ព័ត៌មានជាតិ
អ្នកនាំពាក្យក្រសួងយុត្តិធម៌ ៖ អ្នកប្រព្រឹត្ត និងអ្នកពាក់ព័ន្ធក្នុងសកម្មភាពញុះញង់របស់លោក សម រង្ស៊ី នឹងប្រឈមការចោទប្រកាន់
អ្នកនាំពាក្យក្រសួងយុត្តិធម៌ បានបង្ហាញអំពីទិដ្ឋភាពច្បាប់ដល់សាធារណជន ជុំវិញការអំពាវនាវរបស់លោក សម រង្ស៊ី ដែលជាទណ្ឌិត ក្នុងគោលបំណងញុះញង់ និងអំពាវនាវឲ្យប្រជាពលរដ្ឋ និងកងកម្លាំងប្រដាប់អាវុធទាំងអស់ ចូលរួមធ្វើការបេះបោរផ្ដួលរំលំរាជរដ្ឋាភិបាលស្របច្បាប់។ បើតាមអ្នកនាំពាក្យក្រសួងយុត្តិធម៌ អ្នកប្រព្រឹត្តផ្ទាល់ និងអ្នកពាក់ព័ន្ធក្នុងសកម្មភាពញុះញង់ របស់អតីតមេបក្សប្រឆាំងទាំងអស់ នឹងត្រូវប្រឈមនឹងការចោទប្រកាន់ និងការផ្ដន្ទាទោសយ៉ាងតឹងរឹងស្របតាមច្បាប់។
សេចក្ដីថ្លែងការណ៍របស់លោក ជិន ម៉ាលីន អ្នកនាំពាក្យក្រសួងយុត្តិធម៌ បានឲ្យដឹងថា កាលពីថ្ងៃទី ១៦ ខែតុលា ឆ្នាំ ២០២២ លោក សម រង្ស៊ី ដែលជាទណ្ឌិតរត់គេចខ្លួននៅក្រៅប្រទេស បានចេញឃ្លីបវីដេអូមួយ ដែលមានចំណងជើងថា «សេចក្ដីអំពាវនាវលោក សម រង្ស៊ី ជូនចំពោះប្រជារាស្រ្ដខ្មែរ និងកងកម្លាំងប្រដាប់អាវុធ៖ “ត្រូវតែមានការផ្លាស់ប្ដូរនៅកម្ពុជា ក្នុងឆ្នាំ ២០២៣”»។
ក្នុងឃ្លីបវីដេអូរបស់អតីតមេបក្សប្រឆាំងរូបនេះ មានគោលបំណងញុះញង់ និងអំពាវនាវឲ្យប្រជាពលរដ្ឋ និងកងកម្លាំងប្រដាប់អាវុធទាំងអស់ ចូលរួមធ្វើការបេះបោរផ្ដួលរំលំរាជរដ្ឋាភិបាលស្របច្បាប់ នៅឆ្នាំ ២០២៣ ខាងមុខនេះ។ អ្នកនាំពាក្យក្រសួងយុត្តិធម៌ បានបញ្ជាក់ជូនសាធារណជនអំពីទិដ្ឋភាពច្បាប់ ដូចខាងក្រោម៖
ទី១. ការញុះញង់ និងការអំពាវនាវឲ្យមានការចូលរួម ធ្វើការបេះបោរផ្ដួលរំលំរាជរដ្ឋាភិបាលស្របច្បាប់ គឺជាការបំផ្លាញសន្តិភាព ស្ថិរភាព និសេចក្ដីសុខសាន្ដរបស់ប្រទេសកម្ពុជា ដែលផ្ទុយទៅនឹងបំណងប្រាថ្នារបស់ប្រជាជនកម្ពុជា, ខុសនឹងគោលការណ៍ប្រជាធិបតេយ្យ និងខុសទៅនឹងរដ្ឋធម្មនុញ្ញ និងច្បាប់ជាធរមានរបស់ព្រះរាជាណាចក្រកម្ពុជា ហើយអ្នកប្រព្រឹត្តផ្ទាល់ និងអ្នកពាក់ព័ន្ធទាំងអស់នឹងត្រូវប្រឈមនឹងការចោទប្រកាន់ និងការផ្ដន្ទាទោសយ៉ាងតឹងរឹងស្របតាមច្បាប់ព្រហ្មទណ្ឌ នៃព្រះរាជាណាចក្រកម្ពុជា។
ទី២. សកម្មភាពរបស់គណបក្សនយោបាយណា ដែលគាំទ្រ ឬចូលរួមអនុវត្តផែនការផ្ដួលរំលំរាជរដ្ឋាភិបាលស្របច្បាប់របស់លោក សម រង្ស៊ី ដែលជាទណ្ឌិត នៅឆ្នាំ ២០២៣ ខាងមុខនេះ ឬចូលរួមពាក់ព័ន្ធនឹងទណ្ឌិត គឺជាការល្មើសទៅនឹងច្បាប់ ស្ដីពី គណបក្សនយោបាយ និងច្បាប់ ស្ដីពី វិសោធនកម្មច្បាប់ ស្ដីពី គណបក្សនយោបាយ ដែលត្រូវប្រឈមនឹងវិធានការយ៉ាងតឹងរ៉ឹងស្របតាមច្បាប់ជាធរមាន។
សម្តេចតេជោ ហ៊ុន សែន នាយរដ្ឋមន្ត្រីនៃកម្ពុជា នៅថ្ងៃទី១៧ ខែតុលាម្សិលមិញ បានប្រកាសទុកជាមុនថា ប្រសិនបើគណបក្សនយោបាយណា ជាប់ពាក់ព័ន្ធនឹងលោក សម រង្ស៊ី ដែលជាទណ្ឌិត នឹងត្រូវប្តឹងផ្តល់ទៅតុលាការ។ ចំណែកឯអ្នកពាក់ព័ន្ធ និងអ្នកចូលរួមក្នុងសកម្មភាព របស់អតីតមេបក្សប្រឆាំងរូបនេះ នឹងត្រូវចាត់វិធានការទៅតាមច្បាប់។
បន្ទាប់ពីឃើញឃ្លីបវីដេអូរបស់លោក សម រង្ស៊ី ដែលជាទណ្ឌិតរូបនេះមក គឺថ្នាក់ដឹកនាំរាជរដ្ឋាភិបាល តាមក្រសួង-ស្ថាប័ននាន កងកម្លាំងប្រដាប់អាវុធគ្រប់ប្រភេទ អាជ្ញាធរគ្រប់លំដាប់ថ្នាក់ និងប្រជាពលរដ្ឋ បាននាំគ្នាចេញញាត្តិ និងសេចក្ដីថ្លែងការណ៍ថ្កោលទោស ដល់អតីតមេបក្សប្រឆាំងរូបនេះ ជាបន្តបន្ទាប់។
នៅសេចក្ដីថ្លែងការណ៍របស់ក្រសួងយុត្តិធម៌ខាងលើនេះ ក៏បានប្រកាសប្រឆាំងដាច់ខាត និងថ្កោលទោសដាច់អហង្ការចំពោះទង្វើរបស់លោក សម រង្ស៊ី ដែលជាទណ្ឌិត និងបានអំពាវនាវដល់សាធារណជន កងកម្លាំងប្រដាប់អាវុធ និងគណបក្សនយោបាយទាំងអស់ កុំចាញ់បោក និងកុំចូលរួមប្រព្រឹត្តអំពើខុសច្បាប់តាមការញុះញង់ និងការអំពាវនាវរបស់អតីតមេបក្សប្រឆាំងរូបនេះ ជៀសវាងប្រឈមមុខនឹងការអនុវត្តច្បាប់យ៉ាងតឹងរ៉ឹង ស្របតាមច្បាប់ជាធរមាន៕
អត្ថបទ៖ ឃួន សុភ័ក្រ
-
ព័ត៌មានជាតិ១ សប្តាហ៍ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៦ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៥ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍២ ថ្ងៃ ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៦ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ព័ត៌មានជាតិ៦ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សេដ្ឋកិច្ច៧ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៦ ថ្ងៃ ago
កសិដ្ឋានវៃឆ្លាតដាំដំណាំពោតលើផ្ទៃដីប្រមាណ ១ពាន់ហិកតា នៅខេត្តសៀមរាប ត្រូវបានសម្ពោធជាផ្លូវការ