ព័ត៌មានជាតិ

អាជ្ញាធរស្រុកបូទូមសាគរ មិនទុកឱ្យពលរដ្ឋនៅដាច់ស្រយោលណាម្នាក់ស្លាប់ឥតបាយឡើយ

បានផុស

៤ years មុន

នៅ

ថ្ងៃពុធ ១២ តុលា ២០២២

ដោយ

កោះកុង ៖ តំណាងអាជ្ញាធរ និងអនុសាខាកាកបាទក្រហមកម្ពុជាស្រុកបូទុមសាគរ បាននាំយកនូវស្បៀងអាហារប្រគល់ប្រជាពលរដ្ឋនៅចំណុចព្រែកតានង ជាទីឆ្ងាយដាច់ស្រយោលមួយ ដោយអាជ្ញាធរអះអាងថា មិនទុកឱ្យពលរដ្ឋណាម្នាក់ស្លាប់ឥតបាយសោះឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាជ្ញាធរ និងអនុប្រធានសាខាកាកបាទក្រហមកម្ពុជាស្រុកបូទុមសាគរ កាលពីថ្ងៃទី១២ ខែតុលា ឆ្នាំ២០២២បានចុះទៅសួរសុខទុក្ខ និងដឹងពីសេចក្តីត្រូវការចង់បានរបស់ពលរដ្ឋរស់នៅចំណុចព្រែកតានង ភូមិអណ្តូងទឹក ឃុំអណ្តូងទឹក ចំនួន១៩គ្រួសារ តាមរយៈការធ្វើដំណើរដោយទូកជាង៣០នាទី។

លោក ក្រូច បូរីសីហា ប្រធានកិត្តិយសអនុសាខាកាកបាទក្រហមកម្ពុជា និងអភិបាលបាលស្រុកបូទុមសាគរ បានឱ្យដឹងថា សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចតែងផ្តោតការយកចិត្តទុកដាក់ខ្ពស់បំផុតចំពោះសុខទុក្ខប្រជាពលរដ្ឋគ្រប់រូប កំពុងជួបការលំបាក រួមមាន ពលរដ្ឋចាស់ជរា ស្ត្រីទើបសម្រាល ជនពិការ ស្ត្រីផ្ទុកមេរោគអេដស៍ ព្រមទាំងជនងាយរងគ្រោះតាមការផ្តល់ស្បៀងអាហារ និងថវិកាគាំទ្រ។

លោក ក្រូច បូរីសីហា បន្ថែមទៀតថា រាល់ការដោះស្រាយដោយគិតគូរពីទុក្ខលំបាករបស់អ្នកដែលមានតម្រូវការដោះស្រាយជីវភាព ធ្វើឡើងដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយអ្វីទេ។ លើសពីនេះទៀត គឺមិនទុកឱ្យពលរដ្ឋណាម្នាក់ស្លាប់ដោយគ្មានបាយហូបនោះឡើយ។

អាជ្ញាធរ និងមន្ត្រីអនុសាខាកាកបាទក្រហមកម្ពុជាស្រុកបូទុមសាគរ ក៏ជំរុញដល់មាតាបិតាកុមារ ត្រូវបញ្ជូនកូនទៅសាលារៀនឱ្យបានគ្រប់ៗគ្នា ព្រោះថាចំណេះវិជ្ជាមានសារៈសំខាន់សម្រាប់យុវជនជំនាន់ៗ ដើម្បីក្លាយខ្លួនជាធនធានមនុស្សចូលរួមអភិវឌ្ឍន៍ប្រទេសជាតិបានជឿនលឿនទៅមុខ។

ទន្ទឹមនោះ លោក ក្រូច បូរីសីហា ក៏ទទូចដល់ប្រជាពលរដ្ឋណាដែលមិនទាន់ចាក់វ៉ាក់សាំងគ្រប់ចំនួនទៅតាមការកំណត់ដូសរបស់ក្រសួងសុខាភិបាល មេត្តាប្រញាប់រួសរាល់ទៅទទួលសេវាមួយនេះនៅតាមប៉ុស្តិ៍សុខភាព ឬមណ្ឌលសុខភាពដែលនៅក្បែរលំនៅឋាន។ ត្បិតជាពលរដ្ឋរស់នៅឆ្ងាយដាច់ស្រយោលយ៉ាងណាក៏ដោយ។

យោងតាមរបាយការណ៍ផ្តល់ដោយអាជ្ញាធរភូមិ ប្រជាពលរដ្ឋនៅចំណុចព្រែកតានង ត្រូវបានអាជ្ញាធរចាត់ទុកថា ពលរដ្ឋរស់នៅឆ្ងាយដាច់ស្រយោលមួយពីទីប្រជុំជន ដោយមានរស់នៅជិត២០គ្រួសារ ស្មើនឹង៦៥នាក់ ដែលភាគច្រើនប្រកបមុខរបរនេសាទសមុទ្រ និងធ្វើកសិកម្មបន្តិចបន្តួច សម្រាប់ចិញ្ចឹមជីវិត។

អ្នកស្រី ហ៊ិន យ៉ាំ និងអ្នកស្រី ហាស តែម ជាប្រជាពលរដ្ឋរស់នៅព្រែកតានង បាននិយាយថា ពួកគាត់សូមអរគុណខ្លាំងណាស់ដែលមានអាជ្ញាធរចុះមកផ្តល់ជាស្បៀងអាហារ ដើម្បីដោះស្រាយជីវភាពប្រចាំថ្ងៃ ខណៈរដូវវស្សានេសាទនិងធ្វើកសិកម្មពុំសូវបានផលល្អដូចខែប្រាំង។

បើតាមពលរដ្ឋទាំងពីរនាក់ បច្ចុប្បន្នមានកូនចៅខ្លះបានទៅរៀនសូត្រ ខ្លះទៀតពុំសូវបានរៀនគ្រប់គ្រាន់ ដោយសារតែសូវមធ្យោបាយធ្វើដំណើរ ប្រសិនបើអាជ្ញាធរផ្តល់ជាទូកសម្រាប់ដឹកជញ្ជូនកុមារទៅសិក្សាពិតជាវិសេសវិសាលណាស់។ ដោយការចាក់វ៉ាក់សាំងវិញ ពួកគាត់បានចាក់៤ទៅ៥ដូសអស់ហើយក្រោមគោលដៅស្ម័គ្រចិត្តគ្មានការបង្ខិតបង្ខំអ្វីឡើយ៕

អត្ថបទ ៖ សិរីវឌ្ឍនៈ