ជំនន់ទឹកភ្លៀងបង្កការខូចខាតធ្ងន់ធ្ងរ៩ស្រុក ក្នុងចំណោមស្រុកទាំង១៤ នៃខេត្តបាត់ដំបង

គិតត្រឹមថ្ងៃទី១១ ខែតុលា ឆ្នាំ២០២២ ជំនន់ទឹកភ្លៀងបង្កឲ្យមានផលប៉ះពាល់លើដំណាំស្រូវរបស់ប្រជាពលរដ្ឋទូទាំង ១៤ស្រុក ក្នុងខេត្តបាត់ដំបង ក្នុងនោះមានស្រុកមួយចំនួន៩បានរងការខូចខាត ហើយមួយចំនួនទៀតមិនមានការខូចខាតនោះទេ គ្រាន់តែរងផលប៉ះពាល់តែប៉ុណ្ណោះ ។ នេះបើយោងតាមស្ថិតិពីមន្ទីរកសិកម្មខេត្ត បានបង្ហាញឲ្យដឹងកាលពីរសៀលថ្ងៃទី១២ ខែតុលាម្សិលមិញ ។

ប្រភពដដែលបន្តថា បណ្តាស្រុកដែលបានរងផលប៉ះពាល់តិច និងច្រើនលើផលដំណាំស្រូវមានចំនួន១១ស្រុក ក្នុងចំណោមស្រុកទាំង១៤ទូទាំងខេត្ត ដែលក្នុងនោះមាន ស្រុកបាណន់ ថ្មគោល ក្រុងបាត់ដំបង បវេល ឯកភ្នំ មោងឫស្សី រតន:មណ្ឌល ភ្នំព្រឹក កំរៀង គាស់ក្រឡ និង រុក្ខគីរី សរុបផលប៉ះពាល់មានចំនួន ៧១,៤៣៩ហិកតា ។

ហើយតាមបណ្តាស្រុកដែលបានរងផលប៉ះពាល់ខាងលើទាំង១១ស្រុក ក្នុងនោះក៏មានស្រុកចំនួន ៩បានរងការខូចខាត រួមមាន ស្រុកបាណន់ ស្រុកថ្មគោល ក្រុងបាត់ដំបង បវេល ឯកភ្នំ មោងឫស្សី កំរៀង គាស់ក្រឡ និង ស្រុករុក្ខគីរី
សរុបទំហំនៃការខូចខាតមានចំនួន ៣៧,៥៨០ហិកតា ៕

អត្ថបទ៖ សៅ សារិទ្ធ