបាលស្រុកឯកភ្នំ បានចុះឃាត់ខ្លួនជនសង្ស័យម្នាក់ ក្នុងចំណោមជនពាក់ព័ន្ធ៣នាក់ផ្សេងទៀត ក្នុងករណីហិង្សាដោយចេតនាមានស្ថានទម្ងន់ទោស(កាប់នឹងកាំបិតហើយគប់នឹងដុំថ្ម)ធ្វើឲ្យរងរបួសនិងខូចខាតនូវទ្រព្យសម្បត្តិរបស់ជនរងគ្រោះកាលពី៣ថ្ងៃកន្លងទៅ។ ជនសង្ស័យចំនួន០១នាក់ ដែលត្រូវឃាត់ខ្លួនមានឈ្មោះ សល់ សាន់ ហៅតឿ ភេទប្រុស អាយុ១៨ឆ្នាំ មានទីលំនៅភូមិស្តីលើ ឃុំព្រែកហ្លួង ស្រុកឯកភ្នំ ខេត្តបាត់ដំបង។

លោកបញ្ជាក់បន្តថា ជនសង្ស័យខាងលើនិងបក្ខពួក៣នាក់ទៀត បានធ្វើសកម្មភាពកាប់ទៅលើជនរងគ្រោះកាលពីថ្ងៃទី២៦ ខែធ្នូ ឆ្នាំ២០២០ វេលាម៉ោង១៧និង០០នាទី នៅចំណុចភូមិវត្តលៀបសង្កាត់ចំការសំរោង ក្រុង/ខេត្តបាត់ដំបង។ ដោយបានប្រើប្រាស់កាំបិតនិងដុំថ្មផង បានកាប់បំផ្លាញម៉ូតូមួយគ្រឿង និងបង្កឲ្យជនរងគ្រោះឈ្មោះ សុខ រ៉ានីឆា ភេទប្រុស អាយុ១៥ឆ្នាំ មានទីលំនៅភូមិកាប់គោថ្មី សង្កាត់អូរចារ ក្រុងបាត់ដំបង ទទួលរងរបួសមុតរយះចេញឈាមត្រង់សៀតផ្កាខាងឆ្វេង និងមុតរយះត្រង់ខ្នងខាងឆ្វេង និងត្រូវនាំទៅសង្គ្រោះនៅមន្ទីរពេទ្យភ្លាមៗ។

ក្រោយសមត្ថកិច្ចធ្វើការសាកសួរនៅចំពោះមុខ សមត្ថកិច្ចជនដៃដល់ឈ្មោះ សល់ សាន់ ហៅតឿបានឆ្លើយសារភាពថា មូលហេតុ ដែលខ្លួនរួមទាំងបក្សពួកចំនួន០៣នាក់ទៀតធ្ វើសកម្មភាពដោយមានកាំបិតដេញកាប់ទៅលើជនរងគ្រោះខាងលើ កាលពីថ្ងៃទី២៦ ខែធ្នូ ឆ្នាំ២០២០កន្លងទៅនេះ គឺព្រោះតែខឹងនឹងជនរងគ្រោះរូបនេះ ថ្លើមធំហ៊ានទៅស្រឡាញ់អតីតសង្សាររបស់ខ្លួន។បច្ចុប្បន្នការិយាល័យជំនាញកំពុងធ្វើការស្រាវជ្រាវតាមចាប់ខ្លួនជនសង្ស័យពាក់ព័ន្ធជាបន្តទៀត និងបានកសាងសំណុំរឿងបញ្ជូនជនសង្ស័យរូបនេះ ទៅសាលាដំបូងខេត្តបាត់ដំបង ចាត់ការបន្តតាមនីតិវិធី៕

អត្ថបទ៖ សៅ សារិទ្ធ

សូមចុចអាន៖ ចោទប្រកាន់នាយប៉ុស្តិ៍ រំលោភក្មេងស្រីអាយុ ១៣ ឆ្នាំ បញ្ចប់រឿងត្រឹមប្រាក់សំណង ៦ លាន